Sápmi |

Oanehaččat: Johtolatbárti Gilbesjávrris, sámeguvlui einnostit liegga dálki vahkkolohppii, báŋkogoarttaid dovddaldatnummiriid geahččalit snuoggat gávpekássas ja Ante Aikios vuosttaš single

Dás leat gaskavahku oanehis ođđasat.

Poliisin logo poliisimiehen hihassa.
Boles ávžžuha leat fuolalaš báŋkokoarttain mávssedettiin. Govva: Esa Huuhko / Yle

Johtolatbárti Gilbesjávrris

Gilbbesjávrri luotta alde, Bovssujávrri buohta, dáhpáhuvai ikte eahkedis johtolatbárti.

Bárti dáhpáhuvai Gilbbesjávrris 20 km máttás. Áššis muitala Lapin Kansa.

Smávvabiilla ja pakehtabiilla bárti giddii Gilbbesjávrri geainnu guovtti diibmui disdateahkeda. Olbmot eai roasmmohuvvon lihkohisvuođas vearrát.

Biilabárttis lei sihke Suoma ja Norgga beale biila ja dain oktiibuot čieža olbmo fárus. Oktage sis ii roasmmohuvvan vearrát, muhto sin dárkkistedje Gilbbesjávrris. Norgga beale gádjunkopter finai maid lihkohisvuođabáikkis.

Diehtu biilabárttis bođii veháš ovdal diibmu 19.00.

Sámeguvlui einnostit liegga dálki vahkkolohppii

Dálkediehttit einnostit loahppavahkus dálki liegganit sámeguovllusge. Ohcejogas soitet geassebáhkat vahkuloahpas. Dálkediehtaga lágádus einnosta temperatuvrra loktanit Ohcejogas boahtte sotnabeaivve 25 gráđii. Suoma davimus gilis Njuorggámis lea boahtte mánnodaga juobe 26 lieggagráđa, jos meteorologaid einnostusat dollet deaivása Eanodahkii ja Anárii einnostit 24 lieggagráđa, Soađegilláige 23 lieggagráđa.

Báŋkogoarttaid dovddaldatnummiriid geahččalit snuoggat gávpekássas

Boles muittuha, ahte báŋkogoarttaid dovddaldatnummiriid geahččalit snuoggat gávpekássas.

Dán geasi áiggi aŋkke Mearra-Lappis leat boahtán ovdan dáhpáhusat, go stuorra gávppiin ja borramušgávppiin mávssedettiin suollagat leat vilppastemiin oaidnán olbmuid báŋkokoarttaid dovddaldatnummiriid. Dan maŋŋá leat suoládan báŋkogoartta ja lokten ruđaid konttus.

Dábálaččat leat suoládan boarrásut olbmuid báŋkogoarttaid. Go olbmot leat máksán, suollagat leat hehtten, vai olmmoš geahččá eará guvlui.

Boles bivdáge dál olbmuid leat earenoamáš fuolalaš ja eastit earáid oaidnimis báŋkogoartta dovddaldatnummáriid.

Ante Aikios vuosttaš single

Juoigi ja girječálli Ante Aikio, 33, lea almmustahttán su vuosttas single. Bihttá namma lea Šuvvá ja dan lea buvttadan beakkán ruoŧasápmelaš ráppár Kitok.

Ante Aikio lea guhká juoigan almmolaččat, muhto dát lea easkka su vuosttas persovnnalaš musihkkapublikašuvdna. Ovdalis son goitge lea dahkan studio-ovttasbarggu earet eará Korpiklaani-joavku Jonne Järveläin, gean sooloskearrus son lea leamaš mielde.

Ante Aikios lea áigumuš ovttastahttit juoigama earálágán musihkkastiillaiguin. Ulbmilin lea almmustahttit dan jagi bealde EP-skearru, mii sisttisdoalášii oktiibuot vihtta dahje guhtta bihttá.

Lasihuvvon 17.7.2019 13:58 ođas Ante Aikio vuosttaš singles.

Varrasamosat: Sápmi

Váldoođđasat

Varrasamosat

Muualla Yle.fi:ssä