Sápmi |

Oanehaččat: Kulturduovdagat oidnosii Ohcejogas, Norggas váidet Deanu soahpamušas, ovccis dušše girdilihkohisvuođas Upmis, EMRIP čoahkkin Geneves, 28 nammaduvvon vuolgit Arctic Winter Gamesii

Dás leat vahku vuosttaš oanehis ođđasat.

Utsjoen Kirkkotuvat
Ohcejoga girkostobuid luhtte ordnejuvvo rávvendilálašvuohta duovdagiid dikšumis. Govva: YLE / Jyri Tynkkynen

Kulturduovdagat oidnosii Ohcejogas

Ohcejogas ja Njuorggámis lágiduvvojit dilálašvuođat, gos ságastallet duovdagiid dikšumis. Dilálašvuođain gullat, mo duovdagiid dikšumii, sihke boares visttiid divodeapmái oažžu veahki ja ekonomalaš doarjaga.

Ohcejogas dilálašvuohta ordnejuvvo girkostobuid luhtte disdaga 16.7. diibmu 10.00 rájes. Njuorggámis dilálašvuohta ordnejuvvo Njuorggáma skuvllas duorastaga 18.7. diibmu 10.00 rájes.

Dilálašvuođat leat oassi Ohcejoga kulturduovdagat oidnosii -prošeavtta.

Norggas váidet Deanu soahpamušas

Norgga bealde leat váidán Deanu­ soahpamušas. Luossasearvvit leat sádden Sis-Finnmárkku diggegoddái váiddaášši, mas oaivvildit Norgga ja Suoma gaskasaš Deanu soahpamuš rihkku báikkálaččaid vuoigatvuođaid. Okta váidaga čuoggáin lea dat, go stáhta addá bivdovuoigatvuođaid Mátta-Suoma bartaoamasteddjiide.

Váidaga leat dahkan Deanučázádaga luossabreavaeaiggádat ja Deanučázádaga luossabivdosearvi. Ášši birra čállet NRK Sápmi ja Ávvir.

Ovccis dušše girdilihkohisvuođas Upmis

Ruoŧas Upmi lahkosis dáhpáhuvai sotnabeaivve girdilihkohisvuohta. Smávvagirdis ledje seaivunsuodjenjuikejeaddjit. Buot ovcci girdis leamašan olbmo dušše lihkohisvuođas. Buot lihkohisvuođas duššan olbmot ledje Ruoŧa riikkavuložat.

Almmuhus lihkohisvuođas bođii diibmu 14 maŋŋá sotnabeaivve 14.7, muitala SVT.

EMRIP čoahkkin Geneves

Álgoálbmogiid vuoigatvuođaid áššedovdimekanismma EMRIP 12. čoahkkin lea álgán otne 15.7. Geneves, Sveiccas. Čoahkkin bistá suoidnemánu 19. beaivvi rádjái.

Čoahkkimis boahtá leat sáhka earet eará eamiálbmogiid rivttiin rájáid ja fárredeami dáfus, Ovttastuvvan Našuvnnaid eamiálbmogiid rivttiid guoski julggaštusas ja áššedovdimekanismma boahttevuođas.

28 nammaduvvon vuolgit Arctic Winter Gamesii

Sámis leat nammadan 28 gilvaleaddji boahtte jagi Arctic Winter Gamesii, muitala Ávvir. Team Sápmi lea oassálastimin čuigiiguin Arctic Winter Gamesii. Sámiid Valáštallan Lihttu – Norga aktivitehtalávdegoddi lea evttohan 28 čuoigi AWG:i, muhto AWG-komitea lea dat, mii mearrida geat de besset ovddastit Sámi.

Boahtte jagáš Arctic Winter Gamesii oassálastet 9 joavkku ja 2000 oassálasti. Gilvvuin leat oktiibuot 21 valáštallandoaimma njealji šlájas, mat leat árbevirolaš valáštallan, davviriikkalaš valáštallan, valáštallamat siste ja jiekŋavaláštallan

Arctic Winter Games lágiduvvo 50. geardde boahtte jagi. Boahtte jagáš Arctic Winter Games ordnejuvvo Whitehorse gávpogis Kanádas 15.-21.3.2020.

Lasihuvvon 15.7.2019 15:16 Ođas Upmi girdilihkohisvuođas.

Varrasamosat: Sápmi

Váldoođđasat

Varrasamosat

Muualla Yle.fi:ssä