Sápmi |

Oanehaččat: Guluboaldit barggahit gádjunlágádusa, Gáregasnjárgga mánggadoaimmadálu huksen áraduvvo, Gilbbesjávrri čáhci, Tuikki-bláđđi njealje gillii, maŋimus ovdajienastanbeaivi europarlameantaválggain ja Väyläfestivála čohkke dáiddáriid

Dá leat disdaga oanehis ođđasat.

Kulopalo leviää kuivassa nurmikossa ja ilma on täynnä savua
Govva: Vesa Vaarama / Yle

Guldal dás disdatiđida Yle Ođđasiid Sámis Jietna: Yle Areena

Gáregasnjárgga máŋggadoaimmadálu plánen ja huksen áraduvvo

Ohcejohka árada Gáregasnjárgga máŋggadoaimmadálu plánema ja huksema álggaheami.

Ohcejoga gieldda váldostivra dohkkehii gielddaráđđehusa evttohusa man mielde investerenprográmmas boahtte jahkái evttohuvvon 675 000 euro sirdojuvvo dán jahkái ja seamma láhkái jahkái 2021 várrejuvvon mearreruhta áraduvvo boahtte jahkái.

Sitnobuollinvárra stuorra oasis Lappi

Gulu ja ruskkaid boaldimis vuolgán meahccebuollimat leat barggahan gádjunlágádusa Lappis. Dušše beare mánnodaga Lappis buollájedje njealji sajis.

– Gánneha smiehttat, leago gulu boaldin dárbbašlaš ja man olu das lea ávki. Jus ii leat heivvolaš dálkki gulu boaldimii, nu ii gánnet váldit dušši riskkaid, rávve ráhkkananhoavda Ari Soppela.

Stuorra oasis Lappi lea dál sitnobuollinvárra (su. ruohikkopalovaara). Goike eatnamis buollin leavvána jođánit ja dan lea váttis hálddašit.

– Ovdamearkka dihte ruskkaid sáhttet boaldit jurddatkeahttá láhka meahcci, gos buollin sáhttá álkit leavvánit, lohká Soppela.

Gilbbesjávrris gártet ain vuoššat juhkančázi

Gilbbesjávrris galget vuoššat juhkančázi. Čázi vuoššan ávžžuhus leamašan fámus jo miessemánu 2. beaivve rájes, go čáziváldinbáikki ovtta gáivvos gávdne koli- dahjege baikabaktearat.

Gilbbesjávrri máttaoasi čáhcefierpmádahkii leat ge luoitán klora jo lagabui golbma vahkku. Mannan vahkku mihtidemiin čájánasain gávdne vel ovtta čájánasas koliformalaš baktearaid ja danne čázi ferte ain Gilbbesjávrris vuoššat.

Eanodaga čáhcefuolahus fitnodaga mielde muohttaga suddan ja dulve čázit leat sáhttán váikkuhit gáivočáhcái. Mannan vahkkus gávdne ovtta rabas bodnečáhcebohcci, man bokte dulvečázit leat sáhttán duolvvidit juhkančázi.

Ráinnas juhkančázi gilbbesjávrelaččat sáhttet viežžat Gilbbesjávrri buollinčaskkadan stašuvnna ja Neste bensenstašuvnna čázi juohkin báikkiin.

Badje-Lappi guolástanbláđđi almmustahtton njeallje gillii

Meahciráđđehus lea almmustahttán Badje-Lappi guolástanbláđđi Tuikki vuosttaš geardde njeallje gillii. Spesiálanummaris lea sisdoallu suomagiela lassin davvisáme-, nuortalaš- ja anárašgillii.

Tuikki vuosttas spesiálanummiris muitaluvvo, makkár guolástanlobiid aiddo Ohcejohkii, Anárii ja Eanodahkii oažžu boahttevuođas, go riikkabeaivvit nuppástuhtii guolástanlága.

Bláđđi sisttisdoallá reportášaid guollebivddus Sámis, muhto guovddáš sisdoallu gieđahallá lohpeođastusa.

– Háliideimmet, ahte ođđa diehtu lobiin livččii dál oažžumis iežas eatnigillii davvin nu máŋgasii go vejolaš. Dán jagi lea maiddái eamiálbmogiid gielaid jahki, muitala Tuikki váldodoaimmaheaddji Aku Ahlholm Meahciráđđehusas.

Maŋimus beaivi jienastit ovddalgihtii europarlameantaválggain

Odne 21.5. lea maŋimus beaivi jienastit ovddalgihtii europarlameantaválggain. Ovdajienasteapmi álggii mannan gaskavahku, miessemánu 15. beaivve. Mánnodat eahkedis Lappi guovllus jienastanproseanta lei 17,3.

Virggálaš válgabeaivi lea sotnabeaivve miessemánu 26. beaivve.

Väyläfestivála čohkke dáiddáriid Durtnosleahkái

Väyläfestivála čohkke dáiddáriid miehtá davviriikkaid Durtnosjohkaleahkái geasse-suoidnemánu molsumis. Väyläfestivála álgá Badje-Durtnosis geassemánu 27. beaivve ja beannot vahkkus festivála johttá Duortnosjohkaleagi bajás sihke Suoma ja Ruoŧa bealde ja de vel gitta Ivgobáhtii Norgga beallái.

Mielde festiválas leaba maiddái sámi dáiddárguovttos Inger-Mari Aikio ja Annukka Hirvasvuopio-Laiti. Soai galgaba guoimmuhit Ivgobađas Lásságámmis. Aikio lohká dilálašvuođas sihke Áillohačča ahte maiddái iežas divttaid. Hirvasvuopio-Laiti fas galgá juoigat Áillohačča almmustahttán luđiid.

Musihkka lassin dán jagi festivála temán lea maiddái girjjálašvuohta. Inger-Mari Aikio lassin mielde festiválas leat Rosa Liksom ja Bengt Pohjanen. Väyläfestivála ordnejuvvo dán geasi goalmmát geardde.

21.2.2019 diibmu 11:36: Lasihuvvon ođđasat Gilbbesjávrri čázis ja Väyläfestiválas.

Varrasamosat: Sápmi

Váldoođđasat

Varrasamosat

Muualla Yle.fi:ssä