Sápmi |

Oanehaččat: Láhtteliggen sivvan Levi buollimii, Finnair lasiha čakčat girdimiid Avvilii ja Gihttelii, gielda bidjá badjel 600 000 euro Anára skuvlla sisáibmováttisvuođaid čoavdimii, Anárjávrris bivdán veháš uhcit meari guliid go ovddit jagi ja Kárášjogas lohpi vuodjit čáhceskohteriin

Dás leat vahku maŋimuš oanehis ođđasat.

Tutkijat selvittävät palon syttymissyytä Levillä
Láhtteliggen lei sivvan Gihttela Levis dáhpáhuvvan viessobuollimii, mas dušše golbma nuora. Govva: Jyri Tynkkynen / Yle

Guldal dás bearjadatiđida Yle Ođđasiid Sámis. Jietna: Yle Areena.

Láhtteliggen sivvan Levi buollimii

Elrávnnjiin doaibman láhtteliggen lei sivvan Gihttela Levi buollimii.

Lihkohisvuođaguovddáš čielggadii buollinsiva ja gávnnahii ahte láhtteliggema kábeliid bidjamis ledje dáhpáhuvvan feaillat. Kábelat ledje sojahuvvon menddo sakka ja kábela olggoš lei rihkkašuvvan.

Barta buollái namalassii láhttefielluid vuolde.

Lihkohisvuohta dáhpáhuvai 12.4. ja dat doalvvui golbma nuora heakka.

Finnair lasiha čakčat girdimiid Avvilii ja Gihttelii

Girdinfitnodat Finnair lasiha dán čavčča oktiibuot 18 girdima Avvilii ja Gihttelii. Áššis muitala Lapin Kansa.

Finnair girdá 29.8.–28.9. gávcci lassegirdima ovddos maŋos Avvilii, ja logi girdima ovddos maŋos gaskkal Helsset-Avvil-Gihttel. Njuolggo lassegirdimat Avvilii leat bearjadagaid ja sotnabeivviid, ja girdimat Gihttelii fas duorastagaid ja lávvardagaid.

Gielda bidjá badjel 600 000 euro Anára skuvlla sisáibmováttisvuođaid čoavdimii

Anára skuvlla sisáibmováttisvuođaid dikšumii boahtá lasi ruhta. Anára gielddastivra lea mearridan mieđihit 646 000 euro lassemearreruđa Anára skuvlla sisáibmováttisvuođaid čoavdimii.

Ruđaiguin Anára gielda háhká sadjásaš skuvlasajiid sulaid 50 oahppi geavahussii. Dárkkuhussan lea oastit sadjásaš skuvlasaji, man lea vejolaš sirdit

Anárjávrris bivdán veháš uhcit meari guliid go ovddit jagi

Anárjávrris leat bivdán veháš uhcit meari guliid go ovddit jagi. Luondduriggodatguovddáža mielde Anárjávrris bivde diibmá sulaid 158 tonna guliid, mii lea čieža tonna uhcit go ovddit jagi.

Diibmá ovdamearkka dihte dápmoha, jávreluosa, rávddu ja ránesrávddu sálaš unnui ain.

Dutki Erno Salonen mielde sáhka lea lunddolaš molsašuddamis dannego Anárjávrri sálašmeriin lea leamaš dušše unna nuppástusat sulaid 20 maŋimuš jagi áigge.

Lohpi vuodjit čáhceskohteriin Kárášjogas

Kárášjoga gielddastivra lea mearridan, ahte olbmot ožžot lobi vuodjit čáhceskohteriin Kárášjoga gieldda čázádagain. Gielddastivra mearridii áššis 9.5. Áššis muitala Ávvir.

– Mii fertet luohttit ahte álbmot láhtte čáhceskohteriin skihkalaččat jogain ja jávrriin, deattuha Kárášjoga gieldda sátnejođiheaddji Svein Atle Somby.

Varrasamosat: Sápmi

Váldoođđasat

Varrasamosat

Muualla Yle.fi:ssä