Sápmi |

Oanehaččat: Ohcejoga skuvlla huksenbarggut leat álgán, Sámediggi evttoha guođohandoarjaga, Anára gielda bálkáha sámi giellastrategiija bargi ja Kela ohcanskovit gávdnojit davvisámegillii

Dá leat vuossárgga oanehis ođđasat.

Ohcejoga ođđa skuvlla huksenbargguid leat álggahan eatnama dássemiin.
Ohcejoga ođđa skuvlla huksenbargguid leat álggahan eatnama dulbemiin. Govva: Outi Paadar / Yle

Ohcejoga ođđa skuvlla huksenbarggut leat álgán

Ohcejoga gielda ja huksenfitnodat Lehto Group leat vuolláičállán birrasiid njeallje miljovnna árvosaš soahpamuša ođđa skuvla- ja máŋggadoaimmadálu huksemis Ohcejohnjálbmái. Ođđa skuvla- ja máŋggadoaimmadállu huksejuvvo ovtta geardái ja dasa bohtet sajit skuvlii ja beaivedikšui sihke suoma- ja sámegielat joavkkuide.

Huksenbarggut besset johtui jo dán geassemánus ja dállu galggašii leat gárvvis geassit 2020.

– Dárkkuhus lea guittot, ahte čakčat golggotmánus lea juo gáhttu alde ja gárvvishan dat galggašii leat dalle boahtte jage geassemánu lohppii dan vistti olis ja dieid olgosajiid suoidnemánu loahpas, čilge gieldda huksendárkkisteaddji Markku Porsanger.

Geasi áigge áigot huksegoahtit maiddái ásodaga Ohcejohnjálbmái. Dan bargá Aatelitalot Oy, nappo seamma fitnodat mii diibmá huksii márkanii ođđa ráidodálu.

– Dál leat loahpparáđđádallamiid geavvamin, vai beasašii datge doibmii. Álggus lei sáhka, ahte juovllaide lea gárvvis, muhto oaidnit leš mo dat manná, muitalii Porsanger vahkku dassái.

Gáregasnjárgga ođđa skuvlla plánat leat maid juo gárvánan. Porsanger sávvá, ahte dan beasašedje álgit hukset borgemánus.

Sámediggi evttoha guođohandoarjaga boazodoalloguvlui

Sámediggi evttoha, ahte boazodoalloguovllus váldet atnui guođohandoarjaga. Dat seasttášii Sámedikki oainnu mielde guohtumiid, buoridivčče gánnehahttivuođa ja easttášii spirevahágiid.

Sámediggi lea evttohan guođohandoarjaga bargojovkui, mii galgá mearridit man olu čuovvovaš logi jagi áigge Suomas ožžot leat bohccot. Evttohusa gávdná dáppe.

Sámedikki evttohusa mielde dáláš boazodoalu doarjagat eai heive sámi boazodollui ja guođohandoarjja njulgešii dili daid bálgosiin, gos bohccuid guođohit olles áigge.

Gieskat bálgosiid ovttastusa ságajođiheaddji Jukka Knuuti fas evttohii birasdoarjaga, man mávssášedje daid bálgosiidda, mat dollet boazologuid vuollin.

Sámediggi lea maid evttohan bargojovkui, ahte billašuvvan guohtumiid galggašedje dikšut ja oažžut ruovttoluotta boazodoalu geavahussii. Nappo vuovdedoalu ja golleroggama dihte billašuvvan guohtumiid galggašedje ordnet ja máhcahit ruovttoluotta boazodoalu atnui.

Anára gielda ohcá sámi giellastrategiija bargi

Anára gielda ohcá sámi giellastrategiija bargi bealle jahkái. Bargu álgá borgemánu 12. beaivve ja bistá juovlamánu beallemuddui.

Bargun lea oasálastit Sámedikki, Sámi oahpahusguovddáža ja Eanodaga, Anára, Soađegili ja Ohcejoga gielddaid oktasaš giellastrategiija bargui. Ulbmilin lea oažžut áigái gielddaide sámegiellastrategiijaid.

Gáibádussan bargui lea earret eará sámegielaid ja kultuvrra dovdan. Bálkán lea 3 000 euro mánus. Bárggu sáhttá bargat gáiddusin, muhto čoahkkimiidda ferte oasálastit báikki alde.

Ohcanáigi bargui nohká suoidnemánu 8. beaivve. Lasi dieđuid barggu birra gávdná Kuntarekry-neahttasiidduin.

Kela ohcanskoviid sáhttá deavdit dál davvisámegillii

Álbmotealáhatlágádus Kela neahttasiidduin sáhttá dál deavdit maiddái davvisámegielat ohcanskoviid. Dan várás dihtorii dárbbaša Adobe Reader -prográmma ja sámegielat boallobeavddi.

Álbmotealáhatlágádusa digitála áššehasbálvalusas ii leat ovdal leamaš nu njuovžil geavahit sámegiela, go vuogádat ii leat teknihkalaš sivaid dihte váldán vuostá sámegielat bustávaid.

Varrasamosat: Sápmi

Váldoođđasat

Varrasamosat

Muualla Yle.fi:ssä