Sápmi |

Oanehaččat: Barta bulii Gárasavvonis, stáhta doarju Sámiráđi, Sámi artisttaid vurdet beassat Eurovišuvdnii, Guoládatnjárgga gottiid háliidit suodjalit, Jáhpan áigu dovddastit ainuid álgoálbmogin, Soađegili seaŋgaossodagas čoavjedávda ja oktasašohcan álgá

Dá leat maŋŋebárgga oanehis ođđasat.

Jon Henrik Fjällgren Riddu Riđđu -festivaalissa.
Jon Henrik Fjällgren lea okta veahtaleaddjiid favorihtain vuoitit Ruoŧa Melodifestivalen-lávlungilvvu. Govva: Liv Inger Somby / NRK

Dá gulat maŋŋebárgga Yle Ođđasiid Sámis diibmu 7:30. Jietna: Yle Areena

Astoáiggebarta bulii gutnan Gárasavvonis

Astoáiggebarta bulii gutnan Eanodaga Gárasavvonis vuossárgga ja maŋŋebárgga gaskasaš ija. Barttas ledje buolládettiin gávcci olbmo. Sin evakuerejedje hotellii, mii lei seamma šiljus. Oktage ii lápmašuvvan buollimis. Buollinsiva eai dieđe.

Gádjunlágádus oaččui dieđu buollimis gaskaija áigge. Gohcci buollinmeašttir Jorma Ojala muitala, ahte olles barta lei juo buollimin, go buollinčáskadeaddjit ollejedje báikki ala. Gádjunlágádus joatká čáskadan- ja čorgenbargguid otne maŋŋebárgga.

Samiráđđái veahkkeruhta stáhtas

Olgoministeriija lea juolludan oktiibuot 911 000 euro ovddas stáhtadoarjagiid ovcci organisašuvdnii, mat barget olgo- ja dorvvolašvuođapolitihkká suorggis. Sámiráđđi lea ge okta dain organisašuvnnain mii fitne stáhtadoarjaga doaimmaidis várás olgoministeriijas. Dán jagaš juolludemiin deattuhedje dakkár álbmotorganisašuvnnaid, mat barget earret eará riikkaidgaskasaš ovttasbargo áššiiguin ja olmmošvuoigatvuohta gažaldagaiguin.

Sámiráđi lassin stáhtadoarjaga ožžo Crisis Management Initiative -searvi, Olmmošvuoigatvuođalihttu, Laajan turvallisuuden verkosto -searvi (WISE), Suoma Atlántta -searvi, Suoma Rukses Ruossa, Suoma ON-lihttu ja World Federation of the Deaf -searvi.

NRK: Sámi artisttat veahtaleaddjiid jiellahat Eurovišuvnna rátkkagilvvuin

Norgga Melodi Grand Prix -lávlungilvvus sápmelaš musihkkajoavku KEiiNO lea stuorámus favorihtta veahtalanfitnodagaid gaskkas. Dat árvalit KEiiNO vuoitit Norgga Melodi Grand Prix guovtti vahku geažes, njukčamánu 2. beaivve.

Ruoŧa bealde fas Jon Henrik Fjällgren lea okta veahtaleaddjiid favorihtain vuoitit Ruoŧa Melodifestivalen-lávlungilvvu. Melodifestivalen finála lágiduvvo Stockholmmas njukčamánu 9. beaivve.

Rátkkagilvvuid vuoitit besset ovddastit riikkaset eurovišuvnna lávlungilvui. Eurovišuvnna lávlungilvu lágiduvvo Tel Avivis Israelis miessemánu 14.–18. beivviid.

Barents Observer: Murmánskka eiseválddit háliidit gieldit goddebivddu

Murmánskka guovllu eiseválddit háliidit gottiide bissovaš meahcástangildosa. Áššis muitalit Murmanski Vestnik ja The Independent Barents Observer -neahttabláđit. Guoládatnjárgga nuortta beale ja gaskaosiid gottiid evttohit bidjat Ruošša nu gohčoduvvon Rukses girjái. Dán girjái leat listen hárvenaš ja áittavuloš elliid, maid galgá Ruoššas suodjalit.

Mannan vahkus Murmánskka guovloeiseválddit mearridedje evttohit gottiid suodjaluvvon elliid listui čoahkkimis, mas gieđahalle áittavuloš šlájaid.

Jagi 2014 Rukses girjái leat juo lasihuvvon gottit, mat ellet Guoládaga oarjeosiin Suoma rájá alde. Guoládat lea áidna guovlu poláragierddu davábealde Eurohpás, gos leat luondduviđá gottit.

Jáhpan áigu dovddastit ainuid riikka álgoálbmogin

Jáhpana ráđđehus lea ovddidan láhkaevttohusa, mii dovddastivččii ainu-álbmoga viimmatge riikka eamiálbmogin, čállá Washington Post. Lágain lea ulbmil maiddái suodjalit ja ovddidit ainuid kultuvrra. Ainu-álbmot ássá davvin Jáhpana Hokkaido sullos ja lea guhká gillán bággoassimileremis ja badjelgeahččamis.

Galledemiid ráddjejit Soađegili seaŋgaossodagas

Čoavjedávda váivvida dál Soađegili dearvvašvuođaguovddáža. Soađegili dearvvašvuođaguovddáža seaŋgaossodagas njoammu čoavjedávda ja danin ávžžuhit, ahte olbmot eai galledivčče dál seaŋgaossodagas.

Giđa oktasašohcan álgá

Giđa oktasašohcan ámmátskuvllaide ja logahagaide álgá otne maŋŋebárgga. Lappis leat dán giđa oktiibuot 3143 ođđa skuvlasaji ámmátskuvllaide ja logahagaide. Oktasašohcan nohká njukčamánu 12. beaivve.

Varrasamosat: Sápmi

Váldoođđasat

Varrasamosat

Muualla Yle.fi:ssä