Sápmi |

Oanehaččat: Okta lápmašuvai buollimis Njuorggámis, čuoigit láhppuiga Anáris, Solju evttohassan bálkkašupmái Kanadas, Jon Henrik Fjällgren finálii Melodifestivalenis, Nussir ruvkii lohpi ja Sámediggi čoahkkimastá

Loga dás vuossárgga oanehis ođđasiid.

Palomiehen varusteet valmiina.
Govva: Toni Pitkänen / Yle

Dá gulat vuossárgga Yle Ođđasiid Sámis diibmu 7:30. Jietna: Yle Areena

Okta lápmašuvai buollimis Njuorggámis

Ohcejoga Njuorggámis buollái mannan ija stohpu, ja okta olmmoš lápmašuvai buollimis. Buollin leavai sisgáhttui ja dagahii stohpui vearrás buollin- ja čáhcevahágiid. Buollinsiva eai dieđe.

Stobus ássán olmmoš vuoiŋŋai suova čáskkadettiin ja su dolvo dikšui. Gádjunlágádus oaččui dieđu buollimis sotnabeaivve ovdal gaskaija. Buollin jáddaduvvui oalát iđitija.

Čuoigi guovttos láhppuiga Anáris

Gádjunlágádus gájui vuossárgga iđđes láhppon čuoigi guoktá helikopteriin Anáris. Guokte čuoigi gohččuiga veahki, go láhppuiga čuoiganlahtus Ocomâš-duottarguovllus.

Gádjunlágádus oaččui dieđu čuoigi guoktá heađis iđđes diibmu 5:40. Manai goit sullii guokte diimmu, ovdal go gáddjut gávdne čuigiid. Sudno dolvo helikopteriin ambulánsii dikšui. Čuoigit leigga galbmon, muhto eaba lean vearrát lápmašuvvan.

Solju evttohassan musihkkabálkkašupmái Kanadas

Solju lea evttohuvvon Indigenious Music Awards -bálkkašumi oažžun Kanadas. Solju skearru Ođđa Áigodat lea evttohassan Best International Indigenious Release -bálkkašupmái, nappo buoremus riikkaidgaskasaš eamiálbmot almmustahttin.

Bálkkašupmái leat oktiibuot vihtta evttohasa. Bálkkašumi vuoiti almmuhit miessemánu 17. beaivve Kanada Winnipegis.

Jon Henrik Fjällgren sáhttá beassat Eurovision-lávlungilvui

Ruoŧa beale sápmelaš Jon Henrik Fjällgren sáhttá beassat ovddastit Ruoŧa Eurovision-lávlungilvvus, muitala NRK Sápmi. Fjällgren jienastuvvui lávvardateahkedis njuolga Ruoŧa Melodifestivalen finalii luohtelávlagiin Norrsken. Melodifestivalen-gilvvu vuoiti beassá ovddastit Ruoŧa Eurovision-gilvvus.

Fjällgren gilvala dál juo goalmmát geardde Melodifestivalenis. Ovdal son lea fasken sihke nuppi ja goalmmát saji.

Melodifestivalen finála lágiduvvo Stockholmmas njukčamánu 9. beaivve.

Nussir ruvkedoibmii lohpi mieđihuvvon

Norgga ráđđehus lea addán lobi álggahit ruvkedoaimma Nussirii, Finnmárkku Fálesnuorrái. Ruvkkes áigot roggagoahtit veaikki.

Ruvkke leat garrasit vuostálastán, erenoamážit danin go ruvkebázahusaid besset luoitit Riehpovutnii. Ruvkedoaimma leat ákkastallan earret eará ođđa bargosajiiguin.

Áššis muitala NRK Sápmi. Suomagillii das muitala Kaleva-aviisa.

Sámediggi gieđahallá ođđa virggiid vuođđudeami

Sámedikki dán jagi vuosttas dievasčoahkkin gieđahallá ođđa virggiid vuođđudeami. Čoahkkima áššelisttus leat ealáhusčálli, riikkaidgaskasašáššiidčálli ja dieđihančálli virggiid vuođđudeapmi. Dasa lassin dievasčoahkkin vállje ođđa láhkačálli.

Áššelisttus leat maid Sámedikki jagi 2018 doaibmačilgehus ja ságajođiheaddji ja Sámedikki sierra orgánaid ovddasteaddjiid čilgehusat ovddiduvvon áššiin.

Jagi vuosttas dievasčoahkkin dollojuvvo ihttin maŋŋebárgga Anáris. Čoahkkin álgá diibmu 10:00 ja dan sáhttá čuovvut báikki alde dahje neahta bokte.

Varrasamosat: Sápmi

Váldoođđasat

Varrasamosat

Muualla Yle.fi:ssä