Sápmi |

Oanehaččat: Helander Ohcejohnjálmmi skuvlla rektorin, duodjekurssat bivnnuhat SOG:is, Helsinki-päivä muitá nuortalaččaid ásaiduvvama ávvujagi ja Musealágádus čielggada váldegottálaččat mearkkašahtti arkeologalaš báikkiid

Dás leat disdaga oanehis ođđasat.

Hanna Helander válljejuvvui City-Sámit searvvi ságadoallin.
Ohcejohnjálmmi skuvlla ja sámelogahaga rektorin válljejuvvui Hanna Helander. Govva: Ida-Maria Helander

Guldal dás disdatiđida Yle Ođđasiid Sámis. Jietna: Yle Areena.

Hanna Helander Ohcejohnjálmmi skuvlla rektorin

Filosofiija magisttar Hanna Helander lea válljejuvvon Ohcejohnjálmmi skuvlla ja sámelogahaga rektorin. Ohcejoga gieldda čuvgehuslávdegoddi válljii rektora čoahkkimisttis mánnodaga 10.6. Ohcanáiggi virgái jotke máŋga geardde, dasgo ohcciin ii lean rektora gelbbolašvuohta ja skuvlla guktuid oahpahusgielaid dáidu.

Dál válljejuvvon Helanderis lea virggi gáibideaddji gelbbolašvuohta ja bargovásáhus oahpaheaddjin. Eará ohcciin lei rektora gelbbolašvuohta, muhto ii sámegiela dáidu.

Ohcejohnjálmmi skuvllas rektora gielladáiddus ja sápmelaš pedagogiiija dovdamušas lea earenoamáš mearkkašupmi, dasgo stuorámus oassi oahppiin lea sámegielat oahpahusas.

Virgái ledje oktiibuot guhtta ohcci. Okta ohcci gesii ohcamušas eret, go válljejuvvui eará virgái.

Duodjekurssat geasuhit

Sámi oahpahusguovddáža bivnnuhamos oanehis- dahjege eahketkurssat leat ain iešguđetlágán duodjekurssat. Dain buot bivnnuhamosat leat gákte- ja gámagoarrunkurssat sihke silbakurssat.

Sámi oahpahusguovddáš jearai árabus giđđat evttohusaid ja sávaldagaid kurssaid ektui. Gažadeapmái vástidedje badjelaš 100 olbmo, muitalit Sámi oahpahusguovddážis.

Sámi oahpahusguovddáš lea dál plánemin boahtte čavčča ja dálvvi eahketkurssaid.

Helsinki-päivä muitá nuortalaččaid ásaiduvvama ávvujagi

Helsinki-päivä ávvubeaivve muitet nuortalaččaid ásaiduvvama ávvujagi. Dán jagi lea gollán 70 jagi das, go nuortalaččat ásaiduvve Njellimii, Keväjávrái ja Čeavetjávrái ovddeš Beahcáma guovllu ruovttuguovlluin.

Helsinki-päivä áigge nuortalaččaid ásaiduvvama ávvujagi gieđahallet máŋggabealagit ealligovvačájáhusain, hállankaraokein ja sápmelaš dj-kollektiiva Article3 sámemusihkain.

Helsinki-päivä lágiduvvo geassemánu 12. beaivve.

Musealágádus čielggada váldegottálaččat mearkkašahtti arkeologalaš báikkiid

Suoma Musealágádus čielggada váldegottálaččat mearkkašahtti arkeologalaš báikkiid. Musealágádus lea álggahan golmmajahkásaš fidnu, mas inventerejuvvojit váldegottálaččat mearkkašahtti arkeologalaš báikkit.

Ulbmilin lea hábmet máŋggabealat muitalusa nu Suomas vejolaččat eallán olbmuin ja servošiin go maiddái sin kultuvrras. Fidnu galggašii gárvánit jagis 2021.

Inventerema vuođđun geavahuvvo diehtu, mii gávdno Musealágádusa dološbázahusregistaris. Dasa dahkkojuvvojit eatnandárkkistusat báikkiin, maid dieđut leat boarásnuvvan dehe eahpedárkkit. Eatnandárkkistusaid dahket dán gease iešguđet guovlluin Suomas.

Musealágádus ollašuhttá inventerema ovttas museaid áššedovdiiguin, geat dikšot kulturbirrasa áššedovdibargguid. Mielde lea maiddái Sámi musea Siida.

Varrasamosat: Sápmi

Váldoođđasat

Varrasamosat

Muualla Yle.fi:ssä