Sápmi |

Oanehaččat: Lappi geasseturisma lassánan, čavčča ealgabivdolobit mieđihuvvon, čáhcecrossa Avvilis ja Dansklacken på Dosan -festivála álgá

Dá leat vahku maŋimuš oanehis ođđasat.

Dansklacken På Dosan
Dansklacken-festivála álgá odne bearjadaga Gárasavvonis. Govva lea váldojuvvon diimmá festiválacampingas. Govva: Martta Alajärvi / Yle

Lappi geasseturisma lassánan

Álgogeasi leat galledan eambbo turisttat Lappis go ovdal. Suoma statistihkkaguovddáža mielde Lappi idjadansajiin ledje geassemánus 13 proseantta eambbo idjadeamit go jahki dassái.

Sihke suopmelaččaid ja olgoriikkalaččaid idjademiid mearri lassánii. Olgoriikkalaččain eanemusat ledje duiskalaččat.

Lappi idjadansajiin registrerejedje geassemánus vuollelaš 170 000 idjadanjándora. Stuorámus oassi dáin ledje ruovttueatnama mátkkálaččaid galledeamit.

Olles riikkas idjadeamit ledje geassemánus guhtta proseantta eambbo go diibmá, oktiibuot 2,3 miljovnna jándora.

Čavčča ealgabivdolobit mieđihuvvon

Suoma fuođđoguovddáš lea mieđihan čakčii Lappi guvlui oktiibuot 10 402 ealgabivdolobi. Dál mieđihuvvon ealgabivdolobiiguin sáhttet njeaidit badjel 12 000 ealgga.

Diibmá ealgabivdolobiid mieđihedje badjel 11 proseantta unnit go dán jagi. Ovttaskas fuođđodikšunbiriid gaskkal leat goittotge erohusat.

Čavčča 2019 bivdobadjái mieđihuvvon lohpemearri vuođđuduvvá Lappi guovllu fuođđoráđi ásahan ealganáli deahtisvuođamearrái.

Sámeguovllu fuođđodikšunbiriin Eanodahkii mieđihedje 174 njeaidinlobi, Anárii 1 749 njeaidinlobi ja Ohcejohkii 125 njeaidinlobi.

Čáhcecrossa Avvilis

Ihttin lávvardaga 27.7. ordnejuvvo čáhcecrossgilvu Avvilis, hotealla Kultahippu gáttis.

Ylä-Lapin Moottorikelkkailija rs deavdá 40-jagi ja gilvvus lea seammás ávvujahki.

Dáhpáhus álgá diibmu 10:30 ja nohká diibmu 19:00 eahkes.

Lassedieđuid gávnnat dáppe.

Dansklacken på Dosan-festivála álgá odne

Odne bearjadaga 26.7. álgá Dansklacken på Dosan -festivála Gárasavvonis diibmu 19:00.

Bearjadaga lávddi alde loaiddastit Höstorkestern, Labyrint ja Wahlberg. Lávvardaga lávddi ala lávkejit Hanna Nutti, Trainspotters & Chefen ja Sančuari.

Lávvardaga beaivit prográmmas diibmu 12:00–17:00 lea oaggun mánáide, muođuid málen, njoarostangilvu ja olu eará. Buohkat leat buresboahtin ja beaivedáhpáhus lea nuvttá.

Festivála namma bissu ain seammán, vaikko festivála ii ordnejuvvo šat Dosanis.

Festivála prográmma gávnnat dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä