Sápmi |

Oanehaččat: Pieski dáidda geasuhii 36 000 geahčči, guolástuslágas valjis ságastallan, busse siiddu ala Suoločielggis ja golmmas NRK Sámi ođashoavdan

Loga dán gaskavahko oanehis ođđasiid.

Jietna: Outi Pieski,
Jietna
Riikkabeivviin ikte valjis ságastallan guolástuslága nuppástahttimis. Guldal dás Yle Ođđasiid Sámis. Jietna: Yle Areena. Govva: Jussi Koivunoro / Yle

Pieski dáidda geasuhii

Espoo modearna dáidaga musea EMMA geasuhii mannan jagi badjel 125 000 galledeaddji.

Dán logus dáiddár Outi Pieski Čuolmmadit-čájáhusas ledje sullii 36 000 geahčči. Musea dieđuid mielde erenomážit Pieski čájáhus geasuhii, go dat leamaš valjis ovdan maid medias.

Museas leat oktanaga máŋggat čájáhusat oaidninláhkái ja dál dat juvssai maid geahččimearrái biddjojuvvon mihttomeriid.

Riikkabeivviin valjis ságastallan guolástuslágas

Riikkabeivviid dievasčoahkkimis šattai maŋŋebárgga veaigin viiddis ságastallan guolástuslága ja namalassii guolástuslága logát paragráfa ođasmahttimis. Ášši nu gohčoduvvon sáttaságastallamis geavahuvvojedje logit sáhkavuorut, aŋkke badjel golmmalogi.

Eanáš sáhkavuorut gieđahalle báikki olbmuid guolástusrivttiid ja divrras luosasogat guliid suodjaleami, ja eanan- ja meahccedoalloministtar Jari Leppä šattaige máŋgii bealuštit ministeriijas láhkaevttohusnuppástusa.

Deháleamos nuppástus guoská báikki olbmuid bivdorivttiid sámeguovllus dakkár siidojogain, main ellet luosasogat guolit. Láhkaevttohusa mielde báikki olbmot sáhtášedje oastit bivdolobi olles bivdobadjái govttolaš haddái.

Dasa lassin ođđa áššin lea, ahte juos bivdá menddo uhca guliid ja gávnnahallá, guoli árvvu ferte buhttet stáhtii. Dát guoská hárvenaš luosasogat guliid, ja maid guliid suodjaleamis šattai valjis sáhka.

Ášši vuolgá riikkabeivviid birasváljagotti gieđahallamii, mii galgá dahkat smiehttamušas ovdal boahtte mánu loahpa. Ášši galgá geargat riikkabeivviide ovdal njukčamánu beallemuttu, juos dan háliidit ráđđehusa dáhtu mielde fápmui miessemánu álggus vel dán jagi. Riikkabeivviid válgaboddu álgá njukčamánu beallemuttus.

Turistabusse siiddu ala

Ásialaš turisttaid fievrredan busse vujii maŋŋebárgga eahkedis badjel luotta moadde kilomehtera Suoločielggi márkana davábealde. Heahtealmmuhus bođii guoktelogi váilli gávcci eahkedis.

Olggosvuodjimis busse gopmánii siiddu ala. Buot 30 mátkkošteaddji besse olggos busse gáhttolásain iige oktage lápmašuvvan. Sin lassin busses lei vuoddji ja oahpisteaddji. Buohkain ledje dorvoboahkánat gitta, mii veahkehii dán dilis. Eahkedis lei heajos siivu, njaláhas ja muohtti.

Golmmas ohcan NRK Sámi ođashoavdan

Golmmas leat ohcan NRK Sámi ođas- ja áigeguovdilisdoaimma hoavdan Kárášjohkii.

32-jahkásaš nissonolmmoš ii hálit almmuhit namas, muhto su lassin báikki leaba ohcan NRK Sámi ođasreporter, 57-jahkásaš Dan Robert Larsen ja Norgga Sámedikki dieđihanhoavda, 51-jahkásaš Jan Roger Østby. Son lea dan ovdal bargan NRK Sámis.

Báiki leai juo nuppe geardde rabas.

Varrasamosat: Sápmi

Váldoođđasat

Varrasamosat

Muualla Yle.fi:ssä