Sápmi |

Oanehaččat: Njellima geainnu divvumis badjel 2 miljon euro lassirehket, Sámi musihkkaakademiija giđđakonsearta Anáris ja Ohcejogas, euroválggaid ovdajienasteapmi álgá ja guolástanlobiid fidne boahtte vahkus

Dá leat gaskavahku oanehis ođđasat.

Nellimin tietyömaa Koiravaarassa.
Njellima geainnu boltunbargguid leat gártan bargat eanet go vurde, dadjá prošeaktahoavda Keijo Heikkilä. Govva: Sara Wesslin / Yle

Dá gulat gaskavahku Yle Ođđasiid Sámis. Jietna: Yle Areena

Njellima geainnu divvun šaddamin badjel guokte miljon euro divrasabbon

Njellima geainnu divvun lea šaddamin divrasabbon go árvaledje. Geaidnobargguide várrejedje álgoálggus badjelaš 11 miljon euro, muhto dál golut lea šaddamin sullii 14 miljon euro ovddas.

Johtolatdoaimmahaga dahjege Väylävirasto prošeaktahoavda Keijo Heikkilä dadjá, ahte lassigolut šaddet das, go boltunbargguid leat gártan bargat eanet go vurde, dan dihtii go geaidnovuođu bákteávnnas ii lean doarvái garas. Dasa lassin johtolatdoaimmahat lea mieđihan lassiruđa Njellimjoga šaldi ođasmahttimii, mii ii lean álgoplánain mielde. Heikkilä mielde johtolatdoaimmahagas lea ráđđi máksit badjelmearalaš goluid.

Njellimii huksejit ođđa geainnu 20 kilomehtera ovddas. Divvunbargguid álggahedje ođđajagimánus 2018 ja geaidnu galggašii leat gárvvis loahppačavčča bealde.

Sámi musihkkaakademiija giđđakonsearta Anáris ja Ohcejogas

Sámi musihkkaakademiija lágida studeanttaid giđđakonseartta otne gaskavahku Ohcejogas ja ihttin duorastaga Anáris.

Sámi musihkkaakademiija lohkanbaji 2018–2019 giđđakonsearttas gullo árbevirolaš ja modeardna sámemusihkka. Seammás Sámi musihkkaakademiija almmustahttá lohkanbaji studeanttaid čállin ođđa sámegielat lávlagiid, maiddái Sámi oahpahusguovddáža medialinjá oahppit leat govven musihkkavideoid.

Konsearttain loaiddastit Sámi musihkkaakademiija jahkekurssa 2018–2019 studeanttat Aimo Aikio, Heli Aikio, Mihkku Laiti, Jouna Raudasoja ja Pauli Saijets.

Äigittemeh – Áiggeheamit – Ääi’jtee’m -giđđakonsearta lea Ohcejohnjálmmi skuvlla sáles gaskavahku diibmu 18.00–20.00 ja duorastaga seamma áigge Sámekulturguovddáš Sajosis Anáris. Konsertii lea nuvttá sisabeassan.

Sámi musihkkaakademiija
Sámi musihkkaakademiija jahkekurssa 2018-2019 studeanttat Pauli Saijets, Jouna Raudasoja, Heli Aikio, Mihkku Laiti ja Aimo Aikio. Govva: Sámi musihkkaakademiija

Europarlameantaválggaid ovdajienasteapmi álgá

Europarlameantaválggaid ovdajienasteapmi álgá otne gaskavahku ja bistá maŋŋebárgga miessemánu 21. beaivvi rádjai.

Anára gielddas jienastanbáikkit leat juohke ovdajienastanbeaivve Avvilis gielddaviesus ja árgabeivviid maid Anára márkanis sámegirjerádjosis. Dasa lassin girjerádjobiila johtá gaskavahku Njellimis ja Suoločielggis, duorastaga Lismmás, Menešjávrris ja Gápmasis, bearjadaga Njávdámis, Čeavetjávrris ja Bárttehis ja vuossárgga vel Rivdolis ja Áŋŋelis.

Ohcejogas jienastanbáiki lea gaskavahku, duorastaga ja maŋŋebárgga Ohcejoga gielddaviesus, bearjadaga ja lávvardaga Gáregasnjárgga lihkadanhálla Njálas ja vuossárgga Njuorggáma skuvllas.

Eanodagas ovdajienasteapmi lea árgabeivviid gielddaviesus ja dasa lassin girjerádjobiila johtá gaskavahku Gilbbesjávrri, Gárasavvona, Gulddáma ja Guhttása guovllus, duorastaga Bálojohnjálmmi, Soaŋgemuotkkis, Muotkejávrri, Neakkela, Bálojávrri ja Leaibejávrri guovllus ja bearjadaga Bealdovuomis, Ylikyrös, Kyrös ja Vuottesjávrris.

Soađegilis sáhttá jienastit gielddaviesus juohke jienastanbeaivve ja dasa lassin girjerádjobiila johtá gilážiin. Vuohčus dat johtá vuossárgga.

Dárkilut áiggiid ja báikkiid sáhttá dárkkistit Riekteministeriija válgasiiddus. Evttohasaid oaiviliidda sáhttá oahpásmuvvat Yle válgamášenis.

Virggálaš válgabeaivi lea sotnabeaivve miessemánu 26. beaivve.

Davimus Suoma guolástanlobiid vuovdigohtet maŋŋeleappos go dábálaččat

Davimus Suoma guolástanlobiid vuovdigohtet dán giđa maŋŋeleappos go dábálaččat. Lobiid eai álgge vuovdit, ovdal go Eana- ja meahccedoalloministeriija lea nannen báikki olbmuide dárkkuhuvvon bivdobadjelobi hatti.

Meahciráđđehusas árvalit, ahte sihke báikki olbmuid johkalobiid stággobivdui ja olgobáikegotti olbmuid jándorlobiid besset vuovdit boahtte vahkus.

Njávdánjoga guolástanlobiid mieđihit Čeavetjávrris

Meahciráđđehus mieđiha boahtte vahkus Čeavetjávrris guolástanlobiid, maiguin beassá guolástit Njávdánjogas. Lobit leat vuovdimassii Čeavetjávrris boahtte maŋŋebárgga miessemánu 21. beaivvi diibmu 10.00–14.00 gaskkas. Lobiid sáhttá diŋgot maid ovddalgihtii Meahciráđđehusas.

Luosa fierbmebivdolobiid mieđihit Čeavetjávrri ja Njávdáma gilis orru dállodoaluide Njávdánjoga guolástannjuolggadusa mielde.

Varrasamosat: Sápmi

Váldoođđasat

Varrasamosat

Muualla Yle.fi:ssä