Sápmi |

Oanehaččat: Rádjeáiddi evttohit nuorttabeallái Deanu geainnu, Solju ii birgen Etno-Emmas, ovddeš eamitskuvllas eai fálaldagat ja estteeanalaččaid heahtedilli Heahtás

Loga dás vahku vuosttas oanehis ođđasiid.

Suoma ja Norgga rádjaáidi
Bálgosiid ovttastus evttoha hukset Norgga ja Suoma gaskasaš boazoáiddi Leavvajogas gitta boares Gáregasnjárgii Deatnogátti geainnu nuorttabeallái. Govva: Bálgosiid ovttastus / Paliskuntain yhdistys

BO evttoha Deatnogátti rádjeáiddi geainnu nuorttabeallái

Bálgosiid ovttastus evttoha hukset Norgga ja Suoma gaskasaš boazoáiddi Deatnogátti geainnu nuorttabeallái. Bálgosiid ovttastusa mielas áidi Leavvajogas gitta boares Gáregasnjárgii doaimmašii buoremusat, jus dat livčče geainnu nuorttabealde dalán geaidnoguoras, čállá Poromies-bláđđi.

Bálgosiid ovttastus ákkastallá evttohusas birasákkaiguin, dáluid báikkiiguin ja bohccuid johtingeainnuiguin. Ášši leat evttohan Suoma ja Norgga gaskasaš rádjeáidekomišuvnna čoahkkimis.

Suoma ja Norgga gaskasaš rádjeáidekomišuvdna joatká rádjeáideášši gieđahallama otne vuossárgga čoahkkimisttis Gáregasnjárggas. Rádjeáiddi huksemii leat várren áiggi jagi 2021 lohppii.

Solju ii birgen Etno-Emmas – Jagi etno -bálkkašumi faskii SANS

Sámemusihkkajoavku Solju ii birgen vahkuloahpas dollojuvvon Emma-gálas. Solju lei Jagi etno -evttohassan. Dán kategoriija vuoittu faskii musihkkajoavku SANS, mii ovttastahttá suopmelaš lávluid ja gándilmusihka británnialaš ja armenialaš instrumeantamusihkkii.

Emma-gála lágiduvvui dál 33. geardde ja das bálkkašedje Suomas buoremusat birgen musihkkáriid. Eanemus Emma-bálkkašumiid čokkii suopmelaš rápmusihkkár Pyhimys, guhte oaččui oktiibuot guhtta Emma-bálkkašumi.

Avvila ovddeš eamitskuvllas eai fálaldagat – vuovdaleami jotket

Avvila ovddeš eamitskuvlla giddodaga nappo dalá Kalottikeskus-giddodaga vuovdin ii leat ovdánan. Kalotin oppimiskeskus -foandda áššeolmmoš Marja Männistö dadjá, ahte juovlamánus vuovdimassii biddjojuvvon giddodagas eai leat boahtán fálaldagat. Kalotin oppimiskeskus -foandda stivra mearridiige bearjadaga joatkit ovddes eamitskuvlla vuovdináiggi gitta guovvamánu lohppii.

Giddodat vuvdojuvvo fálaldatgávppiin. Vuolimus fálaldathaddin lea meroštallojuvvon 150 000 euro. Giddodat lea huksejuvvon jagi 1958 ja das leat doaibman earet eará Avvila eamitskuvla ja maŋŋelis Sámi oahpahusguovddáš.

Estteeanalaš joavku heahttedilis Heahtás

Sotnabeaivve garra buollašis viđa estteeanalaš olbmo joavku šattai heahtedillái go sin biila bieđganii Eanodaga Heahtá márkanis. Bealjehis ja gielahis joavku válddii oktavuođa Estteeatnama heahteguovddážii, man bokte Lappi gádjunlágádus fidnii dieđu sin heađis. Heahtás lei dalle 30 buolašceahki.

Joavku beasai Heahtá buollinstašuvdnii liekkadallat ja sin dili čielggadišgohte doppe. Áššis muitala Lapin Kansa -aviisa.

Varrasamosat: Sápmi

Váldoođđasat

Varrasamosat

Muualla Yle.fi:ssä