Sápmi |

Oanehaččat: Oahpahusministera mielas sámeoahpahusa galggašii geahčadit ollisvuohtan, ruhtaministeriija bušeahttaárvalusas sámemearreruđaid ovddeš dásis, Yle Ođđasat álget, Ijahis ijas galledeaddjiolahus ja boles sáhkuhii

Loga dás vuossárgga oanehis ođđasiid

Li Andersson
Li Andersson galledii Anáris 17.–18.8.2019. Govva: Kaija Länsman

Oahpahusminister: Sámeoahpahusa galggašii geahčadit ollisvuohtan

Anáris galledan Suoma oahpahusminister Li Andersson mielas sámeoahpahusa ja sámegiela ovddideami hástalussan lea dat, ahte máŋggaid doaimmaid leat jahkeviissaid ovddidan prošeavttaiguin.

Andersson mielas sámeoahpahus galggašii geahčadit ollisvuohtan vai oainnašii, masa ruđa gánniha geavahit boahtte áiggis.

Ovdamearkka dihte sámedikki oahppomateriáladoaimmahat lea ovdalis sávvan oažžut sámi oahppomateriálaruđaide miljovnna euro mearreruđa jahkásaččat.

Oahpahusminister Li Andersson oaidná, ahte nie stuorra mearreruđa mieđiheapmi ii leat realisttalaš dán dilis.

– Miljovnna orru hástaleaddji. Stáhtaministeriija bušeahttaárvalusas oahppomateriálaide čujuhuvvon mearreruhta jahkkái 2020 lea 500 000 euro.

– Sámeoahpahusa galggašii geahččat ollisvuohtan ja dutkat, mat leat hohpolamos áššit, maidda lasseruhtadeapmi dárbbašuvvo. Daid galggašeimmet geahčadit ovttas sámedikkiin ja ministeriijas, dadjá Andersson.

Oahpahusminister Li Andersson galledii Anáris bearjadaga ja lávvardaga. Son válddii oasi sámedikki nuoraidráđi ja stivrra ordnen sámeáššiid skuvlejupmái, mii lei čujuhuvvon sierra suorggi virgeolbmuide.

Ruhtaministeriija bušeahttaárvalusas sámemearreruđat ovddit jagi dásis

Ruhtaministeriija bušeahttaárvalusas eanaš sámiide dárkkuhuvvon mearreruđat evttohuvvojit bisuhit jagi 2019 dásis.

Ruhtaministeriija evttoha jagi 2020 bušeahttaárvalusastis sámi oahppomateriálaide 500 000 euro. Sámi giellabeassedoibmii ruhtaministeriija evttoha 1,2 miljovnna euro.

Dasa lassin ruhtaministeriija boahttejagi bušeahttaárvalusas leat mearreruđat sámediggeválggaid válgagoluide, sámegielat sosiála- ja dearvvasvuođa bálvalusaid buvttadeapmái, Sámi oahpahusguovddáža doibmii ja sámi giella- ja kulturiešhálddašeami ollašuhttimii.

Bušeahtas lea maiddái čuokkis sámi soabadallanproseassa ovddideamis. Dasa lea várrejuvvon juo jagi 2019 bušeahta oktavuođas 1,5 miljovnna euro. Dán ruđa sáhttá geavahit gitta 2021 rádjái, dadjá ráđđádalli virgeolmmoš Lauri Taro stáhtaráđis.

Ruhtaministeriija bušeahttaárvalus almmuhuvvui bearjadaga 16.8.2019. Ráđđehus joatká bušeahta valmmaštallama čakčamánus ja boahtte jagi bušeahtta dohkkehuvvo loahppa jagis.

Ruhtaministeriija bušeahttaárvalusa sáhttá oaidnit dáppe.

Yle Ođđasat oidnogohtet fas

Vuossárgga 19.8.2019 rájes oidnogohtet fas tv-ođđasat. Yle Ođđasat oidnogohtet vuot juohke árgabeaivve diibmu 16.45 Yle TV 1:žis.

Davviriikalaš sámegielat Ođđasat oidnojit maid juohke árgabeaivve maŋŋit eahkedis Yle TV 1:žis.

Ijahis ijas galledeaddjiolahus – 3 500 olbmo gallededje festivála

Suoma áidna sámemusihkkafestivála Ijahis idja juvssai dánge jagi guosseolahusa. Oktiibuot 3 500 olbmo gallededje dáhpáhusas, mii ordnejuvvui Anáris 16.–17.8.2019. Jagis 2018 festiválas gallededje 3 200 olbmo. Bivnnuhamos dáhpáhusbeaivi dqn jagi lei bearjadat, muitalit festivála neahttasiiddus.

Festivála maiddái streamejuvvui. Neahttavideosáddaga čuvvo bearjaga ja lávvardaga oktiibuot 1 537 geahčči.

Ijahis idja -festivála ordnejuvvui dál 16. geardde.

Boles sáhkuhii menddo garra leavttuin

Boles čálii mannan vahkuloahpa áigge 94 sáhku geainnuid alde Anáris ja Ohcejogas. Eanaš sáhkuid ožžo menddo garra leavttuin vuodjimis ja golbma vuoddji masse vuodjengoartta liige garra leavttuid dihte.

Boles maid bosuhii vahkuloahpa áigge oktiibuot 500 vuoddji, muhto ii gávdnan ovttage gárrenoaivvis vuoddji. Earenoamážit boles rámiida Jänkhällä Jytisee -dáhpáhusa mohtorsihkkelastiid, go sis ii sáhkohallan oktage.

Lappi boleslágádusa polespatrullat bearráigehčče johtolaga Anár ja Ohcejoga guovllus vahkuloahpas.

Varrasamosat: Sápmi

Váldoođđasat

Varrasamosat

Muualla Yle.fi:ssä