Sápmi |

Oanehaččat: Juovlachartermoahti seaivu, Detnui gorgŋo 32 500 luosa, juovlamárkanat vahkuloahpas ja Fjällgren gilvala Eurovision-ovddasteamis

Loga dás ođđasiid oanehaččat.

Jietna: Joulupaketteja.
Jietna
Guldal dás radio-ođđasiid 30.11.2018 d. 7.30 Jietna: Yle Areena. Govva: Alpertti Rieskjärvi / Yle

Chartermoahti joavdá vahkuloahpas

Maiddái Eanodaga juovlaáiggi charterturisma beassá otne bearjadaga albmaláhkái johtui, go vuosttas juovlacharter čierasta golmma sulain. Girdi boahtá Eaŋgas-riikkas Humberside girdingiettis, mii lea Gaska-Eŋlánddas. Davvi-Suoma eará girdingittiin juovlajohtolat leage beassan juo johtui, ja ovdamearkan gaskavahkku Avvila girdingiettis ledje vihtta olgoriikkalaš girdi oktanaga.

Dán vahkuloahpas davás vurdojuvvoge erenomáš ollu johtolat, go máŋggat girdit leat vuordimis sierra girdingittiide. Juovlacharteriid vurdet leat buohkanassii sullii 700.

Detnui gorgŋo 32 500 luosa

Luondduriggodatguovddáš Luke lea almmustahttán Deanu luossalohkamiid bohtosiid.

Mannan geasi Luondduriggodatguovddáš čuovui vuosttaš geardde luosaid goargŋuma skádjaseasaniiguin sihke Deanus ja Anárjogas. Deanu mihtidanbáikki meaddel gorgŋo sullii 32 500 luosa. Anárjohkiiges gorgŋo 2850 luosa.

Luossalohkamat čađahuvvojedje Suoma ja Norgga ovttasbargun. Ieš Deanus luosaid goargŋun dáhpáhuvai geassemánu beallemuttu ja borgemánu álggu gaskasaš áiggis. Anárjogas goargŋun álggii easka mihcamáraid áigge ja bisttii gitta čakčamánu álgui.

Mannan geassi lei Deanu čázádagain unna luosaid jahki ja dat vuhttui eandalitge Anárjogas. Stuorra luosaid oassi lei lohkkojuvvon luosain vuollel 10 proseantta. Luondduriggodatguovddáža mielde luossalohkamiid lea ulbmil joatkit maiddái boahtte geasi Deanu oasil.

Dál lea juovlamárkaniid áigi

Dál lea vuot dat jagiáigi, ahte juovlavuovdimat dollojuvvojit duoppil dáppil.

Heahtá árbevirolaš juovlamárkanat rahpasit ihttin lávvardaga logi áigge valástallansáles ja doppe lea maid mánáide searralágan prográmma. Muoná mánáid ja nuoraid showdánsunjoavkku čájáhus lea beal ovtta áigge ja ieš juovlastállu joavdá báikki ala ovtta áigge.

Maiddái Avvila fitnodatdoallinissoniid searvvi árbevirolaš juovlamárkanat rahppojuvvojit ihttin lávvardaga logi áigge logahaga valástallansáles. Doppege leat earret eará musihkka, moahttačájáhus ovtta áigge ja vel sambaráidu golmma áigge.

Ohcejohjnjálmmi skuvllas juovlamárkanat leat lávvardaga ovttanuppelogis guovtti rádjai. Ohcejohnjálmmisges juovllaid rahpan lea sotnabeaivve gilidállu Giisás ovttanuppelogi áigge ja maiddái doppe leat máŋggalágan suohttasat gitta golmma rádjai.

Fjällgren gilvala Eurovision-báikkis

Sápmelaš musihkkár Jon-Henrik Fjällgren gilvala vuot boahtte jagi Ruoŧa Eurovision-báikkis. Fjällgren lea okta dain 28 artisttas, geat servet nu gohčoduvvon Melodifestivalen-gilvui boahtte jagi, muitala SVT Sápmi. Son oassálastá gilvui lávlagiin "Norrsken".

Lullisápmelaš musihkkár Jon-Henrik Fjällgren oassálastá gilvui dál goalmmát geardde. Jagi 2015 Fjällgren bođii gilvvus nubbin lávlagiin "Manne Leam Frijje" ja jagi 2017 goalmmádin lávlagiin "Eatneme gusnie jeenh dåaroe".

Melodifestivalena vuoiti beassá ovddastit Ruoŧa Eurovision Song Contest -gilvvus Israelas miessemánus. Ruoŧa oassegilvvut álget guovvamánus.

Varrasamosat: Sápmi

Váldoođđasat

Varrasamosat