Sápmi |

Oanehaččat: Boazodoalu dienas unnon, Sámi válaštallanlihttu evttohit heaittihit, Paltto joatká ságadoallin, Aikio joatká ságadoallin, golgadeapmi álggii

Dá leat maŋŋebargga ođđasat oanehaččat.

Bohccot áiddis.
Boazodoalu gánnáhahttivuohta hedjonii mannan boazodoallojagis. Govva: Kirsti Länsman / Yle

Radioođđasat 04.6.2019 dbm 7.30 Jietna: Yle Areena

Boazodoalu dienas fuotnánii

Boazodoalu gánnáhahttivuohta lea binnáš hedjonan, čielgá Luondduriggodat guovddáš LUKE loguin. Bohccobiergobuvttadeami ollislaš sisaboahtu lei boazodoallojagis 2017 /2018 gaskamearalaččat váile 41 000 euro. Dat lea 3 000 euro unnit go ovddit boazodoallojagis. Stuorámus oassi boazodoalli dietnasis boahtá biergovuovdimis.

Luke dieđuid mielde boazoealáhusa golut lassánedje sakka jagis 2017-2018, birrasiid 11 proseanttain.Eandalitge fuođđariid divrun oidno loguin.

Boazodoallu ja biergobuvttadeapmi lea eanemus gánnáhahtti sámiid ruovttuguovllus, čielgá Luke loguin.

Sámi válaštallanlihttu evttohit heaittihit

Anára sámesearvi evttoha Suoma beale Sámi válaštalallanlihtu loahpaheami. Searvi mearridii jahkečoahkkimisttis ohcat Patentti- ja rekisterihallitusas SVL Suoma burgima dainna ákkain, ahte sámi servviid oktasaš válaštallansearvi ii leat doaibman nuppelogi jahkkái. Anára sámesearvvi stivralahttu Aslak-Uula Länsman dadjá, ahte miellahttosearvi sáhttá ohcat servviid oktasašdoaibmi burgima, jus dat ii leat doaibman badjel logi jahkkái.

Suoma beale SVL lea maŋimustá čoahkkanan jagis 2002, dadjá Länsman. Länsman dadjá, ahte boahtte áiggi dáfus lea álkit vuođđudit ođđa sámi válaštallandoaibmi go ealásgahttit boares searvvi, mii ii leat doaibman nuppeloh jahkkái.

Paltto joatká ságadoallin

Anára sámesearvvi ságadoallin joatká Aslak Paltto. Searvvi stivrii jahkkái 2019 válljejuvvojedje Rita Nurmenrinta, Marjaana Aikio, Aslak-Uula Länsman ja Seija Magga. Stivra várrelahttun válljejuvvojedje Nilla Jomppanen, Marko Tervaniemi ja Timo Portti. Anára sámesearvvi váldodoaimmat leat Ijahis Idja -festivála ordnen ja oassálastin sámi válaštallandoaimmaide oassálastin.

Aikio joatká ságadoallin

Vuohčulaš Pekka Aikio joatká Suoma boazosámit rs. ságadoallin. Suoma boazosámit -searvvi jahkečoahkkin válljii geassemánu álggus stivralahttun jahkkái 2019 Janne Näkkäljärvi, Saara Tervaniemi, Jouni Aikio ja Iisko-Henrik Näkkäläjärvi. Várrelahttun Per-Oula Juuso, Anne Näkkäläjärvi, Jan Henrik Saijets ja Aslak Paltto. Čállin doaibmá Ristenrauna Magga. Searvvi dehálamos doaibman jagis 2019 leat ovddidit boazodoalu doarjjaortnega ja boazodoalu sadjasašortnega viiddideapmi, muitala Ristenrauna Magga.

Golgadeapmi álggii

Árbevirolaš Deanu bivdovuohki golgadeapmi álggii ikte eahkedis čieža áigge. Dán háve besset golgadit ihtá gaskavahko čieža radjai. Nubbi oassi golgadeamis lea vel boahtte vahkus seammalahkai guokte jándora. Geahča golgadanságaid eambo otne Yle Ođđasiin fártta váili vihta tv-ovttežis.

Varrasamosat: Sápmi

Váldoođđasat

Varrasamosat

Muualla Yle.fi:ssä