Sápmi |

Oanehaččat: Ohcejoga gielddaráđđehus hálida gieldit čáhceskohteriid, ođđa kárta signála hehttemis, sámediggái golbma ođđa virggi, Sipilä galleda davimus Sámis

Dása leat čohkken gaskavahko oanehis ođđasiid.

Vesijetti vauhdissa Ounasjoella Rovaniemellä.
Čáhceskohter Ovnnešjoga alde. Govva: Jarmo Honkanen / Yle

Radioođđasat 13.2.2019 diibmu 7.30. Jietna: Yle Areena

Ohcejohka háliida gieldit čáhceskohteriid

Ohcejoga gielddaráđđehus guottiha jurdaga gieldit čáhceskohteriin vuojašeami Deanu čázádagas. Gielda ákkastallá ášši dainna, go Deanu čázádat lea eanas osiin meahcceguovlu ja čáhceskohterat hehttešedje nu luondduráfi go jogaid virkkosmahttingeavahusa.

Vearrámus áššin dollojuvvo vuojániid jidnesvuohta. Gieldda mielas vuojániid fárus jogaide sáhttet leavvat maid luossapárasihtat. Jidnes vuojánat sáhttet hehttet maid luosaid goargŋuma jogaide. Ohcejoga gielddaráđđehus attii cealkámušas vuossárgga Lappi EJB-guovddážii.

Ođđa kárta signála hehttemis

Norgga eiseválddit leat almmustahttán kártta, man mielde Ruošša GPS-signála hehtten olahii viidát maid olles Suoma beale Sápmái mannán skábmamánus dollojuvvon soahtehárjehusaid áigge.

Signálahehttenrusttegat ledje dušše 16 kilomehtera duohken Norgga rájás ja sullii 100 kilomehtera duohken Suoma rájás. Kártta mielde Suoma bealde GPS-signála hehtten olahii viidát Anára ja Ohcejoga lassin gitta Eanodaga gieldda nuortaosiide. Ruošša lea šiitán hehttema.

Sámediggái golbma ođđa virggi

Sámediggi leat vuođđudeamen ođđa virggiid. Sámedikki čuovvovaš čoahkkima áššelisttus leat ealáhusčálli, riikkaidgaskasašáššiid čálli ja dieđihančálli virggiid vuođđudeapmi. Sámedikki čuovvovaš ollesčoahkkin dollojuvvo guovvamánu 19. beaivvi Anáris.

Ođđa virggiid vuođđudeami lassin čoahkkináššin leat maid virgeválljemat. Sámedikki ollesčoahkkin galgá válljet ovdamearkan láhkačálli, masa ledje golbma ohcci. Áššelisttus leat maid Sámedikki jagi 2018 doaibmačilgehus ja ságajođiheaddji ja Sámedikki sierra orgánaid ovddasteaddjiid čilgehusat ovddiduvvon áššiin. Čoahkkima sáhttá čuovvut diibmu 10.00 rájes maid interneahta bokte.

Sipilä galleda davimus Sámis

Stáhtaministtar, guovddášbellodaga Juha Sipilä galleda loahppavahkus Anára ja Ohcejoga gielddain. Galledeapmi álgá bearjadaga Gáregasnjárggas, gos son diibmu 19.30 deaivvada guovllu olbmuiguin restoráŋŋa Kalastajan Majatalos.

Lávvardaga Sipilä hurgala Ohcejohkii, gos son deaivá olbmuid diibmu 12.30 restoráŋŋa Rastigaissas ja lávvardaga veaigin sus lea vel prográmmas álbmotdilálašvuohta diibmu 16.30 Anára gielddaviesus Avvilis. Stáhtaministtar Juha Sipiläs lea deaivvadeapmi maid Sámedikkiin lávvardaga veaigin.

Varrasamosat: Sápmi

Váldoođđasat

Varrasamosat

Muualla Yle.fi:ssä