Sápmi |

Oanehaččat: Meahciráđđehus geassáda turismarávvemis Ohcejogas, bivdet videodearvvuođaid Suoma skuvllaide, govvengilvu Barents nuorain ja dálvvi garrasamos buolaš Geavus

Dása leat čohkken maŋŋebárgga oanehis ođđasiid.

Giliviessu Giisá
Ohcejoga girkosiidda turisttaid rávvejit dán jagi giliviessu Giissás. Govva: Mikkâl Morottaja

Guldal dás maŋŋebárgga Yle Ođđasiid Sámis. Jietna: Yle Areena

Meahciráđđehus geassáda turismarávvenbálvalusain Ohcejogas

Meahciráđđehus ii áiggo šat dán jagi oassálastit turismarávvemii Ohcejoga márkanis. Ohcejoga gielda lea mearridan oastit turismarávvenbálvalusa Ohcejoga gilisearvvis ja Ohcejoga girkosiiddas turisttaid rávvejitge dán jagi giliviessu Giissás.

Turismarávven lea dán rádjai lágiduvvon Meahciráđđehusa luonddubálvalusaid ja Ohcejoga gieldda ovttasbargun. Dan maŋŋá go Meahciráđđehusa Luonddustohpu Ohcejoga márkanis bulii guokte jagi dassái, lea turismarávven lágiduvvon gaskaboddosaš sajis Ohcejoga Áilegasdálus. Álbmotmeahccehoavda Pirjo Seurujärvi muitala, ahte turismarávvemis mearridedje luohpat earret eará danin go gaskaboddosaš sajiin leamašan nu unnán guossit.

Bivdet álbmotbeaidearvvuođaid Suoma skuvllaide

Sámediggi ja oahpahusráđđehus bivdet olbmuid sáddet videodearvvuođaid Suoma skuvllaide sámi álbmotbeaivái. Videodearvvuođat almmustahttojuvvojit Oktavuohta-neahttasiiddus, mii fállá dieđu sápmelaččaid birra.

Videos sáhttá muitalit iežas birra ja juoidá sámekultuvrras, ovdamearkka dihte sáhttá oahpahit muhtin divtta, dajaldaga dahje lávlaga. Videoid sáhttá govvet jierbmetelefovnnain ja sáddet WhatsApp bokte nummirii (+358) 41 720 29 54.

Govvengilvvuin čalmmustahttet Barentsguovllu nuoraid

Discover Barents -govvengilvvu fáddán lea dán jagi Barentsguovllu Nuorat. Barents guovloráđđi háliida gilvvuin čalmmustahttit Barentsguovllu nuoraid árgabeaivvi. Govvengilvui sáhttá oassálastit gii beare cuoŋománu loahpa rádjai.

Vuoiti almmuhuvvo geassemánu vuosttas beaivve. Golbma buoremus govvejeaddji ožžot 1 000 euro, 750 euro ja 500 euro sturrosaš ruhtabálkkašumiid. Lassidieđut gávdnojit Discover Barents-neahttasiiddus.

Geavus mihtiduvvon dálvvi garrasamos buolašceahkit

Dán dálvvi garrasamos buolašceahkit mihtiduvvojedje Ohcejogas vuossárgga. Ohcejoga Geavus lei eahkes logi áigge 39 buolašceahki.

Yle meteorologa Joonas Koskela muitala, ahte dál lea juo bivaldišgoahtán Geavus. Son iige jáhke, ahte dáid beivviid doppe šat mihtidit garrasut buollašiid.

Varrasamosat: Sápmi

Váldoođđasat

Varrasamosat

Muualla Yle.fi:ssä