Sápmi |

Oanehaččat: Lappilaččat buohccájit ja bártidit eanet go eará suopmelaččat, Njearrejávrri šalddi divvunbarggut hehttejit johtolaga Rivdola ja Áŋŋela gaskkas, fargga buohkat sáhttet váruhit bohccuin Porokello-applikašuvnnain ja eaktodáhtolaččat ángiruššet álbmotmehciin

Dá leat duorastaga oanehis ođđasat.

Stetoskooppi.
Govva: Derrick Frilund / Yle

Lappilaččat buohccájit ja bártidit gaskamearalaččat eanet go eará suopmelaččat

Dearvvasvuođa- ja buresveadjinlágádusa THL raportta mielde Lappi guovllus olbmot bártidit eanet go eará guovlluin Suomas. Almmolaččat lappilaččat maiddái buohccájit eanet go gaskamearalaččat Suomas. Dutkanprofessor Seppo Koskinen THL:s muitala, ahte lappilaččaid bárttiide dahje heajos dearvvašvuhtii ii leat makkárge eareanoamáš sivva. Duogážis soitet leat eallinvugiide laktášeaddji sivat.

Njearrejávrri šaldi divvojuvvo suoidnemánus

Njearrejávrri šaldi Anára Rivdola ja Áŋŋel geainnu gaskkas divvojuvvo dán gease. Njearrejávrri šaldi lea 17 kilomehtera ovdal Áŋŋela gili. Lappi EJB-guovddáš dieđiha, ahte divvunbargguin leat mearkkašahtti hehttehusat johtolahkii ja johtolaga ferte gaskkohagaid bissehit. Divvunbarggut álget Njearrejávrri šalddis suoidnemánu 9. beaivve ja bistet gitta suoidnemánu lohppii.

Boazováruhusaid addin vejolažžan buot Porokello-applikašuvnna geavaheaddjiide

Suoma boazodoalloguovllus johtti biilavuoddjit sáhttet lávvordaga rájes váruhit eará johttiid das, gos ja maid geainnuid alde leat dihtton bohccot. Dát lea vejolaš porokello-applikašuvnnain. Porokello lea suopmelaš applikašuvdna, man ulbmil lea geahpedit boazolihkohisvuođaid johtolagas.

Jagi 2016 rájes váruhusaid leat addán dušše ámmátbiilavuoddjit, muhto boahtte lávvordaga rájes boazováruhusaid addin lea vejolaš buot applikašuvnna geavaheaddjiide. Váruhus lea fámus diibmobeali ja dat doaibmá 750 mehtera geahčái váruhanbáikkis. Dán jagi miessemánu loahpa rádjái olbmot leat addán badjel 400 000 váruhusa. Áššis muitala Lapin Kansa.

Eaktodáhtolaččat áŋgiruššet Urho Kekkosa ja Pyhä-Luosto álbmotmehciin

Lappi guovllu álbmotmehciid divvot eaktodáhtolaš vuimmiin. Dán gease Urho Kekkosa ja Pyhä-Luosto álbmotmehciin Pidä Lappi Siistinä searvvi eaktodáhtolaččat besset ovdamearkka dihte šaldut ja divvot ráhpaid ja merket vánddardanbálgáid. Sii bargagohtet suoidnemánu vuosttas vahku rájes. Pidä Lappi Siistinä searvvi doaimmaid ulbmilin lea seailluhit Lappi guovllu buhtisin.

Varrasamosat: Sápmi

Váldoođđasat

Varrasamosat

Muualla Yle.fi:ssä