Sápmi |

Oanehaččat: Giellagáldui bargit, fágabeaivi bonjusámiid dilis, álgoálbmotgielaid jahki ja meänkieli oaččui sálbmagirjji

Dán artihkkalii leat čohkken gaskavahku oanehis ođđasiid.

Jietna: Giellagáldu,
Jietna
Giellagáldui ohcet bargiid. Doaibma álgá, jus ruhtadeapmi ordnašuvvá. Guldal dás Yle Ođđasiid Sámis. Jietna: Yle Areena. Govva: Šearbmagovva Giellagáldu-neahttasiiddus

Giellagáldui ohcet bargiid

Sámediggi joatká Giellagáldu doaimma boahtte jagi, jus oažžu dasa ruhtadeami.

Giellagáldu vuollásaš giellagáhttemii ja eará giela ovddidanbargguide ohcet dál mearreáigásaš giellabargiid. Giellagáldu doaimmaide ohcet anáraš-, davvi- ja nuortalašgielat giellabargiid.

Giellabargi bargguide gullet giellagáhtten, giela ovddideapmi, terminologiijabargu, norbmeren ja diehtojuohkin- ja rávvenbargu. Giellabargái sáhttet mearridit maiddái eará doaimmaid, mat gullet Davviriikkaid oktasaš sámegielaid fága- ja resursaguovddáža bargguide.

Bargguid devdet jagi 2019 álggus jus ruhtadeapmi ordnašuvvá, dieđiha Sámediggi.

Fágabeaivi bonjusámiid vásihusain sámi servodagas

Norgga Sámediggi háliida rahpat sámi servodaga dohkkehit ja gierdat eará seksuála sojuid ja sohkabealleidentitehtaid. Ášši čalmmustahttet fágabeivviin, mas fokuserejit bonjusámiid vásihusaide ja mentála dearvvasvuhtii. Fágabeaivi ordnejuvvo otne gaskavahko 28. beaivve diibmu 9:00 rájes Sámedikkis Kárašjogas.

Dáppe gávnnat fágabeaivvi prográmma.

Lappi universitehta čalmmustahttá sámegielaid jagis 2019

Lappi universitehta oassálastá UNESCO ja ON:aid organiseren álgoálbmotgielaid jagi ávvojahkái čalmmustahttimiin sámegielaid. Álgoálbmotgielaid ávvojahki lea 2019 ja dan ulbmil lea ovddidit ja čalmmustahttit álgoálbmogiid gielaid dili.

Ávvojagi gudnin Lappi universitehta šaddadandiehtagiid dieđagoddi ordne ovttas eará doibmiiguin dáhpáhusaid, mat laktásit sámegielaide. Lappi universitehta eamiálbmogiid gielaid ávvojagi dáhpáhusaid lea ulbmil ordnet ovttas earet eará riikkaidgaskasaš UNESCO UNITWIN - ja UArctic-fierpmádagaiguin, dieđiha Lappi universitehta šaddadandiehtagiid dieđagoddi.

Meänkieli oaččui sálbmagirjji

Ruoŧa girku lea ráhkadan sálbmagirjji meänkieli hálliide. Sálbmagirjjis leat oktiibuot 120 sálmma ja dat almmustahttojuvvo sotnabeaivve Ruoŧa beale Bájilis.

Sálmmat leat jorgaluvvon Ruoŧa sálbmagirjjis. Sálmmaid oktan jorgaleaddjin lea Bengt Pohjanen, guhte leat ovdal jorgalan earet eará evangeliumaid meänkieli-gillii. Sálbmagirjji jorgalanbargu bisttii gávcci jagi ja dan áigot geavahišgoahtit ipmilbálvalusain. Girjji almmustahttindilálašvuohta lea Bájilis Korpilombolo girkus juovlamánu 2. beaivvi Ruoŧa áigge diibmu 14:00.

Loga dáppe ášši birra suomagillii.

Varrasamosat: Sápmi

Váldoođđasat

Varrasamosat