Sápmi |

Oanehaččat: Mari Boine doarju Eurovision-boikohta, Jon Henrik Fjällgren lávlu vuosttasin, Soađegillái lasi gaskaboddasaš skuvlalanjat ja áittavuloš šlájaid árvvoštallan almmustuvvá

Loga dás bearjadaga oanehis ođđasiid.

Mari Boine ja KORK čuojahedje ovttas Guovdageainnus jagis 2012.
Govva: NRK

Mari Boine doarju Eurovision-boikohta

Eaŋgalasgielat The Guardian -aviissas badjel čuođi kulturbargi dorjot Eurovision-musihkkagilvvu boikohta. Kulturbargit leat almmuhan oainnuset aviissas ja gáibidit boikoteret Eurovision-musihkkagilvvu, go sii navdet Israel rihkkut olmmošvuoigatvuođaid. Maiddái Mari Boine lea vuolláičállán boikoterendoarjaga, čállá Ođđasat-neahttasiidu.

Ovdamearkka dihte Norga lea sáddemin Eurovision-gilvvuide KEiiNO-joavkku oktan lávlagiin Spirit in the sky. Dán lávlagis guovdageaidnolaš Fred Buljo juoigá. Buljo lea maid rámiidan sámi artisttaide ja Mari Boine das, ahte sii leat čuollan luotta sámemusihka ovdii musihkkamáilmmis.

Jon Henrik Fjällgren álggaha Ruoŧa Melodifestivalen

Lávlu ja juoigi Jon Henrik Fjällgren álggaha lávvardaga Ruoŧa Melodifestivalen-loahppagilvvuid lávlagiinnis Norrsken dahjege Goeksegh. Áššis muitalit neahttasiidu allas.se ja NRK Sápmi.

Ruoŧa oassegilvvus veahtaleaddjiid jiellat lea John Lundvik lávlagiin Too late for love. Son gilvvohallá logádin. Gilvvu loahpaha Arvingarna-joavku lávlagiin I do. Melodifestivalen-gilvvus válljejit Ruoŧa ovddasteaddji Eurovision-musihkkagilvui Israelii.

Soađegilli áigu skáhppot gaskaboddasaš visttiid Aleksanteri Kena skuvlii

Soađegili gielda áigu skáhppot lasi gaskaboddasaš visttiid Aleksanteri Kena skuvlla atnui. Áššis mearridii Soađegili čuvgehuslávdegoddi duorastaga, muitala Lapin Kansa -aviisa. Gaskaboddasaš visttiid áigot háhkat lasi juo boahtte čakčii, go mánát ja oahpaheaddjit leat gillán heajos sisáimmus Aleksanteri Kena skuvllas. Čuvgehuslávdegoddi mearridii ordnet gaskaboddasaš visttiid skáhppoma jođálmahttojuvvon vugiin, ja lanjat galggašedje leat anus dassážii go ođđa skuvlavisttit gárvánit.

Sámi guovllus maiddái Anára ja Ohcejoga skuvllain leat gillán sisáibmováttisvuođain.

Birasministeriija almmuha áittavuloš šlájain árvvoštallama

Birasministeriija almmuha otne Suoma luonddu áitatvuloš šlájaid dilis varrasamos árvvoštallama. Dutkanlágádusat ja biraseiseválddit leat čohkken dál viđát geardde ná viiddis árvvoštallama luonddušlájaid dilis ja boahtteáigge áitagiin. Masá bealli šlájain lea árvvoštallojuvvon.

Árvvoštallojuvvon šlájaid joavkkus leat eallit, guolit, lottit, šattut ja unnit luonddugáhppálagat nugo divrrit ja debbot. Nu gohčoduvvon Rukses girjji leat čohkken Suomas jagi 1994 rájes. Dáppe sáhtát lohkat lasi Rukses girjji birra.

Varrasamosat: Sápmi

Váldoođđasat

Varrasamosat

Muualla Yle.fi:ssä