Sápmi |

Oanehaččat: BO ávžžuha geahpedit geainnuid sáltema, Juvvá Lemet logaldallá ON olmmošriektekomitea čovdosiin, E-girji.net buohkaid atnui ja Paadar čohkkii spábbadoaškunsániid

Loga dás bearjadaga oanehis ođđasiid.

Porot juoksevat tiellä
Bálgosiid ovttastusa mielas geainnuid sálten geasuha bohccuid geainnuid ala ja lasiha boazobárttiid. Govva: Risto Koskinen / Yle

Dá gulat bearjadaga Yle Ođđasiid Sámis. Jietna: Yle Areena

Bálgosiid ovttastus ávžžuha geahpedit geainnuid sáltema

Bálgosiid ovttastus ávžžuha Johtolatlágádusa geahpedit geainnuid sáltema boazodoalloguovllus. Bálgosiid ovttastus oaivvilda, ahte sáltejuvvon geainnut geasuhit bohccuid geainnuid ala ja bohccot vuojahallet.

Johtolatlágádusa ođđa geaidnofuolahuskriterat bohte fápmui jagi álggus ja sálten boahtá lassánit goit Lappi máttaosiin ain jo Roavvenjárgga rádjai. Bálgosiid ovttastusa mielas geainnuid sálten boazodoalloguovllus lea dušši, heajuda geainnuid ja lasiha boazobárttiid.

Juvvá Lemet logaldallá ON olmmošriektekomitea čovdosiin

Lappi universitehta dutkidoavttir Juvvá-Lemet, Klemetti Näkkäläjärvi logaldallá bearjadaga Ovttastuvvon Našuvnnaid olmmošriektekomitea čovdosiin. Ovttastuvvon Našuvnnaid olmmošvuoigatvuođakomitea mielas Suopma lea rihkkon siviila ja politihkalaš vuoigatvuođaid soahpamuša, go lea luoitán Sámedikki válgalogahallamii olbmuid Sámedikki dáhtu vuostá. Näkkäläjärvi lei ieš maid váidán alimus hálddahusrievtti mearrádusas olmmošriektekomiteai.

Klemetti Näkkäläjärvi logaldallá áššis bearjadaga Lappi universitehta Eeli-sáles Roavvenjárggas. Logaldallama sáhttá čuovvut maiddái neahttastreama bokte. Beannot diimmu logaldallan álgá diibmu 13.15.

E-girji.net buohkaid atnui

Davvisámegielat virtuála oahppanbiras, E-girji.net, lea dál rabas buohkaide. Siiddu dahkki, roavesávvonlaš Toivo West rabai oahppomateriálaid buohkaid atnui Ovttastuvvon Našuvnnaid riikkaidgaskasaš eamiálbmotgielaid jagi gudnin. Siiddus leat máŋggalágan digitála materiálat, maiguin olbmot sáhttet lohkat davvisámegiela.

West lea huksen siiddu iežas doaibmanamain ja siiddu lea ovdal sáhttán geavahit dušše liseanssain. West goit háliida dál, ahte olbmot sáhttet atnit ávkin dán digitála resurssa miehtá máilmmi.

Siidu lea leamašan jo guhkkit áigge ruhtadanváttisvuođaid siste. Sámi gielddain Eanodat ja Anár leat goit doarjugoahtán e-girji.net-siiddu barggu.

Harri Paadar čohkkii spábbadoaškunsániid

Suoma spábbadoaškunlihttu almmustahtii sámi álbmotbeaivvi gudnin listtu davvisámegielat spábbadoaškunsániin. Sátnelisttu lea čohkken Spábbadoaškunlihtu Davvi-Suoma guovlohoavda Harri Paadar.

– Dán sátnelisttu sánit ledje anus juo dalle, go ieš spellen spábbadoaškuma Ohcejogas. Lean sihkkarastán sámeoahpaheaddjiin ja maiddái Norgga beale sápmelaččain, ahte aiddo dát sánit geavahuvvojit ain otná beaivvege spábbadoaškumis, muitala Paadar.

Sátnelistu gávdno Suoma spábbadoaškunlihtu neahttasiiddus.

Varrasamosat: Sápmi

Váldoođđasat

Varrasamosat

Muualla Yle.fi:ssä