Sápmi |

Oanehaččat: Ohcet riebanbivdiid, Sámeráđđi illuda duomus, guolástusláhka ovdána ja bieggafápmopárkaplánat Soađegilis

Loga dás duorastaga oanehis ođđasiid.

Kettu
Eanodaga ja Ohcejoga luonddugártejeddjiid bargun lea goddit riebaniid njálaid ovddas. Govva: AP Graphics Bank

Eanodahkii ja Ohcejohkii ohcet riebanbivdiid

Eanodahkii ja Ohcejohkii ohcet luonddugártejeddjiid, geaid bargun lea goddit riebaniid, gártet njálabesiid ja fuolahit njálaid biebmanbáikkiin. Bargu lea giđđabajis áigodahkii 18.3.-3.5.2019. Nubbi bargosajiin lea Eanodagas ja nubbi Ohcejogas, čállá Meahciráđđehus bargoalmmuhusastis. Ohcanáigi luonddugártejeaddjin nohká 7.3.2019.

Luonddugártejeaddjit barget Felles Fjellrev Nord Interreg -prošeavttas, man ulbmil lea ealáskahttit njálanáli.

Sámiráđđi lea ilus Lappi gearretrievtti duomuin

Sámiráđi presideanta Åsa Larsson Blind lea duhtavaš, go Suoma Lappi gearretriekti lea áššehuhttán sámi guollebivdiid, geat ledje áššáskuhttojuvvon lobihis bivddus Deanu oalgejogain Ohcejogas ja Veahčajogas.

– Gearretrievtti duopmu lea nu čielggas, ahte sáhttá adnojuvvot beanta oahppogirjin sámiid vuoigatvuođaid vuhtiiváldimis, cealká Larsson Blind.

Sámiráđi presideanta vuordá, ahte Suoma eiseválddit váldet Lappi gearretrievtti duomu vuhtii, ja gudnejahttet sámiid vuoigatvuođaid geavahit kultuvrraset ja bivdit árbevirolaš vuogi mielde.

Åsa Larsson Blind vuordá maid, ahte Suoma ráđđehus atná duomu muittus ovddos guvlui.

Áššáskuhtti eiseváldi Anita Haapakoski lea muitalan, ahte áigu guoddalit duomus Suoma alimus duopmostullui. Haapakoski dadjá, ahte goluid seastima dihte háliida dahkat áššis ovdamearrádusváidaga njuolgga alimus duopmostullui.

Ovdamearrádusváidda lea alaguoddi mielde vejolaš, jus vástideaddjit addet dasa lobi ja alimus duopmostuollu mieđiha váidinlobi. Eará dáhpáhusain alaguoddi ohcá nuppástusa dupmui Roavvenjárgga hoavvarievttis.

Guolástuslága ođadeapmi ovdána

Guolástuslága ođadeapmi ovdána riikabeivviin. Eanan- ja meahccedoallováljagoddi lea gaskavahku ožžon gárvvisin nuppástusaid guolástusláhkii. Nuppástusaid mielde Ohcejoga, Anára ja Eanodaga gielddaid ássiin lea boahttevuođas riekti háhkat Meahciráđđehusas lobi olles guollebivdobadjái. Lohpi guoská luosa ja dápmoha gođđujogaid.

Ovddit guolástusláhkanuppástusas Anára, Ohcejoga ja Eanodaga gieldalaččain válde eret friija guolástusrievtti ja gieldalaččat gárte gilvvohallat turisttaiguin Meahciráđđehusa jándorlobiin. Davimus gielddaid ássit leat sakka cuiggodan lága.

LK: Soađegili lahkosii várren guovlluid bieggafápmopárkii

Meahciráđđehus lea várren Soađegili Sattasjoga davábeallái guovlluid bieggafápmopárkii, muitala Lapin Kansa -aviisa. Bieggafápmopárkavárremat bohtet ovdan Davvi-Lappi eanangottehápmosis. Soađegili Sattasniemi bálggus lea almmuhan, ahte dat vuostálastá Sattasjoga davábeallái plánejuvvon bieggafápmopárkka, go guovllus leat sidjiide dehálaš guohtuneatnamat.

Eanangottelávvahápmosii leat sárgon Soađegili guvlui maiddái moadde eará bieggafápmopárkka. Dasa lassin gielddas lea juo okta doaibmi bieggafápmopárka Joukhaisselkä guovllus sullii 17 kilomehter geahčen Soađegili guovddážis.

Varrasamosat: Sápmi

Váldoođđasat

Varrasamosat

Muualla Yle.fi:ssä