Sápmi |

Oanehaččat: Girkohearrá gilddii Wimme konseartta girkus, unna girdi bártidii Anáris, NASA rakeahtaid čuovggat oidnojedje Sámis, almmái duššai mohtorgielkábárttis Muonás ja Kaamos-ráidu ii vealttekeahttá gárván

Dá leat vuossárgga oanehis ođđasat.

YLE/Vesa Toppari
Wimme Saari galggai loaiddastit ovttas Tapani Rinnein Sippola girkus oassin etnofuturisttalaš dáiddadáhpáhusa, Sippugri.

Guldal dás vuossárgga Yle Ođđasiid Sámis. Jietna: Yle Areena

Girkohearrá ii hálit Wimme ja Rinne loaiddastit Sippola girkui

Mátta-Suomas Anjalankoski girkohearrá lea gieldán sámemusihkkár Wimme Saari ja Tapani Rinne loaiddasteames Sippola girkus. Girkohearrá Eija Murto oaivvilda, ahte Wimme Saari ja Tapani Rinne musihkka ii heive girkui, daningo dat ii heive oktii Ipmila sániin. Minna Raskinen, guhte lea mielde konseartta lágideamis, imaštallá mearrádusa, daningo konsearttas leat mielde maiddái sálmmat. Áššis muitalii lávvardaga Kouvolan Sanomat -aviisa.

Sotnabeaivve girkohearrá Eija Murto kommenterii Helsingin Sanomat -aviisii, ahte sii galget árvvoštallat mearrádusa ođđasit.

Wimme Saari ja Tapani Rinne galggaiga loaiddastit Sippola girkus Kouvola guovllus geassemánu 26. beaivve.

Divvojuvvon 11.4.2019 dii 6:51: Sippola girkohearrá divvojuvvon Anjalankoski girkohearrán.

Unna girdimášen bártidii Anáris

Unna girdimášen bártidii Anáris sotnabeaivve veaigin. Gohcci buollinmeaštára dieđuid mielde girdi seaivun šattai menddo guhkkin.

Girdis ledje guokte olbmo, muhto goabbáge ii lápmašuvvan lihkohisvuođas. Gádjunlágádus fidnii dieđu bárttis Anára Muotkeduoddara guovllus, Bealdojávrris, sotnabeaivve golmma áigge.

Loga lasi áššis suomagillii dáppe.

Sámi almmis leat oidnon erenoamáš čuovgaspáppat

Bearjadaga ja lávvardaga gaskasaš ija Davvi-Suoma ja Sámi almmis leat oidnon erenoamáš čuovgaspáppat. Nástedutkiid searvi Ursa nástejoavku Zeniitti dieđuid mielde dát erenoamáš čuovggat leat šaddan USA gomuvuođaeiseváldi NASA dutkanrakeahtaid báhčimiin.

Dutkanrakeahtaid ledje báhčán Norgga Andøyas, muhto daid sáhtii áicat maiddái Suoma bealde. Ursa Taivaanvahti-bálvalussii čuovggain leat almmuhan aŋkke Anáris, Eanodagas, Gihttelis ja Kolaris.

Báhčimiin NASA figgá dutkat earret eará guovssahasaid ja gomuvuođadálkki váikkuhusaid.

Áššis muitalii vuosttamužžan MTV.

Tältä näytti Nasan tutkimusrakettien ammunnoista syntynyt valoilmiö Norjan Kautokeinossa.
Dákkárat ledje NASA dutkanrakeahtaid báhčimiin šaddan čuovgaspáppat Guovdageainnu almmis. Govva: Uula-Petteri Somby

Almmái duššai mohtorgielkábárttis Muonás

Almmái duššai mohtorgielkábárttis Muonás lávvardateahkedis. Bolesa dieđuid mielde muonálaš almmái gahčai gielkká alde ja bázii dan vuollái. Almmái lei jođus okto ja jámii bárttis šaddan váttuide.

Kaamos-ráidu ii vealttekeahttá gárván

Ohcejogas dálvit govvejuvvon Kaamos-ráidu ii vealttekeahttá gárván ruhtaváttisvuođaid dihte. Ráiddu govvemat Helssegis šluhttejuvvojedje eaige buvttadeaddjit leat bastán máksit buot bálkkáid. Buvttadanfitnodagas leat šaddan maiddái eará vealggit govvemiid áigge.

Ráiddu vuosttas oasit galge gárvánit juo cuoŋománus. Buvttadeaddji Markos Annala dadjá, ahte váttisvuođat šadde, go okta olgoriikalaš ruhtadeaddji geassádii ráiddus go govvemat ledje juo álgán. Annalas lea goit ain jáhkku, ahte ráidu gárvána, jos ruhta gávdno.

Áššis muitala Suomen Kuvalehti.

Varrasamosat: Sápmi

Váldoođđasat

Varrasamosat

Muualla Yle.fi:ssä