Sápmi |

Oanehaččat: Boazodoalloguovllus goddán 56 guovžža, Norggas máŋggat beatnagat jápmán dovdameahttun dávdii, Norggas suohkanválgabeaivi, Kulmuni Guovddáža ságadoallin, Unna Junná máhccá TV:i ja Yle Sámi rádio veaigeođđasiid sáddenáigi rievdá

Dá leat mánnodaga oanehis ođđasat.

Karhun kynnet.
Guovžža gaccat. Vuorkágovva. Govva: Anu Rummukainen / Yle

Guldal dás Yle Ođđasat Sápmi 9.9.2019 Jietna: Yle Areena

Boazodoalloguovllus lea goddon bivddus dán rádjai 56 guovžža

Guovžabivdu boazodoalloguovllus lea ovdánan nu, ahte 56 guovžža leat báhččojuvvon golmma vuosttas bivdovahkus. Dain dušše vihtta leat goddon oarjjit boazodoalloguovllus.

Eana- ja meahccedoalloministeriija ásahan dihtomeari mielde nuorttit boazodoalloguovllus lea lohpi goddit oktiibuot 70 guovžža nappo vel 19 guovžža ja oarjjit boazodoalloguovllus oktiibuot 15 guovžža nappo vel logi guovžža.

Mannan vahkuloahpas Anáris goddui okta guovža, Sallas golbma ja Guossámis okta guovža.

Bivddu ovdáneami beasat čuovvut dáppe.

Norggas máŋggat beatnagat jápmán vel dovdameahttun dávdii

Norggas máŋggat logit beatnagat jápmán vel dovdátmeahttun dávdii. Suoma Kennelliitto čállá, ahte dávda dagaha beatnagii garra luhčadávdda mas beana luhča vara ja beana sáhttá maiddái vuovssadit. Dávda ovdána jođánit. Vel eai leat sihkkarat leatgo buot beatnagat jápmán seamma dávdii, muhto dávdamearkkat leat seammasullasaččat.

Dávdda siva eai goit vel leat bastan čielggadit eaige vel sáhtte dadjat, ahte gažaldagas ii livččii njoammudávda. Suoma Kennelliitto čállá, ahte Norgga dearvvašvuođaeiseválddit muitalit, ahte eai leat čujuhusat dasa, ahte dávda njoammu olbmuide, muhto deattuhit hygiena dehálašvuođas dalle, go lea leamašan beatnagiin dahkamušas.

Suoma biebmobearráigeahčču ávžžuha, ahte beatnagiid ii galgga buktit Norggas Supmii iige fas doalvut Suomas Norgii. Loga eanet áššis Suoma Kennelliitto -neahtasiidduin.

Norggas suohkanválgabeaivi

Norggas lea odne suohkanválgabeaivi. NRK dieđuid mielde 2037 válgabáikki leat odne rabas. Válgaságáid oainnat NRK neahttasiidduin. Norgga suohkanválggaid gieđahallet ihtin viidát Buorre Iđit Sápmi -sáddagis.

Kulmuni guovddášbellodaga ságadoallin

Lappilaš riikabeaiáirras ja ealáhusministtar Katri Kulmuni lea válljejuvvon guovddášbellodaga ságadoallin. Áššis jienastedje lávvordaga bellodatčoahkkimis Kouvolas. Ságadoalligilvvus su lassin lei mielde riikabeaiáirras ja bealuštanministtar Antti Kaikkonen.

Kulmuni lea eret Durdnosis ja lea nuppi baji riikabeaiáirras Lappi válgabires.

Unna Junná máhccá TV:ai

Yle Sámi mánáidprográmma Unna Junná máhccá tv:ai fas otne mánnodaga. Dán čavčča oaidnit oahpes prográmmaid jagis 2017. Ovdamearkka dihtii ráiddut "Mu gákti, Kumbe-Pasi ja Säppli - säplig - sáhpán" bohtet ruovttoluotta.

Unna Junná lea oaidnimis sullii diimmu geažes, diibmu 8.30 Yle TV2 -kanálas. Prográmmaid sáhttá geahččat maid Yle Areenas.

Veaiggi rádioođđasiid sáddenáigi rievdá

Yle Sámi rádioođđasiid veaigesáddenáigái boahtá smávva nuppástus otnáža rájes. Veaiggi rádioođđasat leat gullamis juo diibmu 14.30. Iđitođđasat sáddejuvvojit diibmu 7.30 dego dábálaččat. Radioođđasiid doaimmaha beaivvi áigge okta olmmoš. Ulbmilin lea maid nannet Yle Sámi neahttaođasbarggu.

Varrasamosat: Sápmi

Váldoođđasat

Varrasamosat

Muualla Yle.fi:ssä