Sápmi |

Oanehaččat: Riessunkursa nuoraide, suopmelaš-norgalaš rádječázádatkommišuvnna ávžžuhusat 2019, Buođggáin musihkkačájálmas Finnmárkku suopmelaččain ja SR: Ecuadora stáhta vuoittáhalai

Dá leat vahku vuosttas oanehis ođđasat.

Rissojuvvon silkkit.
Sámedikki nuoraidráđđi ja Sámi Duodji rs ordneba riessunkurssa nuoraide Anáris. Gova silkkit eai laktás áššái. Govva: Ville Fofonoff / Yle

Nuoraidráđđi ja Sámi Duodji rs ordne riessunkurssa nuoraide

Sámedikki nuoraidráđi De!-prošeakta ja Sámi Duodji rs ordneba nuvttá riessunkurssa borgemánus 13–29-jahkásaš nuoraide. Kursa ordnejuvvo Anáris, Sámekulturguovddáš Sajosis.

Oassálastit sáhttá juohke beaivve, dahje dušše dihto beivviin iežas miela mielde. Kursii dárbbašuvvojit iežas liidnegággát ja árpput. Kurssa oahpaheaddjin lea Neeta Jääskö. Oahpahus ordnejuvvo anáraš- ja davvisámegillii.

Kursaáigetávvala gávnnat dáppe.

Suopmelaš-norgalaš rádječázádatkommišuvnna ávžžuhusat 2019

Ođđasamos dutkamušaid mielde Gyrodactylus safaris -luossaparasihta leat gávnnahan Tuuloma- ja Kuolajogas Ruošša bealde. Luossaparasihtta dagaha stuorra áitaga Barentsmerrii luoiti čázádagaid luossanáliide. Luossaparasihta dagahan njoammumis leat stuorra ekologalaš ja servodatlaš čuovvumušat rádječázádagaide ja erenoamážit sámekultuvrii.

Suopmelaš-norgalaš rádječázádatkommišuvdna deattuha, ahte čázádagaid iešguđet geavaheaddjijoavkkuide oaivvilduvvon dieđihanbarggu luossaparasihtas galgá viiddidit ja nannet Norggas, Suomas ja Ruoŧas.

Kommišuvdna oaidná dehálažžan, ahte eiseválddit geain lea ovddasvástádus áššis, nannejit ovttasbarggu ja koordinerejit doaimmaid, mainna figget ovddalgihtii eastadit vahágiid. Kommišuvdna bivdá Norgga ja Suoma eiseválddiid leat oktavuođas Ruošša eiseválddiide doaimmain, mat álggahuvvojit dakkaviđe, vai luossaparasihta leavvan ráddjejuvvo ja dustejuvvo čázádagain, gosa parasihtta lea leavvan.

Suopmelaš-norgalaš rádječázádatkommišuvnna 2019 ávžžuhusaid sáhtát lohkat dáppe.

Musihkkačájálmas Finnmárkku suopmelaččain čájehuvvo Buođggáin

Suopmelaččaid eallimis lea ráhkaduvvon musihkkačájálmas Davvi-Norggas.

Finnmárkku historjjás muitaleaddji musihkkačájálmasa “Rakkauden kaikuja kalliossa” váldočájáhus lea boahtte lávvardaga Buođggáin, Mátta-Várjjagis, Norggas. Čájálmasat čájehuvvojit lávvardaga ja sotnabeaivve 27.–28.7. diibmu 13:00 ja 18:00.

Čájálmasa bagadallá bálkkašuvvon giehtačálli-bagadalli Arto Myllärinen. Dahkkiid joavkkus leat lávlut ja neavttárat Suomas, Norggas ja Duiskkas. Mielde lea maiddái earet eará nuortalaš Miina Sanila.

Čájálmasa giella lea suomagiella, muhto mielde lea maiddái dárogiella ja Finnmárkku suopman.

SR: Ecuadora stáhta vuoittáhalai eamiálbmogii

Ecuadoris eamiálbmogat leat vuoitán historjjálaš vuoittu stáhta vuostá.

Ecuadora stáhta ii beasa bohkat oljju eamiálbmogiid guovlluin Amazonas. Eamiálbmogiid ovddasteaddjit ohcet Ovttastuvvan Našuvnnaid doarjaga, vai stáhta galgá dohkkehit duopmocealkámuša ja ahte eará guovllut maid besset orrut ráfis.

Áššis muitala Sveriges Radio Ekot.

Divvojuvvon 22.7.2019 dii. 17:09: Divvojuvvon, ahte Sveriges Radio muitalii Ecuadora eamiálbmogiid vuoittus stáhta vuostá, go ovdal muitaleimmet gáldun NRK Sámi.

Varrasamosat: Sápmi

Váldoođđasat

Varrasamosat

Muualla Yle.fi:ssä