Sápmi |

Oanehaččat: Badje-Lappi guolástanlobit vuovdimassii, dovdameahttun goaskima beasis máksojuvvo gávdnanmáksu, Sámi Giellagáldu organisašuvdnamálle ovdána dievasčoahkkimii, Anára gielda vihkkehallá borramušbálvalusaid fállama priváhta bálvalusfállái ja Giellagas-instituhttii ohcet dutkanvehkiid

Dás leat gaskavahku oanehis ođđasat.

Maakotka
Meahciráđđehus máksá gávdnanmávssu dovdameahttun goaskinbesiin. Govva: Ismo Pekkarinen / AOP

Guldal dás gaskavahkku Yle Ođđasiid Sámis Jietna: Yle Areena.

Badje-Lappi guolástanlobiid lea dál vejolaš oastit

Guolástanlobiid vuovdin Eanodaga, Anára ja Ohcejoga gieldalaččaide álgá odne 22.5. Daid gielddaid olbmot sáhttet otná rájes oastit áigodatlobi, mainna sáhttá bivdit stákkuin gieldda guovllu johkabáikkiin. Lobi haddi lea 40 euro ja vuolleahkásaččaide nuvttá. Lohpevuovdin lea álgán luondduguovddážiin odne diibmu 9.00.

Gieldda olbmuid nuvttá guolástanlohpi Ohcejogas, Anáris ja Eanodagas lea ain fámus stáhta čáziin, mat leat eará guovllut go luosa ja dápmoha goargŋunčázit.

Olgobáikegotti olbmot sáhttet maiddái oastit jo lobiid, go jándorlobiid vuovdin olgobáikegotti olbmuide álggii ikte.

Gávdnanmáksu máksojuvvo dovdameahttun goaskima ja mearragoaskima beasis

Meahci johttit sáhttet dál oažžut mávssu dan ovddas, go almmuhit Meahciráđđehussii dakkár goaskinbesiin, mat eai leat vel registariin.

Meahciráđđehus máksá 99 euro sturrosaš mávssu almmuhuvvon goaskima dahje Davvi-Suomas gávdnon mearragoaskima beasis, mii ii leat ovddežis Meahciráđđehusa dieđus. Máddelis Suomas gávdnon mearragoaskimiid besiin Meahciráđđehus ii mávsse maidege.

Almmuhusas galget leat almmuhusa dahkki namma ja oktavuođadieđut, gielda ja báikenamma ja beasi vejolaš koordináhtat. Meahciráđđehus dárkkista almmuhuvvon besiid ovdal gávdnanmávssu máksima.

Meahciráđđehusa Luonddubálvalusaid okta doaibma lea goaskimiid besiid dárkkisteapmi ja ođđa besiid ohcan goaskimiid boazodollui dagahan vahátvuogádaga dárbbuide. Lassin Meahciráđđehus dikšu mearragoaskinčuovvuma Davvi-Suomas.

Sámi Giellagáldu organisašuvdnamálle ovdána dievasčoahkkimii

Sámedikki stivra evttoha dievasčoahkkimii, ahte dat fápmuda Sámi Parlamentáralaš ráđi válljet Sámi Giellagáldui organisašuvdnamálle dihto eavttuiguin.

Stivra evttoha, ahte Sámi Giellagáldu vuođđuduvvo bissovaš lágádussan dáinna eavttuin, ahte buot Sámedikkit leat mielde ja sámiid iešmearrideapmi sihkkarastojuvvo. Sámi Giellagáldus galgá leat jođihangoddi ja dasa gullet guđege Sámedikkis guokte áirasa ja guokte várreáirasa. Ieš guhtege Sámediggi nammada iežas jođihangotti áirasiid. Stivra evttoha, ahte lágádusas galget leat giellabargit dan mielde, ahte buot golmma riikka váldogielaid váikkuhusat, sámegielaid dárbbut ja hástalusat váldojuvvojit vuhtii.

Sihke Norgga ja Ruoŧa sámedikkiid stivrrat lea dohkkehan evttohusa, ahte Sámi Giellagáldu bissovaš organisašuvdnamálle válljen sirdása Sámi Parlamentáralaš ráđi dievasčoahkkimii. Sámi Giellagáldu doaibmá Sámi Parlamentáralaš ráđi vuolde.

Anára gielda vihkkehallá borramušbálvalusaid fállama priváhta bálvalusfállái

Anára gielda vihkkehallá, jus gieldda borramušbálvalusaid sáhtašii fállat muhtin priváhta bálvalusfálli. Gielddaráđđehus mearridii mánnodaga 20.5. čoahkkimisttis, ahte dat gilvalahttá bálvalusa.

Ulbmilin das, ahte bálvalusa fállá muhtin eará priváhta bálvalusfálli, lea máhtu dorvvasteapmi, buvttadanvugiid ovddideapmi ja ođadeapmi, kvalitehta sihkkarastin ja goluid ráddjen.

Dál biebmobálvalusa fálli fitnodatlágádusa stuorámus hástalusain lea leamašan bargoveaga oažžun, áššehasdárbbuid rievdan ja borramušbálvalusaid ovddideapmi. Dál borramušbálvalus dahká sullii 350 000 mállása jagis.

Ohcet dutkánvehkiid Giellagas-instituhttii

Oulu Universitehta Giellagas-instituhttii ohcet dutkanvehkiid. Dutkanvehkiid bargun lea littereret arkiivajienaid. Giellagáibádussan lea goit ovtta sámegiela vuođđooahput. Loga bargguin eanet dáppe.

Bargu lea 5.-30.8.2019. Ohcanáigi bargguide nohká 14.6.2019 diibmu 16.00. Ohcamušaid galgá sáddet čujuhussii ska(at)oulu.fi.

Varrasamosat: Sápmi

Váldoođđasat

Varrasamosat

Muualla Yle.fi:ssä