Sápmi |

Oanehaččat: Nuortalaččaid ásaiduhttima ávvudoalut lávvardaga, Lappii lagabui čieža miljovnna euro fitnodatruhtadeapmi, čuoigantuvra rádjeavádahkii buvttii čuđiid euroid sáhkuid ja Amazona arvevuvddiin logit duháhat meahccebuollimat

Dás leat vahku maŋimuš oanehis ođđasat.

Kolttasaamelaisten asuttamisjuhlan 70-vuotisjuhlat
Nuortalaččaid ásaiduhttima 70 jagi ávvudoalut ordnejuvvojit Čeavetjávrris lávvardaga 24.8. Govva: Saaʹmi kultturfondd

Nuortalaččaid ásaiduhttima ávvudoalut lávvardaga

Lávvardaga 24.8. Čeavetjávrris ordnejuvvojit nuortalaččaid ásaiduhttima 70 jagi ávvudoalut. Gudneguossin doaluide leat bovden buohkaid badjel 70-jahkásaš nuortalaččaid. Buohkaide rabas doaluide vurdet badjel guđalogi gudneguossi lassin čuđiid eará gussiid.

Ávvubeaivi álgá ortodoksalaš liturgiijain. Váldodoaluid prográmmas leat earet eará sáhkavuorut leuʹdd ja katrillačájáhus. Ávvubeaivvi áigge guovllus ordnejuvvojit márkanat ja bargobájit, ja eahkedis lea vel konsearta.

Vuosttaš háve nuortalaččaid ásaheami ávvudoalut ordnejuvvojedje borgemánus 1979, go nuortalaččaid ásaheamis lei gollan golbmalogi jagi. Dan maŋŋá doaluid leat ordnen logi jagi gaskkaid.

Nuortalaččaid ásaheami 70 jagi ávvudoaluid suodjaleaddjin doaibmá dásseválddi presideanta Sauli Niinistö.

Lappii lagabui 7 miljovnna euro fitnodatruhtadeapmi

Lappii lea juolluduvvon 6,9 miljovnna euro ovddas fitnodatruhtadeapmi investeremiidda. Ruhtajuolludemiin mearridii Davvi-Nuortabađaeatnama EBI-guovddáš.

Eanemus ruhtadeami oaččui Kakslauttanen Arctic Resort Oy, badjelaš 2,7 miljovnna euro. Oktiibuot EBI-guovddáš lea juolludan cuoŋo-geassemánus fitnodatdoarjagiid 25 lappilaš fitnodahkii. Ruhtadeamit bohte EU guovloovddidanruhtarájus.

Čuoigantuvra rádjeavádahkii buvttii čuđiid euroid sáhkuid

Lobi haga rádjeavádagas čuoigan almmái lea dubmejuvvon sáhkuide Lappi gearretrievttis. Dáhpáhus geavai Anára Ráji-Jovssehis beannot jagi dassái.

Almmái šiittii iežas sivalašvuođa rihkkosii, muhto muitalii ahte lei lahppon muohttaga dihte rádjeavádahkii. Lappi gearretriekti gávnnahii, ahte almmái lei čuoigan gávcci kilomehtera rádjeavádagas ja lei sivalaš láivves stáhtarádjerihkkosii. Duopmun bođii logi beaivesáhku, main čoggui máksinláhkái 350 euro. Duopmu ii leat vel lágafámolaš, nappo das sáhttá váidit alit riektedásiide.

Amazona arvevuvddiin logit duháhat meahccebuollimat

Vuovdebuollimat leat lassánan sakka Amazon arvevuvddiin Brasilias. Vuvddiid boldet dál jođáneappot go goassege dan áigodagas, go arvevuvddiid leat bearráigeahččan satelihtain jagi 2013 rájes.

Dán jagi Amazonas leat leamašan lagabui 73 000 vuovdebuollima. Mearri lea 83 proseantta eanet go diibmá.

Amazona eanandoallit njásket ođđa bealdduid geasi áigge ja dalle lea maiddái hui goikkis. Dán jagi vuvddiid leat boaldán earenomáš viidát, ja buollimat ja suovva leatge dagahan váttisvuođaid ja hehttehusaid miehtá Brasilia.

Varrasamosat: Sápmi

Váldoođđasat

Varrasamosat

Muualla Yle.fi:ssä