Sápmi |

Oanehaččat: BuSK-loahppasemináras ovdan boazodollui guoskevaš eanageavahangažaldagat, davvisámegielat rávagirji njuoratmáná vuordimii ja dikšumii, ISFIs ja Sundance Instituhtas ođđa ovttasbargu

Dása leat čohkken disdaga oanehis ođđasiid.

Porotokka.
Govva: Risto Degerman / Yle

Dá gulat disdaga Yle Ođđasiid Sámis. Jietna: Yle Areena


BuSK-fidnu loahppasemináras ovdan oainnut eanageavaheamis

Árktalaš guovddážis Roavvenjárggas ságastallet odne 12.2. eanageavaheamis BuSK-fidnu loahppaseminára olis. Seminára lea álgán diibmu 9.00 ja bistá 17.00 rádjái.

BuSK-fidnu loahppasemináras gieđahallet earet eará boazodollui ja sápmelaččaide guoskevaš eanageavahangažaldagaid Suomas ja Ruoŧas, vuovdedoalu ja eará eanageavahanhámiid oktiiheiveheami, báikkálašdovdamuša ávkkástallama Eanodaga guovllus, ja ruvkeindustriija ja báikkálaš servoša oktavuođa Gihttelis. Semináras ordnejuvvo maiddái panelaságastallan, mas fáddan leat eanageavaheapmái laktáseaddji guovddáš gažaldagat davvi guovlluin báikkálaččaid geahččanguovllus.

BuSK-fidnu lea Luondduriggodatguovddáža dutkan- ja ovddidanfidnu, mas leat kárten olbmuid oainnuid birrasis ja eanageavaheamis.

Davvisámegielat rávagirji njuoratmáná vuordimii ja dikšumii

Davvisámegillii lea almmustuvvan rávagirji njuoratmáná vuordimii ja dikšumii. Munnuide šaddá njuoratmánná -rávagirji sisttisdoallá áigeguovdilis dieđu njuoratmáná vuordimis, riegádahttimis, njuoratmáná dikšumis ja mánnábearrašiid bálvalusain. Lassin girjjis gieđahallat vánhenvuođa, párragaskavuođa sihke máná ovdáneami ja vuorrováikkuhusa mánáin.

Dát lea ođasmahtton preanttus, ja dat lea buvttaduvvon áššedovdiid ja vánhemiid ovttasbargguin ovddit prentosiid vuođul.

Sámediggi lea leamaš mielde lasiheamen tekstii sámi bearrašiid guoskevaš kultuvrralaš áššiid ja iešvuođaid. Gihpagis leat váldon vuhtii sápmelaččaid ealáhusat, bearrašiid guokte- ja máŋggagielatvuohta sihke sámegielat bearrašiid vuoigatvuođat sámegielat bálvalusaide.

Davvisámegielat rávagirji lea dál beare neahttahámis.

Internašunála Sámi Filbmainstituhtas ja Sundance Instituhtas ođđa ovttasbargu

Internašunála Sámi Filbmainstituhta ja Sundance Instituhta leat álggahan ođđa ovttasbargu. Ovttasbarggu ulbmilin lea nannet árktalaš álgoálbmotfilmma. Sundance Instituhta álgoálbmot prográmma searvá ovttasbargoguoibmin ISFI ásahan árktalaš álgoálbmogiid filbmafondii. Sundance Instituhtta fállá vejolašvuođaid čájehit ja ovdánahttit teáhter-, filbma-, ja digitála mediabargiid buktagiid, mii šaddá ávkin árktalaš álgoálbmogiid filmma nannemis.

– Mii sávvat Sundance Instituhta buresboahtin filbmafondii. Dát ovttasbargu lea stuorra lávki árktalaš álgoálbmot filbmadahkkiide. Sundance Instituhtta lea okta deháleamos filbmaásahusain, mii lea juo álggu rájes dovddastan álgoálbmogiid ja sin čehppodaga, lohká ISFI direktevra Anne Lajla Utsi.

ISFI Direktevra Anne Lajla Utsi ja Sundance Instituhtta álgoálbmot prográmma direktevra N. Bird Runningwater almmuheigga ovttasbarggus Sámi resepšuvnnas, mii lágiduvvui bearjadaga 8.2. European Film Marketis ja 69. Berlinale-filbmafestiváliin.

Varrasamosat: Sápmi

Váldoođđasat

Varrasamosat

Muualla Yle.fi:ssä