Sápmi |

Oanehaččat: Ođđa Frozen-ealligova trailerfilmmas Sámi luondu ja juoigan, meahccelappalaččaid bargobádji Soađegilis, gielddain heajos ruhtadilli, Eanodaga boarrásiidsiidda huksema háliidit álggahit

Dá leat bearjadaga oanehis ođđasat.

Disneyn Frozen 2 video sijoittuu syksyiseen Saamenmaalle.
Frozen 2 -tráilerfilmmas oidno dego Sámi johkaleagi luondu ruškki ivnniiguin. Govva: WALT DISNEY ANIMATION STUDIOS

Guldal dás Yle Ođđasat. Jietna: Yle Areena

Ođđa Frozen-filmmas Sámi luondu ja juoigan

Beakkán Frozen-ealligova guvttešoasis lea almmustuvvan filbmabihtáš. Frozen 2:žii, mii almmustuvvá skábmamánus, leat váldán málle Sámis.

Disney olbmot, earret eará bagadalliguovttos Chris Buck ja Jennifer Lee, leaba fitnan Sámis sihke Suoma ja Norgga bealde čoaggimin dieđuid ealligova váras.

Frozen 2 -tráilerfilmmas oidnoge dego Sámi johkaleagi luondu ruškki ivnniiguin, ja duogábealde gullo juoigan. Musihkkii lea bidjan nuohta musihkar Frode Fjellheim. Frozen 2 -tráilera sáhttá geahččat Youtubes.

Vuosttas Frozen-filbma, mii almmustuvai 2013, lea máilmmi buot áiggiid eanemus ruđa dahkan animašuvdnaealligovva.

Meahccelappalaškultuvrra čielggadeaddji bargobádji Soađegilis

Meahccelappalaškultuvrra čielggadeaddji dutkanprošeakta ordne vuosttas bargobáji Soađegilis boahtte sotnabeaivvi, guovvamánu 17. beaivve.

Suoma stáhtaráđi kansliija juolludii mannan miessemánus 80 000 euro meahccelappalaškultuvrra iešvuođaid čielggadeapmái. Ulbmilin lea guorahallat, mii meahccelappalašvuohta lea, mo dan sáhttá ovddidit ja mo dasa iežaset identifiserejeaddji olbmuid identitehta sáhttá nannet.

Vuoigatvuohtaministeriija válljii dutkamuša dahkkin MDI Public Oy -konsultafitnodaga. Konsultafitnodagas muitalit, ahte sii gieđahallat vuosttas bargobájis čielggadanbarggus dahkkon vuosttas fuopmášumiid.

Bargobádji lea rabas dušše ovddalgihtii almmuhan olbmuide, geat identifiserejit iežaset meahccelappalažžan.

Gielddat báhcán dáhpaga beallái

Suoma gieldalihttu lea fuolas gielddaid ruhtadilis. Diimmáža loguid mielde guokte-goalmmátoasi gielddain báhce dáhpaga beallái.

Gieldalihtu doaimmajođiheaddji Minna Karhunen dadjá, ahte gieldaekonomiija lea dál kriissas iige stáhta sáhte addit gielddaide šat ođđa bargguid dahje ovddasvástádusaid lassiruhtadeami haga. Gieldalihtu mielde gielddaid heajos ruhtadili sivvan lea dat, go vearroboađut ja stáhtadoarjagat leat unnon ja gielddaid golut fas leat lassánan.

Gielddaid ruhtadiliin leat goit stuorra erohusat. Oaivegávpotguovllus gielddain manná bures ja dat leat máŋggaidlogiid miljovnnaid vuoittu bealde. Lappis dáhpaga beallái báhce diibmá oktiibuot 11 gieldda, go ovddit jagi dušše golmma gielddas lei vuolláibáza.

Heajumus ruhtadilli ássiidlogu ektui lea Savukoskis, Roavenjárggas, Ranuas ja Giemas. Maiddái Giemajávrris, Muonás, Pelkosenniemis, Pellos, Simos, Soađegilis ja Durdnosis báhce dáhpaga beallái.

Eallinfápmolávdegotti evttohus: Eanodaga boarrásiidsiidda huksen dán jagi investerenprográmmii

Eanodaga gieldda eallinfápmolávdegoddi evttoha gielddaráđđehussii, ahte ođđa boarrásiidsiidda huksen lasihuvvo jagi 2019 investerenprográmmii.

Eallinfápmolávdegoddi evttoha, ahte gielda hukseha Heahtá girkosiidii ođđa boarrásiidsiidda ja dasa boađášedje 20 beavttálmahttojuvvon bálvalanássama lanja ja logi bálvalaássama lanja. Huksenbáikin eallinfápmolávdegoddi evttoha eatnama, mii lea girku ja Heahtá beaivedivššu duohken.

Ođđa boarrásiidsiidda hukseheapmi šaddá lávdegotti rehkenastimiid mielde máksit vádjit 3,3 miljovnna. Eanodaga váldostivra mearridii diibmá, ahte hukseha ođđa boarrásiidruovttu, mii deavdá dálá áigge standardaid.

Ulbmilin lea, ahte gielda lea ođđa boarrásiidsiiddas láigolažžan. Gielddaráđđehus gieđahallá ášši boahtte vuossárgga.

Varrasamosat: Sápmi

Váldoođđasat

Varrasamosat

Muualla Yle.fi:ssä