Sápmi |

Oanehaččat: Lottemoniid lobihis čoaggin, Eurovision bohtosat rivdet, kvenagielat rádio gullogoahtá ja Sámediggi ohcá sesoŋŋabargiid

Dá leat duorastaga oanehis ođđasat.

Kuusi munaan punakylkirastaan pesässä.
Govva: Mikko Rantala

Guldal dás duorastatiđida Yle Ođđasiid Sámis Jietna: Yle Areena.

Eiseválddit háliidit cavgilemiid vejolaš monnesuollagiin

Lottemoniid lobihis čoaggin lea lassánan maiddái Davviriikkain. Lobihis čoaggit eai leat beroštuvvan dušše hárvenaš šlájain, muhto juohkelágan monit ja čivggat dohkkejit. Boles, Meahciráđđehus ja Birdlife muittuhitge dál, ahte giđa ja álgogeasi áigge Suomas johtalit monnesuollagat. Eiseválddit háliiditge olbmuid cavgilit vejolaš monnesuollagiin.

Lobihis monnečoaggimis ja loddegávppis johtet stuorra ruđat. Máilmmiviidosaččat lobihis vildaealligávppis árvalit jorrat 10-20 miljárda dollára.

Eurovision lávlungilvvu bohtosat rivdet rehkenastinfeailla dihte

Eurovision Broadcastinf Union EBU dieđiha, ahte Eurovision lávlugilvvu bohtosat rivdet. Vilges-Ruošša duopmárbohtosiin lei feaila ja nuba muhtin bohtosat rivdet. Top 4 joavkui dát ii váikkut, muhto muđui riikkaid sajit leat sáhttán rievdat. Ovdamearka dihte Norgga Eurovision ovddasteaddji KEiiNO bođiige guđádin iige viđádin. Viđádin bođii Ruoŧa ovddasteaddji John Lundvik.

Vilges-Ruošša duopmárjienaid, adde dán jagi eará láhkai go eará riikkaid duopmárjienaid, danin do Vilges-Ruošša duopmáriid jienaid hilgojuvvojedje. Vilgesruošša duopmáriid jienaid hilgojuvvojedje danin, go duopmárat eai čuvvon Eurovision njuolggadusaid.

MTV mielde dat mot duopmárat ledje jienastan vuosttaš semifinálas bođii almmolašvuhtii ovdal finála ja Eurovision njuolggadusaid mielde daid dieđuid oažžu muitalit almmolaččat easkka finála maŋŋá.

Vilgesruošša duopmárbohtosiid baste addit nu, ahte dat rehkenastojuvvojedje seammasullasaččat jienastan riikkaid bohtosiin.

Vuosttaš kvenagielat rádiosáddagat gullogohtet geassemánus Norggas

Kvenagielat rádiosáddagat gullogohtet vuosttaš geardde Norggas geassemánu 6. beaivve rájes. Kvenagielat aviisa Ruijan Kaiku lea álggahan Ruijan Radio -doaimmahusa, man doaibmabáiki lea Álttás. Ruijan Radios galget leat guokte diibmobeallásaš sáddaga geassemánus ja čavčča rájes kvenagiella galgá gullot rádios juohke vahkkus.

Kvenagielat rádiosáddagiin geahččalit gáhttet ja čalmmustahttit kvena kultuvrra.

Sámedikki oahppamateriáladoaimmahat ohcá sesoŋŋabargiid

Sámediggi bálkáha geasset guovtti mánotbadjái ovtta bargi ráhkadit nuortalašgielat oahppamateriála ja dan lassin ovtta digimateriálabargi. Digimateriálabargi bargun lea bidjat davvisáme- ja anárašgielat materiálaid Cloubi-vuođu ala.

Bargguid álggahanáigi sohppojuvvo sierra. Ohcanáigi bargguide nohká miessemánu maŋimus beaivve.

Geahča eanet dieđuid dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä