Sápmi |

Oanehaččat: Guolástuslága gieđahallan álgá, eai lassidieđut biilabárttis, muohtauđasbárttis duššan olbmuid namat almmuhuvvon, skuvlakino bokte sámefilmmat skuvllaide

Loga dás maŋŋebargga oanehis ođđasiid.

Riikkabeivviin álgá guolástuslága gieđahallan. Guldal dás maŋŋebargga Yle Ođđasiid Sámis d.7.30. Jietna: Yle Areena Govva: Yle

Guolástuslága gieđahallan álgá riikkabeivviin

Riikkabeivviin álgá otne maŋŋebárgga guolástuslága nuppástusa gieđahallan. Erenomážit nuppástusat guoskkahit guolástuslága logát paragráfa, mas meroštallet earret eará guolásteami sámeguovllu stuorra siidojogain, main ellet luosasogat guolit.

Dákkár stuorra siidojogat leat earret eará Juvdu Anáris ja Deanu stuorámus siidojohka Ohcejohka. Ulbmilin lea buoridit guovllu olbmuid guolástusrivttiid nu gohčoduvvon stáhta čáziid alde.

Eanan- ja meahccedoalloministeriija evttohusa mielde Anára, Eanodaga ja Ohcejoga gielddaid olbmuin livčče vejolaš lotnut guollebivdolobi olles geassái.

Ođđa áššin lea, ahte lobihis guoli bivdimis šaddá máksit buhtadusa stáhtii. Riikkabeivviid ollesčoahkkin álgá diibmu 14.00 ja ášši ságastallet vuosttamužžan. Ulbmilin lea, ahte láhka livčče fámus miessemánu álggus.

Eai vel lassidieđut biilabárttis

Boles ii vel leat addán lassidieđuid vuossárgga Kakslauttanen turistenguovllu máttabealde dáhpáhuvvan vearrás biilabárttis, mas dušše guokte olbmo Ruoššas. Bárti dáhpáhuvai, go uhca biila vulggii tráilera meattá, muhto seammás bođii nubbi tráiler ovddal. Uhca biila beaškalii fárttain ovddal boahtán tráilera njeaiga.

Jáhkimis uhcabiilla vuoddji jámii dalán ja nu maid maŋŋebeaŋkkas čohkán 3-jahkásaš mánná. Biillas ledje vel golbma eará olbmo ja sis guovttis lápmašuvve vearrát.

Uđđasis duššan olbmuid namat almmuhuvvon

Norgga boles lea almmustahttán muohtauđđasis duššan golmma suopmelaš albmá ja ovtta ruoŧŧelaš nissona namaid ja govaid. Oapmahaččat leat addán lobi dieđuid almmustahttimii.

Sarregáissá uđasbárttis dušše 29-jahkásaš Mikael Sten, 32-jahkásaš Andre Stenfors, 36-jahkásaš Niclas Nyman ja 29-jahkásaš ruoŧŧelaš Disa Bäckström.

Čuoigiid sabetluottat dolvot báikái, gos Sarregáissás Dápmotvuovddis fierai mannan gaskavahku eahkes muohtauđas. Garra biegga ja heajos dálki leat dán rájis hehtten ohcan- ja gádjunbargguid guovllus.

Skuvlakino bokte maid sámefilmmat

Skuvllat sáhttet skuvlakino bokte diŋgot maiddái sámefilmmaid. Diŋgonláhkai leat Sámevarra, Mánu meahci Gáissi, Mumeniid diidadálvi ja Guovdageainnu stuimmit.

Skuvlakino lea riikkaviidosaš filbmabajásgeassinsearvi, mii movttiidahttá skuvllaid geahččat ealligovaid ja fállá oahpaheaddjiide filbmabajásgeassimii bargoneavvuid. Skuvlakino bokte sáhttá diŋgot filmma filbmateáhterčájáhusa. Čájáhusas galgá soahpat sierra báikkálaš filbmateáhteriin.

Varrasamosat: Sápmi

Váldoođđasat

Varrasamosat

Muualla Yle.fi:ssä