Sápmi |

Oanehaččat: Fjällgren njealját Melodifestivalenis, Trudeau atnu ándagassii inuihtain, Soađegilli bálkáha vloggejeaddji ja Vuohču boares dearvvasvuođadálu evttohit vuot burgit

Dá leat vuossárgga oanehis ođđasat.

Jon-Henrik Fjällgren Melodifestivalenin finaalissa 2019
Jon Henrik Fjällgren lei njealjádin lávvardaga dollojuvvon Melodifestivalen-gilvvus Govva: Stina Stjernkvist / SVT

Guldal dás vuossárgga Yle Ođđasiid Sámis. Jietna: Yle Areena

Fjällgren njealját Melodifestivalenis – Ii beasa Eurovision-gilvui

Ruoŧa beale sápmelaš Jon Henrik Fjällgren lei njealjádin lávvardaga dollojuvvon Melodifestivalen-gilvvus, mas válljejedje Ruoŧa ovddasteaddji Eurovision-musihkkagilvui. Gilvvu vuittii John Lundvik lávlagiinnis Too Late For Love ja Lundvik ovddastage Ruoŧa Eurovision-musihkkagilvvus Israelis miessemánus. Lundvik oaččui eanemus jienaid sihke álbmogis ja riikkaidgaskasaš duopmáriin.

Dát lei goalmmát geardi go Jon Henrik Fjällgren fikkai beassat mielde Eurovision-musihkkagilvui. Vuosttas geardde son válddii oasi Melodifestivalenii jagi 2015 ja nuppi geardde jagi 2016.

Fjällgren muitala Sámeradion & SVT Sápmái, ahte sáhttá vel boahttevuođas oassálastit gilvui, muhto boahtte jagi son ii áiggo dan goittot dahkat.

NRK ja CBC: Trudeau atnu ándagassii inuihtain

Kanada stáhtaministtar Justin Trudeau šálloša mo eiseválddit leat láhtten inuihtaid vuostá 1940-logus - 60-lohkui, go tuberkulosa dávda leavai Davvi Kanádas. Trudeau gohčoda dalá politihka kolonistapolitihkkan. Áššis muitalit NRK ja kanadalaš CBC.

Soađegili gielda bálkáha vloggejeaddji vuovdalit gieldda

Soađegilis áigot bálkáhit vloggejeaddji vuovdalit gieldda. Vloggejeaddji bálkáheamis mearriduvvui gieskat gielddaráđđehusa čoahkkimis.

Vloggejeaddji bargun lea oktii vahkus ráhkadit iežas sosiála media kanálaide vuovdalanvideo Soađegilis ja sutnje máksojuvvo dán barggus sullii 30 000 euro jahkái. Videoid sisdoallu plánejuvvo ovttas Soađegili gieldda gulahallanjoavkkuin.

Gielddaráđđehusas lea juo dieđus vloggejeaddji, muhto dat ii hálit muitalit, ahte geas lea sáhka. Gielddaráđđehus goittotge čilge, ahte fálaldaga addán vloggejeaddji kanálaid čuvvot sullii 70 000 olbmo.

Áššis muitalii vuosttasin Sompio-bláđđi.

Vuohču boares dearvvasvuođadálu evttohit vuot burgit

Soađegili gielddaráđđehussii leat evttohan Vuohču boares dearvvasvuođa dálu burgima. Áššis lea dahkkojuvvon álgga gieldda váldostivrii golggotmánus 2018. Álgaga dahkkit oaivvildit, ahte Vuohču boares dearvvasvuođadállu lea heajos ortnegis ja dat lea fasti oaidnit. Álgaga dahkkit gáibidit, ahte gielda gaikkošii vistti.

Soađegili gildii leat maid jagis 2011 evttohan Vuohču boares dearvvasvuođadálu burgima. Dállu lea priváhta oamastusas ja viessoeaiggáda leat ávžžuhan ordnet dálu birrasa, muhto miige ii leat áššis dáhpáhuvvan.

Soađegili gielddaráđđehus gieđahallá dán vahkus Vuohču dearvvasvuođadálu dili.

Varrasamosat: Sápmi

Váldoođđasat

Varrasamosat

Muualla Yle.fi:ssä