Sápmi |

Oanehaččat: Galledeaddjidutkamuš álgán Gilbbesjávrri guovllus, Sámi allaskuvlla rektorválga lahkona, dutkanprošeavttas guorahallet mánáid giela ja jurddašeami, allaskuvllaid oktasašohcan álgá

Dá leat gaskavahku oanehis ođđasat.

Landskap i Kilpisjärvi i Lappland den 11 september 2016.
Gilbbesjávrri birrasis ja Háldi guovllus dahkko galledeaddjidutkamuš. Govva: All Over Press / Ismo Pekkarinen

Guldal dás gaskavahkuiđida Yle Ođđasiid Sámis.

Galledeaddjidutkamuš álgán Gilbbesjávrri guovllus

Meahciráđđehus dahká Gilbbesjávrri birrasis ja Háldi meahcceguovllus galledeaddjidutkamuša. Seamma áigge dahkko galledeaddjidutkamuš maiddái Norgga bealde Háldi guovllus.

Dutkamušas ožžot dieđu earret eará das, masa guovllus galledan turisttat ja vánddardeaddjit geavahit ruđa, makkárin sii árvvoštallet guovllu bálvalusaid, maid sii dahket guovllus ja vásihitgo sii buresbirgejumiset badjánit galledeami dihtii.

Bohtosat veahkehit Meahciráđđehusa ovddidit luondduturismma bálvalusaid suvdilit sihke suodjalit luonddu- ja kulturárvvuid. Buoret diehtu gallededdjiin veahkeha maiddái heivehit oktii guovllu árbevirolaš eanageavaheami ja lassánan turismma. Galledeaddjidutkamuša bohtosat leat gieldda, turismafitnodatdolliid ja guovllu eará doibmiid ávkkástallamis.

Giđđasesoŋŋa dutkan lea jo álgán ja dat bistá miessemánu álgui. Maiddái geasse- ja čakčasesoŋŋa áigge dahket dutkamuša.

Sámi allaskuvlla rektorválga lahkona

Sámi allaskuvlii lea njukčamánu 16. beaivvi áigemeari rádjái boahtán okta rektorevttohas ja okta várrerektorevttohas. Rektorevttohas lea Laila Susanne Vars, geas lea doavttergráda juridihkas. Várrerektorevttohas lea Ylva Jannok Nutti, geas lea doavttergráda pedagogihkas.

Rektor ja várrerektor válljejuvvojit válggaiguin cuoŋománu 10. beaivve. Válggat čađahuvvojit, vaikko leage dušše okta evttohas goappáge doibmii.

Dutkanprošeavttas guorahallet mánáid giela ja jurddašeami

Sámi allaskuvla lea álggahan dutkanprošeavtta mánáid giela ja jurddašeami birra. Sámi allaskuvlla dutkit áigot guorahallat, makkár oktavuohta lea mánáid giellageavaheamis ja ehtalaš jurddašeamis. Ulbmil lea čielggadit, mot mánáidgárde- ja skuvlamánát dulkojit ja árvvoštallet iešguđetlágan ehtalaš gažaldagaid, ja dasto guorahallat, mot dát árvvoštallan boahtá ovdan mánáid gielas.

Prošeakta galgá addit lassidieđuid mánáid giellaoččodeamis ja das, mot mánáidgárddis ja skuvllas sáhttá ehtalaš áššiid birra ságastallat mánáiguin, dadjá prošeaktajođiheaddji Johanna Johansen Ijäs.

Prošeakta bistá golbma jagi, ja dan ruhtada Norgga dutkanráđđi.

Universitehtaid ja ámmátallaskuvllaid oktasašohcan álgá

Giđa oktasašohcan universitehtaide ja ámmátallaskuvllaide álgá otne gaskavahku 20.3. Ohcanáigi nohká 3.4. diibmu 15.00.

Válljejumiin almmuhit ohcciide maŋimustá geassemánu 28. beaivve.

Oktasašohcan ordnejuvvo guokte geardde jagis, giđđat ja čakčat.

Varrasamosat: Sápmi

Váldoođđasat

Varrasamosat

Muualla Yle.fi:ssä