Sápmi |

Oanehaččat: Boazodoarjaga ohcanáigi lea álgán, Gihttela gildii ohcet ain sámegielat árrabajásgeassima oahpaheaddji ja Njearrejávrri šalddi divvunbarggut álggahuvvojit odne

Dás leat maŋŋebárgga oanehis ođđasat.

Tietyöstä varoittava liikennemerkki
Njearrejávrri šalddi divvunbarggut soitet hehttet johtolaga. Govva: Yle

Boazodoarjaga ohcanáigi lea álgán

Boazodoalu álbmotlaš doarjaga ohcanáigi lea dál jođus. Boazodoarjaga sáhttá ohcat Lappi Ealáhus-, johtolat- ja birasguovddážis 2.9.2019 rádjai. Maŋŋonan ohcamušat eai gieđahallojuvvo.

Boazodoalu álbmotlaš doarjja ovtta ealli bohccos lea dánge jagi 28,50 euro.

Doarjaga sáhttet mieđihit lunddolaš olbmui dahje lunddolaš olbmuid borramušgoddái, geat orrot seamma sajis. Boazodoarjagis ii leat meroštallojuvvon bajimus ahkerádji.

Boazodoarjaga galgá ohcat ohcanskoviin nummir 227. Ohcanskovvi ja boazodoarjaga boađusrehketskovvi gávdnojit Borramušdoaimmahaga (su. Ruokavirasto) neahttasiidduin.

Gihttela gildii ohcet ain sámegielat árrabajásgeassima oahpaheaddji

Gihttela gielda rahpá ođđasit ohcanláhkái sámegielat árrabajásgeassima oahpaheaddji mearreáigásaš virggi áigodahkii 1.8.2019.–30.6.2020. Bargui gáibidit buori sámegiela dáiddu ja sámi kultuvrra dovdamuša.

Ohcamušaid sáhttá sáddet 22.7.2019 diibmu 12:00 rádjai, millosamosit elektrovnnalaš ohcanskovi bokte. Dutkkusduođaštusa bivdet laktit ohcamuša mielddusin.

Lassedieđuid bargui ohcamis gávnnat dáppe.

Njearrejávrri šalddi divvunbarggut álggahuvvojit odne

Njearrejávrri šalddi divvunbarggut álget odne maŋŋebárgga 9.7. Anáris. Šalddi muorraaláš ođasmahttojuvvo ja šalddi doarjjamuorat divvojuvvojit áigodagas 9.–31.7. Divvunbargguid dihte johtolahkii šaddet hehttehusat. Gaskkohagaid johtolaga fertejit bissehit.

Njearrejávrri šaldi lea sullii 17 kilomehtera ovdal Áŋŋela gili, Rivdola ja Áŋŋel geainnu gaskkas. Šalddi divvun máksá 80-duhát euro ja váldohukseheaddjin lea Suoma Eanahuksen (su. Suomen Maanrakennus).

Varrasamosat: Sápmi

Váldoođđasat

Varrasamosat

Muualla Yle.fi:ssä