Sápmi |

Oanehaččat: Ođđa Biibbal, sámekultuvrra oahppodiibmu ja videodearvvuođat neahtas, Lehtola duodječoakkáldat Siidii, Avvila seaŋgaossodagas galledangielddus ja doarjjaolbmot mánnabearrašiidda

Loga dás gaskavahku oanehis ođđasiid.

Biibbal
Biibbala Ođđa testameantta davvisámegielat jorgalus gárvvásmuvai ođđa čállinvugiin 1998. Govva: Aletta Lakkala / Yle

Ođđa biibbaljorgalus almmustahtto neahtas

Ođđa davvisámegielat biibbaljorgalus almmustahtto digihámis otne Sámi álbmotbeaivve. Jorgalus almmustuvvá Raamattu.fi -neahttasiiddus ja maiddái Piplia-applikašuvnnas. Sihke neahttasiidu ja Piplia-applikašuvdna leat jorgaluvvon davvisámegillii. Davvisámegielat jorgalussii rahppojuvvo maiddái iežas čujuhus, biibbal.fi.

Boahtte gease jorgalus almmustuvvá girjin. Davvisámegiela Biibbala atnuiváldima ávvudoalut ordnejuvvojit Guovdageainnus 23.–25.8.2019 ja Ohcejogas 1.9.2019.

Biret-Ánne Lehtola duodječoakkáldat skeŋkejuvvo Siidii

Duojár Biret-Ánne Lehtola, Niillasaš Biret Biret-Ánne (i.g. Pieski) duodječoakkáldat skeŋkejuvvo Sámemusea Siidii Sámi álbmotbeaivve. Skeŋkendilálašvuohta álgá Siidda auditorias diibmu 9.30. Dilálašvuođas beassá oaidnit Biret-Ánne Lehtola duodječoakkáldaga ja Lehtola nieida, Irma Lehtola, muittaša eadnis duojárin.

Biret-Ánne Lehtola lei eret Gáregasnjárggas ja fárrii Anárii 1940–1950-loguid doajáldagas. Son barggai teavstta dárkkisteaddjin Sábmelaš-aviissa prentehusas ja mánnabearraša árgga divššodettiin duddjui. Son lei mielde Sábmelaš Duoddjárat -searvvi doaimmain dan vuođđudeami 1975 rájes ja lei searvvi ságádoalli jagiin 1990–1994.

Biret-Ánne Lehtola árbbolaččat vurkejedje eadnis duodječoakkáldaga Siidii jagi 2009. Skeŋkejumi mielde čoakkáldat sirdása oassin Sámemusea čoakkáldagain. Čoakkáldat sisttisdoallá 83 dávvira ja das leat earret eará liinnit, fáhcat, gahpirat, guvssit ja niibbit.

– Sámemusea Siidda čoakkáldagaid geahččanguovllus Biret-Ánne Lehtola dujiin erenomážat leatge čehpet ráhkaduvvon báhkke- ja dákteduojit, daningo čoakkáldagain eai jur leat nissoniid ráhkadan garraduojit, Siidda dieđáhusas muitalit.

SOG ordne virtuála sámekultuvrra skuvladiimmu

Sámi oahpahusguovddáš lágida álbmotbeaivve sámekultuvrra live-oahppodiimmu. 45 minuhta oahppodiibmu streamejuvvo diibmu 12 rájes čujuhusas sogku.fi/live. Dat lea oaivvilduvvon buohkaide, muhto erenoamážit vuođđoskuvlla oahppiide.

Live-oahppodiimmus sámenuorat muitalit áigeguovdilis dieđuid sápmelašvuođas. Dasa lassin čájehuvvojit videodearvvuođat miehtá Sámi ja oanehisfilmmat ja muitalit maiddái, gos gávdno diehtu sápmelaččain ja mo sámegielaid beassá stuđeret.

Álbmotbeaidearvvuođat Sámedikkis ja oahpahusráđđehusas

Sámi álbmotbeaivve oktavuohta.com-neahttasiidui bohtet oaidninláhkai iešguđet videodearvvuođat. Sámi álbmotbeaidearvvuođaid celket earret eará Sámedikki ságadoalli Tiina Sanila-Aikio, oahpahusministtar Sanni Grahn-Laasonen ja oahpahusráđđehusa bajimus hoavda Olli-Pekka Heinonen. Dasa lassin buohkat geat háliidit, sáhttet sáddet iežas videodearvvuođaid oktavuohta.com-siidui.

Gildet gallestallamis Avvila seaŋgaossodagas

Avvila dearvvašvuođaguovddáža seaŋgaossodaga ii oaččo dál galledit. Galledemiid leat gieldán guovvamánu álggu rájes danin go seaŋgaossodagas njoammugođii norovirus. Dearvvašvuođaguovddážis dieđihit, ahte buot galledemiid, maid beare sáhttá, gánneha dál sirdit maŋŋelabbui. Gallestallangildosa guhkkodagas eai vel dieđe.

Eanodaga gielda ohcá eaktodáhtolaš doarjjaolbmuid mánnabearrašiidda

Eanodaga gielda ohcá eaktodáhtolaš doarjjaolbmuid ja doarjjabearrašiid mánáid árgabeaivvi doarjjadoaimmaide. Gielda lea álggaheamen mánáid ja mánnabearrašiid doarjjadoaimma, man ulbmilin lea ovddidit mánáid ja nuoraid buresveadjima ja eastadit váttisvuođaid. Seammás geahččalit maiddái doarjut váhnemiid veadjima.

Jurddan lea, ahte doarjjaolmmoš ja mánná deaivvadeaba moddii mánus ja bargaba juoidá ovttas. Doarjjabearaš fas sáhttá váldit máná iežas lusa ovtta vahkkolohppii oktii mánus. Eanodaga gieldda sosiáladoaibma oahpista ja rávve eaktodáhtolaččaid doarjjadoaimmaide.

Lassidieđuid doarjjadoaimmas oažžu Eanodaga gielddas.

Varrasamosat: Sápmi

Váldoođđasat

Varrasamosat

Muualla Yle.fi:ssä