Sápmi |

Oanehaččat: Paltto anárašáššiid ráđđádallangotti ságajođiheaddjin, almmái jávkan Soađegilis, čuovvovaš Sámi girkobeaivvit Anárii, Lappi EBI-guovddáža doarjagat čázádagaid dikšumii juhkkojuvvon

Dás leat gaskavahku oanehis ođđasat.

Heikki Paltto 23.2.2016
Heikki Paltto válljejuvvui anárašáššiid ráđđádallangotti ságajođiheaddjin. Govva: Yle

Guldal dás gaskavahkkoiđida Yle Ođđasiid Sámis. Jietna: Yle Areena.

Paltto anárašáššiid ráđđádallangotti ságajođiheaddjin

Heikki Paltto lea válljejuvvon anárašáššiid ráđđádallangotti ságajođiheaddjin. Várreságajođiheaddjin válljejuvvui Kirsti Kustula. Ráđđádallangotti eará lahtut leat Jouni Aikio, Anu Avaskari, Neeta Jääskö ja Jan Saijets.

Ráđđádallangoddi čoahkkanii vuosttaš háve mánnodaga, geassemánu 10. beaivve. Čoahkkimis gieđahalle ráđđádallangotti ortniiduvvama lassin anáraččaide guoskevaš áigeguovdilis áššiid, dego Jiekŋameara ruovdemáđija sihke duohtavuođa- ja soabadallanproseassa.

Anárašáššiid ráđđádallangotti bargun lea addit cealkámušaid Sámedikki stivrii ja lávdegottiide anáraččaide guoskevaš áššiin, čuovvut sidjiide guoskevaš áššiid ovdáneami, doaibmat áššedovdin ja dahkat evttohusaid anáraččaide guoskevaš gažaldagain.

Soađegili boles bivdá dieđuid jávkan albmás

Soađegili boles bivdá almmuhit, jos olbmuin leat dieđut ikte jávkan albmás. Nuorra almmái lei vuolgán ikte álgoeahkedis vázzit Valkkisjärvi gáttis, muhto ii lean máhccan ruovttoluotta stohpui.

Alit biktasiidda gárvodan almmái lea seaggi, 180 sentemehtera guhkki ja sus leat ruškes vuovttat.

Boles ohcá albmá Seipäjärvi gili lahkosis odne helikopteriin ja beatnagiiguin.

Čuovvovaš Sámi girkobeaivvit ordnejuvvojit Anáris

Čuovvovaš Sámi girkobeivviid dollet Anáris guovtte jagi geažes. Beaivemearrin lea mearriduvvon 18–20.6.2021, muitala Anára searvegotti sámebáhppa Mari Valjakka. Girkobeivviid doaibmagoddi lea čoahkkimisttis mearridan, ahte Anára girkobeivviid temán boahtá leat Bassi dolla - bassi álbmot.

– Mannan háve fáddán lei čáhci, ahte čáhci lea eallima gáldun. Dát temá joatkašuvvá hui bures. Dolla lea leamašan áli hui dehálaš ášši sámi árbevieruin ja maiddái kristtalaš konteavsttas. Dolla mearkkaša midjiide oskku, bassi vuoiŋŋa ja rohkosa, muitala Valjakka.

Mannan háve sámiid girkobeaivvit ledje Ruoŧas, Árviesjavrries geassit 2017.

Lappi EBI-guovddážis doarjagat čázádagaid dikšumii

Lappi EBI-guovddáš lea juohkán doarjagiid dulveriskkaid hálddašeami sihke čázádagaid geavaheami ja dili buorideaddji prošeavttaide.

Lappi EBI-guovddáš lea mieđihan gávcci prošektii oktiibuot 154 400 euro doarjagiid čázádagaid dikšumii Lappi guovllus. Mieđihuvvon doarjagiid sturrodat molsašuddá 2 800 ja 60 000 euro gaskkal. Dorjojuvvon fidnuin buoridit dulveriskkaid hálddašeami, jávrriid dili sihke ovddidit čázádagaid máŋggabealat ja dorvvolaš geavaheami.

Okta doarjaga oažžuin lei Lappi gádjunlágádusa fidnu, mainna ovddidit Lappi mearkkašahtti dulveriskaguovlluid dulveeasttadanplánaid.

Varrasamosat: Sápmi

Váldoođđasat

Varrasamosat

Muualla Yle.fi:ssä