Sápmi |

Oanehaččat: Njellimis bulii barta, Vuohčus dállu, Viäskoonjarggâ guovžžaide ii spiehkastatlohpi, ođđa musihkkafestivála álggaha Anáris, Skábmagovaide ohcet veahkkebargi

Dá leat bearjadaga oanehis ođđasat.

Karhuemo ja kolme poikasta metsässä, taustalla kaatunut ja kelottunut puu
Viäskoonjarggâ guovžžaide ledje ohcan spiehkastatlobi, muhto dan eai mieđihan, go dat eai leat dagahan olu vahágiid. Govva: Birgitta Tarvainen

Njellimis bulii barta, Vuohčus dállu

Hirsabarta lea buollán Njellimis. Gádjunlágádus oaččui dieđu buollimis eahkedis ovcci maŋŋá. Go gádjunveahka ollii Njellimii, barta bulii olles leavttuin, muhto buollin ii lean leavvan guhkkelebbui.

Olmmošvahágat eai leat dáhpáhuvvan. Poles dutká buollinsiva.

Maiddái Vuohčus bulii ikte dállu. Buollima áice rádjegohcinlágádusa helikopteris, mii lei girdimen guovllus. Almmuhus buollimis bođii ikte veaigin, njealji áigge.

Vuhččui sáddejedje buollinčáskadanveaga Avvilis, Suoločielggis ja Soađegilis. Vel eai dieđe manne dállu buollái. Vuohču buollimis eai dáhpáhuvvan olmmošvahágat.

Viäskoonjarggâ guovžžaide eai mieđihan spiehkastatlobi

Suoma fuođđoguovddáš ii leat mieđihan spiehkastatlobi Viäskoonjarggâ guovžžaide. Spiehkastatlobi ledje ohcan guovžžaide, mat johtet Viäskoonjarggâ gili láhkosis ja boltot bajás hávdáduvvon šibihiid.

Fuođđoguovddáža mearrádusa mielde spiehkastatlobi eai mieđit, dasgo guovžžaid eai leat geahččalan jáget eret, eaige dat leat dagahan eará vahágiid.

Lobi ohcan šibitdoallit baicce galget hávdádit jápmán šibihiid vel čiekŋalebbui eatnamii ja gokčat daid buorebut.

Ođđa musihkkafestivála álggaha Anáris

Vahkuloahpas lea vejolašvuohta návddašit ođđa musihkkafestiválas, go vuosttas gámmármusihkkafestivála (su. kamarimusiikki) ordnejuvvo Anára guovllus.

Sotnabeaivve 22.9.2019 diibmu 17:00 lea gullamis Anára girkus konsearta, man namma lea Sálbmagirji - Virsikirja. Mielde konsearttas lea musihkkár Anna Näkkäläjärvi-Länsman.

Konsearttat leat vahkuloahpas maiddái Suoločielggis ja Kakslauttanenis.

Bearjadaga 20.9.2019 lea Suoločielggi kapeallas Uneton yö -konsearta diibmu 18.00. Lávvardaga lea Hengähdys, Riikinkukko ja tansseja -konsearta Kakslauttanen Artic Resorttas diibmu 20:00.

Festivála lea ulbmil dás duohko ordnet áli ruškki áigge, go eanaš dáhpáhusat ordnejuvvojit dábálaččat geassit.

Ohcet Skábmagovaide veahkkebargi

Skábmagovat filbmafestivála ohcá veahkkebargi. Veahkkebargi bargun lea earret eará koordineret eaktodáhtolašbargiid, veahkehit mánáid- ja nuoraid beaivvi buvttadeamis ja olu eará ordnestallamat.

Bargu álgá 2.12.2019 ja bistá 31.1.2020. Ohcanáigi nohká bearjadaga 27.9.2019.

Barggus gáibiduvvo buorre eaŋgalasgiela dáidu. Sámegiela dáidu gehččojuvvo ohccái buorrin.

20.9.2019 diibmu 9:48 Ođas beaividuvvon dieđuin, ahte buollimiin eai leat dáhpáhuvvan olmmošvahágat.

Varrasamosat: Sápmi

Váldoođđasat

Varrasamosat

Muualla Yle.fi:ssä