Sápmi |

Oanehaččat: Biilalihkohisvuohta Soađegilis, rádječáhcekommišuvdna čoahkkanii Anáris, vuosttaš guovžžat goddon boazodoalloguovllus ja bihtánsámegiela čállinvuohki normerejuvvon

Dá leat gaskavahku oanehis ođđasat.

Taavetissa kuvattu karhu
Guovžabivdu lea álgán disdaga 20.8. Govva: AOP

Soađegilis biilalihkohisvuohta

Soađegilis dáhpáhuvai disdaga 20.8. maŋŋiteahkedis biilalihkohisvuohta, go guokte biilla beaškkehedje oktii. Guktuin biillain lei okta olmmoš. Gádjunlágádus gárttai čuohppat nuppi biilla gáhtu eret, vai ožžo olbmo olggos biillas. Nuppi olmmoš lei jo olgun, go gádjunlágádus bođii. Son oaččui unna háviid, maid vuosttašveahkki dárkkistii.

Lihkohisvuohta dáhpáhuvai Ivalontie ja Rajalantie luoddaearus. Lihkohisvuođa dihte Njelješgeaidnu giddejuvvui bottažii, ja johtolat beasai fas johtui veháš gaskaija maŋŋá. Gádjunlágádus oaččui dieđu lihkohisvuođas 22:44.

Rádječáhcekommišuvdna čoahkkanii Anáris

Anáris leat disdaga 20.8. vuolláičállán Suoma ja Ruošša oktasaš rádječáhcekommišuvnna beavdegirjji ja ulbmiliid boahtte jahkái.

Suomas ja Ruoššas leat 19 oktasaš rádječázi ja stáhtat čoahkkanit oktii jagis guorahallat daid dili. Suopma ja Ruošša ovdamearkka dihte čuovvuba ovttas man buhtes čáhci rádječáziin lea ja mo rádječáziid allodat váikkuha goappáge riikii.

Guovžabivdu ja čáhceloddebivdu álgán

Guovžabivdu lea álgán disdaga 20.8. Dassážii leat goddán njeallje guovžža nuorttit boazodoalloguovllus, čielgá Suoma fuođđoguovddáža dieđuin.

Dán čavčča lea lohpi báhčit 70 guovžža nuorttit boazodoalloguovllus ja 15 guovžža fas oarjjit boazodoalloguovllus. Mannan čavčča bivdui eana- ja vuovdedoalloministeriija mieđihii logi lobi eanet. Erenoamáš vahágiid vuođul fuođđoguovddáš sáhttá mieđihit guovžagoddinlobi maiddái máinnašuvvon dihtomeari olggobealdege.

Oppa Suomas lea lohpi goddit 313 guovžža. Suomas leat dálá dilis badjelaš 2 000 guovžža.

Maiddái čáhceloddebivdu lea álgán disdaga 20.8. gaskabeaivvi áigge. Diibmá Suomas bivde 158 000 stuorravuojáža, mii lea eanemus bivdojuvvon čáhceloddi. Luondduriggodatguovddáža dieđuid mielde čáhceloddesállašiid mearri lea goit unnon jagis jahkái.

Bihtánsámegiela čállinvuohki normerejuvvon

Bihtánsámegiela čállinvuohki normerejuvvui disdaga 20.8. Čállinvuohki normerejuvvui almmolaččat Silbamuseas Árjepluovis, Ruoŧas.

Bihtánsámegielas leat sullii 40 hupmi, geain stuorámus oassi ássá Ruoŧas, muitala Sámerádion ja SVT Sápmi.

Varrasamosat: Sápmi

Váldoođđasat

Varrasamosat

Muualla Yle.fi:ssä