Sápmi |

Oanehaččat: Jeagárprikáhta ohcá bávkkanasaid Avvilis, Sámemusea Siida 60 jagi, Nuortalaččaid árbevierrodállu rahpá fas uvssaidis, Soađegilli hukseha eambo visttiid ja Eanodat sádde streama Sámi čuvges ijain

Dá leat vuossárgga ođđasat oanehaččat.

Jääkäriprikaatin miehet etsivät räjähtämöttömiä ammuksia
Jeagárprikáhta soalddáhat ohcet bávkkanasaid. Govva: Raimo Torikka / Yle

Guldal dás radio-ođđasiid.

Avvilis ohcet bávkkanasaid

Davvi-Suoma Jeagárprikáhtta ohcá bávkkanasaid Avvila Uhca-Beahcáma guovllus dán vahkus. Dárkkilut báikkit leat Karsimukka geainnu ja Njellim geainnu gaskkasaš guovlu sihke giettit Njellim geainnu máttabealde.

Vejolaš bávkkanasat duššaduvvojit gaskaboddasaš bávkalanbáikkis Kotsamos dahje Rovajärvi báhččinguovllus.

Jeagárprikáhtta geahččala bargat nu, ahte eai hehttešii bearehaga guovllu ássiid.

Sámemusea Siidda olgomusea vuođđudeamis juo 60 jagi

Sámemusea vuođđudeamis lea dán jagi gollan 60 jagi. Ávvujahki rahppojuvvo vuossárgga Siidda olgomuseas, Anáris.

Siidda olgomusea vuođđuduvvui jagis 1959 ja rahppojuvvui vuosttas háve njealjje jagi maŋŋeleabbos Davviriikkaid vuosttas iehčanas sámemusean. Olgomusea doaimmai geassemusean badjelaš 30 jagi ovdal go Sámemusea ja Davvi-Sámi luondduguovddáš Siida huksejuvvui. Olgomusea lea ainge dehálaš oassi Sámemusea čájáhusadoaimmain.

Olgomuseabaji ja ávvujagi rahpama ávvudit otne eahkes Siidda olgomuseas.

Oassálastiid vurdet čoahkkanit Siidda feaskáris dii. 17.00.

Nuortalaččaid árbevierrodállu rahpasa fas

Nuortalaččaid árbevierrodállu Čeavetjávrris rahpá uvssaidis vuossárgga. Nuortalaččaid árbevierrodálu geassebaji rahpandoalut álget dii. 10.00 ja bistet viđa rádjái. Rahpandoaluid oktavuođas fállet káfe.

Kolttien perinnetalo
Nuortalaččaid árbevierrodálus beassa oahpasmuvvat nuortalaš kultuvrii, historijái ja árbevieruide. Govva: Sara Wesslin / Yle

Nuortalaččaid árbevierrodálu geassebadji bistá čakčamánu 20. beaivvi rádjái.

Soađegilli áigu huksehit ođđa visttiid

Soađegili gielda áiggošii huksehit jođánamos lági mielde smávva ássanvisttiid Soađegillái.

Gielddaráđđehus mearridii mannan vahku čoahkkimisttis ovddidišgoahtit ášši, dasgo dálá dilis gielddas eai leat fállat ássanvisttit dakkár olbmuide, geat fárrejit báikegoddái barggu maŋis.

Dilli čuohcá eandalitge dikšunsuorggi rekryteremii. Soađegilis livččii dárbu divššáriidda, muhto heajos visttedili geažil eai nagot oažžut olbmuid bargui.

Čuovo Sámi čuvges ijaid Eanodagas streama bokte

Eanodaga gielda sádde suoidnemánu 22. beaivvi rádjai birra jandora njuolggostreama, mainna háliidit čájehit makkárat leat Sámi čuvges ijat.

Eanodat sáddii mannán dálvve seammalágan njuolggostreama, go háliidedje čájehit makkár lea skábma.

Stream gávdno Eanodaga gieldda siidduin.

Varrasamosat: Sápmi

Váldoođđasat

Varrasamosat

Muualla Yle.fi:ssä