Sápmi |

Oanehaččat: FA Sápmi dáhpii vuosttas spealus, luossabivdu álggii, ráđđehusprográmma almmustahtto ja Wimme Etno soi! -dáhpáhussii

Dás leat vuossárgga oanehis ođđasat.

Conifa Euro 2019
FA Sápmi speallá Conifa Euro 2019 -spealuin. Govva: FA Sápmi

Guldal dás vuossáriđida Yle Ođđasiid Sámis. Jietna: Yle Areena.

Sápmi dáhpii vuosttas spealus Conifa Euro Cup 2019

Sámi dievdduid spábbačiekčanjoavku FA Sápmi lea čiekčan vuosttas spealus vehádatálbmogiid Conifa Euro Cup 2019 spealuin sotnabeaivve. Sámi riikkajoavku dáhpii Armenia Artsakh jovkui 3–2.

Sámi spábbačiekčanriikkajoavkkus leat mielde speallit Suoma, Ruoŧa ja Norgga Sámis. Sotnabeaivve spealus joavkkus ledje čiekčamin Joona Lahdenmäki, Jarkko Lahdenmäki, Jari Barsk, Jirijoonas Kanth, Benjamin Zackrisson, Samuli Laitila, Rickard Ellingsen, John Mathias Haetta Gaup, Mikael Jannok, Sten Arne Mannsverk ja molafáktan lei Anton Sarri.

Sotnabeaivvi spealus Sámi joavkku moladahkkit leigga Benjamin Zackrisson ja Kristoffer Edvardsen, muitala FA Sápmi Facebook-siiddustis.

Conifa Euro Cup 2019 ordnejuvvo dán vuoro Artsakhis dahjege Nagorno-Karabakhis Azerbaijani-Armenia rádjeguovllus.

Eanet dieđuid Conifa Euro Cup 2019 birra sáhtát lohkat dáppe. Spealuid sáhttá geahččat neahtas njuolggosáttan dáppe.

Luossabivdu álggii Deanus

Báikkálaš olbmuid stággobivdobadji Deanus lea álgán. Báikki olbmot leat geassemánu vuosttas beaivvi rájes ožžon bivdit stákkuin Deanus. Báikki olbmuid stággobivdobadji bistá gitta borgemánu 20. beaivvi rádjai.

Olgobáikegoddelaččaid dahjege turisttaid guolástanbadji Deanus álgá geassemánu 10. beaivve. Turisttaid guollebivdobadji bistá borgemánu 10. beaivvi rádjái.

Deanu čázádagas lea maid fámus vahkkosaš ráfáiduhttináigi, mii lea álot sotnabeaivve eahkes čieža gitta vuossárgga eahkeda čieža rádjái.

Suomas almmustahttet vuossárgga ráđđehusprográmma

Suoma ráđđehusprográmma almmustahttet otne. Ráđđehusráđđádallamiid jođiheaddji, sosiálademokráhtaid Antti Rinne almmuhii ikte Twitteris, ahte ráđđehusprográmma lea gárvvis ja ministerjuohku lea dahkkojuvvon. Ođasdoaimmahat STT dieđuid mielde čuovvovaš ráđđehusas leat 19 ministera viđa sierra bellodagas.

Ráđđehusprográmma ja ministerjuogus muitalit otne dieđihandilálašvuođas diibmu 10.30. Yle sádde dieđihandilálašvuođa njuolggosáttan TV1 kanálas ja Yle Areenas diibmu 10.15 rájes.

Wimme Etno soi! 2019 -dáhpáhussii

Juoigi ja musihkkár Wimme Saari lea mielde Etno soi! 2019 riikkaidgaskasaš álbmotmusihkkadáhpáhusas Helssegis boahtte čavčča.

Koiton Laulu ja Wimme dollet konseartta, mas ovttastis ráfi- ja bargiidlávlagiid luohtái. Koiton Laulu ja Wimme konsearta lea skábmamánu 5. beaivve.

Varrasamosat: Sápmi

Váldoođđasat

Varrasamosat

Muualla Yle.fi:ssä