Sápmi |

Oanehaččat: Likšus hávdáduvvojit 25 váinni bázahusat dološ hávdádansadjái, adivasiid rivttiin iežaset ássansajiide Indias mearrida duopmostuollu, nuortalaččaid 70-jagi ásaiduhttinávvudeami prográmma almmustahttojuvvon ja auktoriserejuvvon jorgaleaddji dutkosii áigi almmuhit

Dá leat vahku maŋimuš oanehis ođđasat.

ođđasithávdádeapmi
Ođđasithávdádansadji Likšus ovdalaš historjjálaš dáhpáhusa. Govva: SVT Sápmi / Johan Palomäki

SVT: Likšus besset 25 váinni bázahusat fas dološ hávdádansadjái

Odne bearjadaga 9.8. riikkaidgaskasaš eamiálbmotbeaivve ožžot 25 oaiveskálžžu ráfi boares hávdádansajis Gammplatsenis, mii lea Likšus Västerbottenis. Likšu sámesearvvi ovdaolmmoš Mikael Jakobsson illuda go máttut fidnejit ná ráfi. Jakobsson lea bargan dan ovdii ahte dáktebázahusat máhcahuvvojit ruovttoluotta.

Jakobsson muitala SVT Sápmi/Sámeradioi ahte álggos lei jurdda máhcahit dávttiid girkogárdái, muhto maŋŋil bođii ovdan ahte dán doaimma stivre dološ bázahusaid guoski láhka iige hávdádanláhka. Bázahusat doaimmahuvvojedje vuos Västerbottena museai Ubmái jagis 2013.

Hávdádanbázahusaid máhcahemiin leat sámeservviin ja museain ovttasbargan Ruoŧa girku, Sámediggi ja Likšu gielda.

Áššis muitalit SVT ja Sameradion & SVT Sápmi

HS: Adivasiid rivttiin iežaset ássansajiide Indias mearrida duopmostuollu

Duopmostuollu ádjána ain loahpalaš duomuin, mii guoská máilmmi stuorámus álgoálbmogin máinnašuvvon adivasiid rivttiid iežaset eallinbirrasiidda. Lágasteapmi lea bistán juo nuppelot jagi ja India alimus riekti lea árat dán jagi juo mearridan oassestáhtaid sirdit olbmuid eret dain guovlluin, go adivasiid eanariekteohcamušat leat hilgojuvvon. Bággosirdin guoskkašii sullii ovcci miljon olbmo. Áššis čállá Helsingin Sanomat.

Sivvan lágasteapmái lea earret earáid muhtin luonddugáhttenorganisašuvnnaid čuoččuhus das ahte čearddaid eallin hehtte luonddu ođasmuvvama ja meahcielliid nugo tigeriid.

Olmmošriektesearvvit, earret earáid Survival International bealuštit álgoálbmotčearddaid. SI mielde Indias lea dáhpáhuvvamin máilmmi stuorámus bággosirdin ja jápminduopmu miljovnnaide álgoálbmotčeardda olbmuide. Ášši lea dáid áiggiid boahtán eanet ovdan medias ja ollugiid mielas čearddaid eallinvuohki baicce suodjala mehciid. Sierra adivasi-čearddaide gullet badjel čuohte miljon olbmo, mii lea lagabui logádas India olmmošlogus.

Áššis muitala Helsingin Sanomat -áviisa.

Nuortalaččaid 70-jagi ásaiduhttinávvudeami prográmma almmustahttojuvvon

Nuortalaččaid ásaiduhttima 70-jagi ávvodoalut ordnejuvvojit lávvardaga 24.8. Čeavetjávrris. Dáhpáhusa temán lea Õõutveäkka dahje davvisámegillii ovttasráđiid. Temáin háliidit deattuhit ovttas bargama dehálašvuođa nuortalaš servoša gievravuohtan ja eallineaktun.

Jagis 2019 šaddá 70 jagi das, go nuortalaččat ásaiduhttojuvvojedje. Dáhpáhus čohkke olbmuid deaivvadit nuppiideaset, leudd´et, dánsut ja doalahit oktasaš muittu.

Prográmma álgá ortodoksalaš liturgiijain. Ávvobeaivvi loahpaha eahketkonsearta, gos loaiddasta Jaakko Gauriloff ja Jaakko 80 jagi -joavku, katrilla, Suõmmkar ja loahpas mikrofovdna lea rabas buohkaide.

Nuortalaččaid ásaiduhttima ávvudeami prográmma gávnnat dáppe.

Almmuhanáigi auktoriserejuvvon jorgaleaddji dutkosii lea álgán

Auktoriserejuvvon jorgaleaddji dutkkus ordnejuvvo skábmamánus 16.11.2019. Almmuhanáigi dutkosii lea álgán mannan vahku duorastaga 1.8. ja dat nohká lávvardaga 31.8. diibmu 16:15.

Dutkosis jorgalanbargguid gáldogielat leat Suoma virggálaš gielat (suomagiella, ruoŧagiella, anáraš-, nuortalaš- dahje davvisámegiella) ja vieris gielat. Jorgalanbargguid čuozáhatgielat čilget lávvardahkii 31.8. rádjai oassálastiid almmuhemiid vuođul.

Dutkkusdilálašvuođat sáhttet ordnejuvvot Helssegis, Anáris, Joensuus, Tamperes ja Turkus, jus aitosaš báikegoddái leat unnimustá vihtta dutkosii almmuheami.

Sámediggi ávžžuha jorgaleddjiid čađahit auktoriserejuvvon jorgaleaddji dutkosa. Davvi-, anáraš- ja nuortalašgielas eai leat nu olu auktoriserejuvvon jorgaleaddjit. Sámediggi almmuha vejolašvuođas ordnet ráhkkananbeaivvi auktoriserejuvvon jorgaleaddji dutkosa várás, jus beroštupmi gávdno. Auktoriserejuvvon jorgaleaddji dutkkus sáhttá leat hástaleaddji ráhkkaneami haga.

Lassedieđuid gávnnat dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä