Sápmi |

Oanehaččat: Eanaloddebivdu lea álgán, Lappi gielddain válmmašvuođahárjehus, Gáregasnjárgga ođđa skuvlla huksenbarggut johtui dán vahkkus ja ealgaboaru leavvá

Dá leat disdaga oanehis ođđasat.

Metso on Suomen metsäkanalinnuista suurin.
Eanalottiid bivdu lea álgán. Vuorkágovva. Govva: Esko Kitula / Yle

Guldal dás Yle Ođđasat Sápmi 10.9.2019 Jietna: Yle Areena

Eanaloddebivdu lea álgán

Eanaloddebivdu lea álgán odne disdaga. Suoma fuođđoguovddáža mielde loddenálit leat bisson stáđisin dahje juobe buorránan, earret rievssatnálli. Eanalottiin girona lea lohpi bivdit dušše Eanodagas, Anáris ja Ohcejogas.

Sámeguovllus Eanodagas, Anáris ja Ohcejogas lea lohpi bivdit čuvčča, hurri, bakku, rievssaha ja girona. Soađegilis fas lea lohpi bivdit čuvčča, hurri, bakku ja rievssaha.

Dárkilut bivdoáiggiid oainnat dáppe.

Lappi gielddain Lappi 19 -válmmasvuođahárjehus

Lappi Guovlohálddahusdoaimmahat AVI ordne odne disdaga ja ihttin gaskavahku buot Lappi gielddaide Lappi 19 -válmmašvuođahárjehusa.

Hárjehusa ulbmilin lea buoridit gielddaid ja eiseválddiid doaibmanávccaid dakkár dilis gos ovdamearka dihte elrávnnji juohkimis, diehtojohtolagas ja čáhcejuohkimis leat guhkes hehttehusat. Dan lassin ulbmilin lea buoridit gielddaid ja eiseválddiid evakuerenrahkáneami ja buoridit kriisadiehtojuohkinmáhtu.

Lappi Guovlohálddahusdoaimmahat ordne válmmašvuođahárjehusa ovttasbarggus Pelastusopistoin, Lappi gádjunlágádusain, Jeagárprikáhtain ja Suoma ruksesruossa Lappi biriin.

Gáregasnjárgga ođđa skuvlla huksenbarggut álget

Gáregasnjárgga ođđa máŋggadoaimmaskuvlla vuođđobarggut álget dán vahkkus ja huksenbarggut vel dán mánus. Áššis muitala Lehto Group masa gulli Lehto Tilat hukse ođđa máŋggadoaimmaskuvlla.

Máŋggadoaimmaskuvla gárvána Gáregasnjárgii borgemánus 2020.

Ohcejoga gielddas Gáregasnjárgga skuvlla lassin maiddái Ohcejohnjálbmái ja Njuorggámii huksejit ođđa skuvllaid. Ohcejohnjálbmái leat jo hukseme ođđa skuvlaguovddáža ja dat galggašii gárvánit maŋemuštá boahtte čakčii.

Ealgaboaru dihtton Roavvenjárgga rájes

Ealgaboaru orro leavvan juo oalle viidát Lappi eanangotti máttaosiide. Dat leat dihtton áŋke Tervola ja Roavvenjárgga rájes. Vihtta jagi dassái ealgaboaru dihttui dušše Keminmaa guovllus. Báikkuid ealgaboarut leat juo viehka valjis Lappi eanangotti máttaosiin.

Varrasamosat: Sápmi

Váldoođđasat

Varrasamosat

Muualla Yle.fi:ssä