Sápmi |

Oanehaččat: Máŋggabealat guobbaršaddu Lappis, oanehis áiggi guolástanlobit geasuhit, sámeguvlui váillahit dorvoruovttu ja vejolaš ohcat Sámi allaskuvlla oahpuide

Dás leat duorastaga oanehis ođđasat.

Sieni metsässä.
Lappii sáhttá dán agi boahtit máŋggabealat guobbaršattu. Govva: Niko Mannonen / Yle

Máŋggabealat guobbaršaddu Lappis

Lappis sáhttá dán jagi boahtit máŋggabealat guobbaršaddu.

Luondduriggodatguovddáža spesiáladutki Risto Jalkanen dadjá, ahte čoaska dálki sáhttá hiđásmahttit guobbariid šaddama, muhto seamma áigge arvvit dahket šattus máŋggabealaga.

Hearkkimus šlájat dego smierosguobbarat ja guolbbagusaguobbarat sáhttet čoaska dálkkiid dihte báhcit šattakeahttá, muhto ovdamearkka dihte kantareallat sáhttet leat čoagginláhkái Lappisge.

Oanehis áiggi guolástanlobit geasuhit

Oanehis áiggi guolástanlobit geasuhit bures. Meahciráđđehusas muitalit, ahte beaivvi dahje vahku fámus leahkki guolástanlobiid bivnnutvuohta lea lassánan seamma áigge go jahkelobiid vuovdin lea geahppánan.

Olbmot leat oastán oanehis áiggi lobiid eandalii dan maŋŋá, go riikkabeaivvit loktii guolástanlobi haddi diibmá. Dán rádjái leat vuovdán sulaid 170 000 guolástanlobi.

Váillahit dorvoruovttu sámeguvlui

Lappi eanagottis leat guhkes gaskkat, de danin váillahit eanet dorvoruovttuid. Dorvoruovttut leat oaivvilduvvon gaskaboddosaš orrumii, jos šaddá báhtarit ruovttus ovdamearkan veahkaválddi dihte. Dál davimus dorvoruoktu Lappi eanagottis lea Roavvenjárggas.

Lappi vuosttas- ja dorvoruovttu doaimmajođiheaddji Pirjo Kairakari váillaha dorvoruovttu sámeguvlui ja Mearra-Lappi guvlui. Kairakari mielde Lappi eanagoddái eai leat boahtimin lasi dorvoruoktobáikkit lagamus jagiid áigge. Sivvan lea dat, go dorvobáikkit leat Roavvenjárggas eanagotti olmmošlogu ektui eanet go eará sajis Suomas. Roavvenjárgga dorvoruovttus leat čieža báikki.

Vejolaš ohcat Sámi allaskuvlla oahpuide

Dál lea vejolaš ohcat Sámi allaskuvlla oahpuide báikkálaš sisaváldima bokte. Báikkálaš sisaváldima bokte sáhttá ohcat 1.8. rádjái.

Earret eará sámi journalistihka álgoálbmot perspektiivva mastergrádii sáhttá ohcat báikkálaš sisaváldima bokte. Lassin duoji, journalistihka ja sámegiela oahpuid iešguđege ovttaskas kurssaide lea vejolaš ohcat dál.

Eanet dieđu gávnnat dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä