Sápmi |

Oanehaččat: Okta jámii biilalihkohisvuođas Anáris, Kärnä guođđán dutkanbivdaga Sámedikki válgalávdegottis, Avvila plastihkkačoagginbáiki válbmaneamen ja čáhcecrossa EM-gilvvut Soađegilis

Dás leat vahku maŋimuš oanehis ođđasat.

Sámediggeválggat 2019
Guovddáža lappilaš riikabeaiáirras Mikko Kärnä lea guođđán bolesii dutkanbivdaga Sámedikki válgalávdegotti doaimmas. Govva: Sámediggi

Okta jámii biilalihkohisvuođas Anáris

Okta olmmoš lea jápmán Anáris ikte eahkedis dáhpáhuvvan biilalihkohisvuođas, muitala Lappi boleslágádus. Lihkohisvuohta dáhpáhuvai Čeavetjávrrigeainnu alde. Njávdámis Gápmasa guvlui vuodján biila vujii badjel geainnu. Biillas lei vuoddji ja okta mátkkošteaddji. Mátkkošteaddji jámii lihkohisvuođas, ja biilavuoddji lápmašuvai vearrát.

Gádjunlágádus oaččui gohččuma lihkuhisvuođabáikái ikte eahkedis gávcci sulaid. Gádjunhelikopter doalvvui lápmašuvvan vuoddji Girkonjárgga buohccevissui.

Kärnä guođđán dutkanbivdaga Sámedikki válgalávdegottis

Guovddáža lappilaš riikabeaiáirras Mikko Kärnä lea guođđán bolesii dutkanbivdaga Sámedikki válgalávdegotti doaimmas. Alimus hálddahusriekti celkkii ikte 1.8. addin čovdosiin, ahte Sámedikki válgalávdegottis ii lean riekti váldit eret válgalogahallamis daid 94 olbmo, maid alimus hálddahusriekti lei válgalogahallamii lasihan jagiin 2011 ja 2015.

– Lean bivdán bolesa čielggadit, leago sáhka rihkuslága mielde luohttámušsaji boastut geavaheamis. Dovdomearkkat goitge dorjot jurdaga. Alimus hálddahusrievtti addin čovdosiin gávnnahuvvo, ahte válgalávdegottis ii leat leamaš doaibmaváldi dahkat čovdosiid. Mearrádusat leat maiddái dagahan vahága buot daid olbmuide, geaid dat guoskkahit. Dál galgá čielggadit, mii lea válgalávdegotti ja dan lahtuid rihkusvuoigatvuođalaš ovddasvástádus lágahis mearrádusain, čállá Kärnä dieđáhusastis.

Avvila plastihkkačoagginbáiki lea válbmaneamen

Lappi bázahusfuolahusa gielddaovttastupmi Lapecos muitalit, ahte plastihkkačoagginbáikki Avvilii galggašii válbmanit borgemánu áigge. Rinki-ekočoagginbáiki boahtá Avvilii, K-supermarket oktavuhtii. Čohkkenlihtit leat kartoŋŋa-, lássa-, metálla- ja unnametálla, bábir- ja plastihkkabázahusaide.

Anára gieldda bázahusain fuolaha Lappi bázahusfuolahusa gielddaovttastupmi Lapeco ja Suomen Pakkauskierrätys Rinki Os. Sis lea ovttasbargosoahpamuš ruovttuid plastihkkabázahusaid čoagginfierpmádagas.

Buot eará Sámi guovllu gielddain leat jo plastihkkačoagginbáikkit.

Čáhcecrossa EM-gilvvut Soađegilis

Čáhcecrossa eurohpámeašttirgilvvut ordnejuvvojit lávvardaga 3.8. Soađegilis.

Gilvvut ordnejuvvojit Nilimella gáttis ja dat álget diibmu 11. 00.

Varrasamosat: Sápmi

Váldoođđasat

Varrasamosat

Muualla Yle.fi:ssä