Sápmi |

Oanehaččat: Luondduriggodatguovddáža luossakámera sáhttá dál čuovvut, LK: ruoššaluossa goargŋu fas Detnui, luopmániid láddama šaddá vel vuordit ja Midnattsrocken-festivála álgá

Dá leat duorastaga oanehis ođđasat.

Deanus goddon goadjin.
Luondduriggodatguovddáža luossakámera sáhttá čuovvut dál reálaáiggis. Gova goadjin ii laktás áššái. Govva: Kaija Länsman / Yle

Luondduriggodatguovddáža luossakámera sáhttá čuovvut dál

Luondduriggodatguovddáš lea almmustahttán siidduinis luossakámera. Nappo kalahavainnot.fi siidduin bastá čuovvut reálaáiggis oidnojitgo kámeras luosas.

Kámera lea Deanus, muhto Luondduriggodatguovddáš ii muital justa gokko buohta sii leat kámera bidjan johkii.

Kámera sáhtát čuovvut dáppe.

LK: Ruoššaluossa goargŋu fas Detnui

Ruoššaluosat dáistalit dál eallinsajis Jiekŋamerrii luoiti luossačáziin eará luossašlájaiguin. Áššis muitala Lapin Kansa.

Luondduriggodatguovddáža dutkanprofessor Jaakko Erkinaro gávnnaha, ahte Deanus leat dán jagi dihtton juo muhtun veardde ruoššaluosat. Erkinaro galledii Ohcejogas vahkkoloahpa áigge. Su mielde ruoššaluossa lea veháš boastto guolli, muhto jogas oaččosedje leat iešguđetge guolit eambbo. Luossariemuid oktavuođas goddojedje 54 kilo Detnui rivtteslágan guollešlája.

Professor Erkinaro mielde vel dán muttus lea eahpečielggas, ahte man olu ruoššaluosat leat gorgŋon Detnui. Jagis 2017 ruoššaluosat dihttojedje olu miehtá Atlántta dakkár báikkiin, gos dat eai leat dihtton ovdal.

Norgalaš luossabivdi Bjørn Tapio Kajander muitalii NRK ođđasis mannan bearjadaga, ahte Deanus ledje dihtton olu ruoššaluosat, 21 guoli golmma beaivvis. Čáhcesullos sullii 20 kilomehtera viestarii Vestre Jakobselvas meahcástan- ja guolástansearvvi lahtut áice maŋŋebárgga sullii 190 ruoššaluosa.

Ruoššaluossa goargŋu loahppageasi gođđut ja dan maŋŋá jápmá. Erkinaro mielde ruoššaluossa lea Deanus ja Njávdánjogas amas birrasis, iige dan leavvan leat ovdun.

Ruoššaluosa veajehat vulget Erkinaro mielde hui árrat njuolga merrii. Dat eai loavtte jogas dego atlánttaluosa veajehat, mat orodit jogas juoba golmmas guđa jahkái.

Luopmániid láddama šaddá vuordit vel miehtá Lappi

Luopmána váldošattu beassá čoaggit easkka áramustá suoidnemánu maŋimuš vahkus. Ná árvalit Luondduriggodatguovddáža dutki ja Ranua guovllu luomeoastit.

Ranualaš Taisto Illikainen oaidná, ahte luomečoaggima áŋgiramos áigodat sáhttá deaivat juoba borgemánu álgui.

Luondduriggodatguovddáža dutki Outi Manninen fas dadjá, ahte Lappis luomi lea čoagginláhkái juo suoidnemánu loahpas, erenoamážit maŋimuš vahkus.

Ranualaš muorjeoasti Reijo Sääskilahti árvala, ahte luopmánat láddet Ranuas beannot vahku geažes.

Luondduriggodatguovddáža mielde šaddoeinnostusa ii sáhte vel addit Lappis, go áicamat láttakeahtes luopmániin eai leat doarvái. Ranuas golbma luomeoasti árvalit, ahte báikkálaš šaddu ii leat dán gease nu áktánas. Luopmánat gávdnojit jáhkkimis buoremusat meahcceguovlluin. Rabas jekkiin galbma geasi oidnet váikkuhan luomešaddui.

Máddelis Suomas luomi lea juo báikkuid láddan, muitalit Luondduriggodatguovddážis.

Midnattsrocken-festivála álgá

Midnattsrocken-festivála álgá odne duorastaga 11.7. Leavnnjas, Porsáŋgguvuonas. Festiválas leat konsearttat duorastagas gitta lávvardatidjii.

Festiválas loaiddastit earet eará ISÁK-joavku, Ina Wroldsen, Backstreet Girls, Alan Walker ja Intrigue.

Festiválas gávnnat lassedieđuid Midnattsrocken-festivála neahttasiidduin.

Varrasamosat: Sápmi

Váldoođđasat

Varrasamosat

Muualla Yle.fi:ssä