Sápmi |

Oanehaččat: Outi Pieskii viđa jagi bargostipeanda, plastihkkabázahusaid čoaggigohtet Anáris, Sámis galgá vuordit bolesa juoba guokte diimmu, ruhttejeaddjit doibmet vahkoloahpas ovddosguvlui iehčanas fitnodatdoallin

Dá leat bearjadaga oanehis ođđasat.

Outi Pieski,
Dáiddár Outi Pieski illuda, go beassá dál ráfis ovddidit iežas dáiddaprošeavttaid. Govva: Jussi Koivunoro / Yle

Outi Pieskii vihtta jagi bargostipeanda Dáidaga ovddidanguovddážis

Dáidaga ovddidanguovddáš juolludii govvadáiddár Outi Pieskii viđa jagi bargostipeandda. Pieski muitalii áššis sosiála medias.

– Lean hui giitevaš, go mu bargu lea ná ožžon fuomašumi ja dasa lea áddojuvvon árvu. Dáiddára eallin lea dakkár oanehis bargogaskavuođaid eallin. Dál orru, ahte lean ožžon guhkit bargošiehtadusa ja beasan ráfis vuoddjut ieažan bargguide. Mus leat olu iešguđetlágan plánat, maiguin áiggon joatkit bargat, muitala Pieski.

Pieskii máksojuvvo bargostipeanda juohke mánotbaji. Stáhta dáiddárbargostipeanddaid juolludeamis fuolaha Suoma Dáidaga ovddidanguovddáža stáhta dáiddádoaibmagoddi.

Čakčat maiddái Anáris čoaggigohtet plastihkkabázahusaid

Anára gielda lea dálá plánaid mielde oažžumin borgemánus Rinki-ekočoagginbáikki Avvilii K-supermarket oktavuhtii. Čohkkenlihtit leat kartoŋŋa-, lássa-, metálla- ja unnametálla, bábir- ja plastihkkabázahusaide. Ráđđádallama vuolde lea vel oapmebiktasiid dahjege geavahuvvon biktasiid čoaggin, muitala Rinki Os. Mátta- ja Nuorta-Suoma guovlluhoavda Jari Koivunen.

Anára gielda bázahusain fuolaha Lappi bázahusfuolahusa gielddaovttastupmi Lapeco ja Suomen Pakkauskierrätys Rinki Os. Sis lea ovttasbargosoahpamuš ruovttuid plastihkkabázahusaid čoagginfierpmádagas.

Muitaleimmet ovdal, ahte Anárii boahtá plastihkkačohkkenlihtti dán gease.

Eanodagas bolesa gártá vuordit juoba guokte ja bealle diimmu

Eanodagas bolesa gártá vuordit juoba badjel guokte ja bealle diimmu. Yle dahkkan čielggadeami mielde bolesa vurdet Eanodagas gaskamearalaččat 167 minuhta. Roavvenjárggas gaskamearalaš vuordináigi lea fas ovcci minuhta. Roavvenjárgga ja Giepma leat Lappi gielddain áidna gielddat, gos boles boahtá báikki ala vuollel logi minuhtas.

Ohcejogas boles boahtá báikki ala measta 48 minuhtas ja Anáris 24 minuhtas. Soađegilis vuordináigi lea badjel 13 minuhta.

Eanodaga lassin bolesa sáhttá šaddat vuordit badjel diimmu maiddái Pellos ja Sallas.

Bireruhttenortnet nohká Suomas dán vahkoloahppa

Maŋimus guovlluid bireruhttensoahpamušat eai leat šat fámus ja dál suoidnemánu álggus olles riikkas geavahišgohtet iehčanas ruhttenfitnodagaid bálválusaid.

Ovdal ruhttenbálválusaid ordnemis lea fuolahan gádjunlágadusat. Dál ruhttejeaddjit doibmet iehčanas fitnodatdoallin. Bireruhtten lea leamašan geavahusas ovdamearkka dihte Ohcejogas ja Eanodagas.

Varrasamosat: Sápmi

Váldoođđasat

Varrasamosat

Muualla Yle.fi:ssä