Sápmi |

Oanehaččat: Dálkkádatstreaika 2.0, sámejoavkkus mielde sisbandy-gilvvuin, Niillas Holmberg ja Roope Mäenpää loahpahankonsearta ja europarlameantaválggat vahkuloahpas

Dá leat bearjadaga oanehis ođđasat.

Kolme nuorta mielenosoituksessa, taustalla mielenosoituskylttejä.
Nuorat miellačájeheamis Brysselis. Govva: Julien Warnand / EPA

Guldal dás bearjadatiđida Yle Ođđasiid Sámis Jietna: Yle Areena

Dálkkádatstreaika miehtá máilmmi

Nuorat miehtá máilmmi streikejit odne bearjadaga čalmmustahttindihte dálkkádatáššiid. Nuorat ordnejit dál nuppi dálkkádatstreaikka. Vuosttaš streaika lei njukčamánus.

Dálkkádatstreaikka nuoraid ovdagovva lea Greta Thunberg, guhte lea muitalan Twitteris, ahte dálkkádatstreaika ordnejuvvo 1620 báikegottis badjel 119 riikkas.

Suoma oaivegávpogis Helssegis streikejeaddjit geigejit bearjadaga ávžžuhusa boahttevaš ráđđehussii ja de čoahkkanit riikkabeaidálu ovdii.

Sisbandy-gilvvut Avvilis

Avvilis beassá dán vahkkoloahpa speallat ja geahččat sisbandy, go Suoma davimus sisbandygilvu Climax ordnejuvvo doppe. Dán jagi leat 10 jagi ávvospealut. Spealuin leat mielde oktiibuot 24 joavkku: 16 joavkku dievdduid gilvvus ja 8 joavkku nissoniid gilvvus.

Climaxis leat gilvalit maiddái sámejoavkkut. Buot joavkkuid ja spealuid áigetávvala oainnát dáppe.

Niillas Holmberg ja Roope Mäenpää loahpahankonsearta

Sámeduo Niillas Holmberg ja Roope Mäenpää loahpahankonsearta lea ihttin lávvordaga Anáris kulturguovddáš Sajosis.

Duo álggahii konsearttaid čuojaheami logi jagi dassái Anáris, ja dál maiddái loahpaha doppe.

Niillas Holmberg ja Roope Mäenpää lea almmustahttán guokte skearru Tuupa Records -skearrofitnodaga bokte. Skearru Manin guottán girjji fárus almmustuvai jagis 2011 ja Assimilašuvdna blues fas jagis 2014.

Europarlameantaválggat vahkuloahpas

Boahtte sotnabeaivve 26.5 lea europarlameantaválggaid virggálaš válgabeaivi.

Europarlameantaválggain válljejuvvojit Suoma ovddasteaddjit Eurohpa parlamentii. Suomas válljejuvvo 13 ovddasteaddji europarlameantaválggain, muhto lohku sáhttá loktanit 14 ovddasteaddjái. Dasa váikkuha Británnia earru Eurohpás, nappo Brexit. Jus dahje dego Britannia earrána Eurohpas de okta várresadjái báhcán evttohas loktana Eurohpa parlamentii, ja Suoma ovddasteaddjimearri lea 14.

Eurohpa parlameanttas leat dál oktiibuot 751 ovddasteaddji.

Válggaid ovdajienasteapmi nogai disdaga 21.5 ja dál olles Suoma jienastanproseanta lea 21,2. Sámeguovllu gielddain jienastanproseanttat leat Eanodagas 25 proseantta, Anáris 25 proseantta, Ohcejogas 28,6 proseantta ja Soađegilis 21,4 proseantta.

Europarlameantaválggain lea vejolaš jienastit vel válgabeaivve, sotnabeaivve 26.5. Jienastanbáikkit leat rabas diibmu 9–20. Dáppe gávnnat buot jienastanbáikkiid.

Varrasamosat: Sápmi

Váldoođđasat

Varrasamosat

Muualla Yle.fi:ssä