Sápmi |

Oanehaččat: Eai pláne šat elfápmolinjá bieggamillopárkkas Supmii, ohcejohkalaččat jienastišgohte viššalit euroválggain ja olbmuin bivdet evttohusaid 10 000 euro geavaheames Anáris

Dá leat duorastaga oanehis ođđasat.

Ylikkälän sähköasema.
Grenselandet AS ii áiggo šat ovddidit 400 kilovoltta elfápmolinnjá huksema Rástegáissá davábealde Supmii. Govva: Fingrid

Dá gulat duorastaga Yle Ođđasiid Sámis. Jietna: Yle Areena

Eai pláne šat elfápmolinjá bieggamillopárkkas Supmii

Fitnodat, mii lea plánemin bieggamillopárkka Davvi-Norgii, lea heaittihan plánaidis hukset elfápmolinjá bieggamillopárkkas Supmii.

Grenselandet AS lea plánemin bieggamillopárkka Deanu gildii Rástegáissá davábeallái. Dán oktavuođas leamašan áigumuš maiddái hukset elfápmolinjá Ohcejoga bokte máttás Supmii.

Dál fitnodat lea heaittihan dán plána. Sii áigot baicce laktit bieggamillopárkka Statnet elfápmolinnjái, mii huksejuvvo Norgga beallái, dadjá Grenselandet AS jođiheaddji Harald Dirdal. Áššis muitala NRK Sápmi.

Ohcejohkalaččat jienastišgohte viššalit euroválggain

Gaskavahku álgán euroválggaid ovdajienasteames leat Davvi-Suomas addán juo badjel 5 000 jiena. Vuosttas ovdajienastanbeaivvi maŋŋá Lappi eanagottis jienastanproseanta lea 3,8.

Viššalamosit jienastedje Ohcejogas, gos jienastanproseanta lea juo 7,9. Maiddái Anáris ja Eanodagas jienastedje vuosttas ovdajienastanbeaivve viššalabbot go Lappi eanagottis gaskamearalaččat.

GieldaJienasteaddjit 15.5.2019Jienastanproseanta 15.5.2019
Anár2784,8
Eanodat744,8
Ohcejohka777,9
Soađegilli2223,2

Ovdajienasteapmi bistá boahtte maŋŋebárgga rádjai ja virggálaš válgabeaivi lea sotnabeaivve 26.5.

Olbmuin bivdet evttohusaid 10 000 euro geavaheames Anáris

Anára gielda bivdá gieldda olbmuin evttohusaid das, masa galggašii bidjat 10 000 euro gieldda bušeahtas. Jurddan lea geahččalit, mo doaibmá dat, ahte gieldda olbmuid váldet fárrui bušeahta plánemii.

Gielda sávvá olbmuin konkrehtalaš ja bures ákkastallojuvvon evttohusaid, nu ahte golut leat muhtin muddui rehkenastojuvvon. Gieldda olbmuid lassin evttohusaid bivdet nuoraidráđis, lámisolbmuid ráđis ja boarrásiidráđis.

Evttohusaid sáhttá sáddet boastta dahje šleađgaboastta bokte geassemánu loahpa rádjai. Anára gielddaráđđehus vállje buoremus evttohusaid ollašuhttimii.

Viäskoonjargâ hámmana leat ordnen ođđasit

Viäskoonjargâ hámmanii leat dahkan nuppástusaid. Fanasbáikkiid leat ordnen ođđasit ja báikkiid leat maiddái lasihan. Danin jagis 2019 fanasbáikkit leat rievdan buot hámmanšaldiin.

Anára gielda bivdá fanasbáikkiid hálddašeaddjiid dárkkistit báikkiset ja váldit vuhtii ođđa ortnega.

Varrasamosat: Sápmi

Váldoođđasat

Varrasamosat

Muualla Yle.fi:ssä