Sápmi |

Oanehaččat: Lappi lihttu hálida ruovdemáđija, šaddoborrit gillájit dálkkádatrievdamis, ministtar hoahpuha davimus Suoma ássiid guolástuslobiid máhcaheami

Loga ja guldal dás duorasdaga oanehis ođđasiid duorasdaga 29.11.

Jietna: karhu suolla
Jietna
Guldal dás Yle Ođđasiid Sámis duorasdaga d. 7.30. Jietna: Yle Sápmi

Lappi lihttu hálida ruovdemáđija

Lappi lihtu stivrii juovlamánus lea boahtimin ášši Lappi lihtu ulbmiliin čuovvovaš ráđđehusa prográmmii.

Lappi lihtu stivra háliida, ahte ráđđehus joatkkášii Jiekŋameara ruovdegeainnu plánema. Lihtu mielas ruovdemáđija lea dehalaš olbmuid ja gálvvuid fievrredeami dihte. Lappi lihtu mielas maid diehtojuohkinkábel galggašii huksejuvvot Giemas Roavvenjárgga bokte Murmánskii. Guktot dát fitnut livčče Lappi lihtu mielas ávkin Davvi-Supmii. Lappi lihtu stivrras sápmelaččaid ovddasta Magreta Sara.

Ođđalágan spiret njáhket davvelebbui?

Dálkkádatrievdan sáhttá váikkuhit maiddái spiriid ja sálašealliid gaskavuođaide. Helssega universitehta dutkamuša mielde spiret geahpedit šattuid borrama ja dan dihte spiriid ja sálašealliid gaskasaš dássedeaddu sáhttá rievdat. Dutkamuša mielde maiddái sierra eallišlájaid eallinguovllut nuppástuvvet.

Ođđa spiret vádjolit davás ja dakkár eallit, mat ellet mearragáttiin, šaddet fárret bajošeatnamiidda. Mađi alit liekkasvuođat, dađi sihkkarabbot šaddoborri šaddá spire bániide.

Ministtar hoahpuha davimus Suoma ássiid guolástuslobiid máhcaheami

Eana- ja meahccedoalloministtar Jari Leppä lea evttohan Guolástanláhkabeivviin, ahte davimus Suoma báikkálaččaide mieđihuvvo fas guolástuslohpi olles bivdobadjái.

Eana- ja meahccedoalloministeriija lea válmmaštallan ráđđehussii evttohusa guolástanlága nuppástusain. Stuorámus nuppástusat gusket lobihis bivddu ráŋggáštusaid ja Anára, Eanodaga ja Ohcejoga ássiid guolástanrivttiid.

Jagis 2016 fápmui boahtán lága dihte báikkálaš olbmot šaddet dál gilvalit turisttaiguin seamma bivdolobiin, maid vuvdet dušše dihto meari. Eana- ja meahccedoalloministeriija lea ožžon guolástanrivttiid gáržžideames olu máhcahaga ja dat doalaige giđđat ságastallandilálašvuođaid davimus Suoma olbmuide.

Ministtar Leppä dajai gaskavahku, ahte lohpeođastus báikkálaččaid oasil galgá dahkkojuvvot vel dán ráđđehusbaji áigge. Báikkálaččaid olles bivdobaji guolástanlohpi lea ožžon viiddis doarjaga.

Varrasamosat: Sápmi

Váldoođđasat

Varrasamosat