Sápmi |

Oanehaččat: Ráđđehusa ceggen ovdána, bodnečáziid dutkagohtet, davás ođđa geaidnobarggut, otne lottiid geahčadeapmi Vuohčus

Loga dás oanehis ođđasiid.

Hallituspuolueiden puheenjohtajat infossa
Antti Rinne ráđđehusa ceggen ovdána. Govva: Pekka Tynell / Yle

Jietna: Yle Areena

Ráđđehusa namat otne čoahkis

Ráđđehusa ceggen ovdána. Ikte eahkedis SDP lea olggosaddán ministtarlisttu namaid ja Antti Rinne ráđđehussii dán rádjái leat nammaduvvon maid ruonáid ja ruoŧŧelaš álbmotbellodaga ministarat.

Guovddášbellodaga ja gurutlihtu ministtarnamahusat dasto vurdojuvvojit otne. Sámiide dehálaš riekteministtarin lea loktaneamen RÁB ságajođiheaddji Anna-Maja Henriksson.

Čuovo ášši dás.

Bodnečáziid dutkkan jođus

Lappi EBI-guovddáš čađaha dán geasi bodnečáziid dutkama earret eará Anáris ja Ohcejogas. Dan dihte válljejuvvon báikkiid dahket eatnama bovrremiid, geahčademiid ja gálduid inventerema.

Dutkanbarggut álget fiestara bealde Gihttelis ja ovdánit das davás guvlui. Geahččalanbovrremiin háliidit oažžut dieđu bodnečáziid heivvolašvuođas ávkkástallamii. Juos bovrremat leat priváhta eatnamiid alde, daidda bivdet sierra lobi.

Bodnečáziid guoski áššiin mearriduvvo sierra lágas ja Lappi guovllus ulbmilin lea rahkadit bodnečáhcekártta čáziid boahttevaš vejolaš geavaheami dihte. EBI-guovddáža dieđuid mielde davvin leat valjis bodnečáhceguovllut, ja dutkanbargguid jotket vel lágaš jagiinge.

Ođđa geaidnobarggut davás

Lappi EBI-guovddáš lea dahkan evttohusas geainnuid ortnegisdoallamis ja ođđa geaidnobargun jagiide 2019-2021. Evttohusa mielde njelješgeaidu Anára márkana bokte divvojuvvo beannot miljovnnain boahtte jagi, ja Soađegilis Jeesiöjoga šaldi divvojuvvo.

Anára gielddas maid Ráji-Jovsseha johtolatordnemat divvojuvvojit ja geaidu Supru ja Jänisjärvi gaskkas Čeavetjávrri guvlui ja dat galget leat gárvvisin maŋit jagi. Stuorra geaidnobargu lea boahtimin maid Köngäs-Hanhimaa gaskkii Gihttela gieldda beallai ja dat máksá 6,7 miljovnna. Dan geainnus lea stuorra mearkkašupmi johtolahkii Anáris fiestara guvlui.

Jođus leat maid juo ovdal álggahuvvon geaidnobarggut, dugo Njellim-geaidnu huksen ja vel Njellim-joga šalddi huksen, mat galget gárvvásmuvat juo boahtte čavčča.

Vuohčus lottiid geahčadeapmi

Otne gaskavahkku ávvudit máilmmi birasbeaivvi. Dan gudnin Vuohčus lágidit árbevirolaš lottiidgeahčadanduvrra Sompiojávrre guvlui guđa ja gávcci gaskkas. Vuohču gilis báikki alde šaddá mátkki 17 kilomehtera.

Lottiid geahčadeamis ja dovdamis veahkehit Osmo Hirvasvuopio Soađegili loddesearvvis ja Kristiina Aikio Urho Kekkonen álbmotvuovddi doaibmabáikkis.

Varrasamosat: Sápmi

Váldoođđasat

Varrasamosat

Muualla Yle.fi:ssä